Зеленский Донбассдан украин қўшинлари олиб чиқиб кетилиши шартини айтди

Аввалроқ Зеленский Донбасснинг Киев назорати остидаги қисмидан қўшинларни олиб чиқиш масаласи бўйича референдум ўтказилиши мумкинлигини айтганди.

Фото: Reuters

Украина қуролли кучлари Донбассдан чиқиб кетиши учун Россия томонидан ҳам худди шундай ҳаракат бўлиши шарт, деди Украина президенти Володимир Зеленский. Бу ҳақда «Новини.LIVE» хабар берди.

«Агар қаердандир қўшинлар чиқиб кетишини истасангиз, у ҳолда ҳар доим бир хил ҳаракат қилинади. Биз 5 км га узоқлашсак, улар ҳам 5 км га узоқлашади. Биз 10 км га, улар ҳам 10 км га. Шундагина демилитаризация ҳудуди бўлади», — деди Зеленский.

Унинг фикрича, «энг тўғри йўл — қаерда турган бўлсак, ўша ерда туриш».

Аввалроқ Зеленский Донбасснинг Киев назорати остидаги қисмидан қўшинларни олиб чиқиш масаласи бўйича референдум ўтказилиши мумкинлигини айтганди. Politico нашри суҳбатлашган украин депутатлари мамлакат парламенти қўшинларни олиб чиқиш таклифини маъқулламаслигини билдиришган.

Кремл Донбассдан Россия қўшинлари олиб чиқиб кетилиши мумкинлигини истисно қилмади.

«Лекин Росгвардия, бизнинг полициямиз, тартибни назорат қилиш учун керак бўладиган ҳамма нарса бўлади», — деди Россия президентнинг ёрдамчиси Юрий Ушаков.

Унинг таъкидлашича, ўт очиш фақат Донбассдан украин қўшинлари олиб чиқиб кетилганидан кейингина тўхтатилади, ҳудуд эса эртами-кечми тўлиқ Россия назоратига ўтади.

Тайёрлаган: Дилшодбек Асқаров

#Донбасс #Володимир Зеленский