Қўшимча функционаллар
-
Тунги кўриниш
Bloomberg: Россиянинг Urals нефти нархи 34 долларгача тушиб кетди
АҚШ санкциялари фонида Россиянинг Urals маркали нефти бир баррели 34 долларгача қулади, деб хабар беради Bloomberg. РФдан нефт жўнатишда сотувчилар бир баррел учун тахминан 27 доллар миқдорида чегирма таклиф қилишга мажбур бўлмоқда.
Фото: TASS/dpa
Россиянинг асосий экспорт нефти — Urals маркасининг нархи бир баррели учун тахминан 34 долларгача пасайди. Бу АҚШ томонидан мазкур соҳадаги энг йирик компаниялар — “Роснефть” ва “Лукойл”га қарши жорий этилган санкциялар фонида рўй берди. Argus Media компанияси маълумотларига таянилган ушбу маълумотларни Bloomberg агентлиги душанба куни, 22 декабрда эълон қилди.
19 декабр куни Болтиқ денгизи портларидан етказиб бериш шарти билан Urals нефти бир баррелини 34,82 долларга, Қора денгиз портларидан етказиб беришда эса 33,17 долларга сотиб олиш мумкин бўлган. Таққослаш учун: шу куни эталон Brent маркасининг нархи 61 долларни ташкил этган. Bloomberg қайд этишича, бир йил ичида Brent нархи Urals'га қараганда анча камроқ пасайган — бу эса санкциялар таъсирини кўрсатади.
Argus маълумотларига кўра, ҳозир Россиядан жўнатилганда Urals'га берилаётган чегирмалар ўртача 27 доллар атрофида. Нефт Ҳиндистонга етиб боргандан кейин чегирма тахминан 7,5 долларгача камаяди. Шу билан бирга, Bloomberg ёзишича, Россия ёнилғисининг анча паст нархи нефтни қайта ишлаш заводларини санкцияларга эътибор бермасдан уни сотиб олишга ундамоқда.
Bloomberg 16 декабр куни ҳам Argus Media маълумотларига таянган ҳолда, Россия экспортчилари ҳозир Болтиқ, Қора ва Япон денгизлари портларидан юклашлар учун бир баррелга 40 доллардан сал кўпроқ пул олаётганини ёзган эди. Ўшанда ҳам агентлик “Россия нефти нархлари Украинадаги уруш бошланганидан бери энг паст даражада” эканини таъкидлаган.
Россиянинг нефт қазиб олувчи “Лукойл” ва “Роснефть” компаниялари, шунингдек уларнинг 34 та шуъба тузилмаси жорий йил октябр ойида Россиянинг Украинага қарши урушини давом эттираётгани фонида Вашингтон ва Лондон санкцияларига тушди. АҚШ ўшанда урушни тугатиш бўйича тинчлик жараёнида “Россия томонидан жиддий қизиқиш йўқлиги”ни билдирган.
18 декабр куни эса Буюк Британия ҳукумати 24 та жисмоний ва юридик шахсга нисбатан санкциялар киритди, улар орасида Россиянинг “Татнефть”, “Русснефть”, “Руснефтегаз” ва “ННК-Ойл” нефт компаниялари ҳам бор. Шу куни Европа Иттифоқи Россиянинг “соя флоти”га тегишли 41 та танкерни қора рўйхатга киритди. Шу билан санкциялар остидаги кемаларнинг умумий сони 600 га яқинлашди.
