ОАВ: РФ ва АҚШ Украина иштирокисиз ЗАЭСни бошқаришни муҳокама қилмоқда

Россия президенти Владимир Путин Россия бизнеси вакиллари билан бўлган ёпиқ учрашувда Москва ва Вашингтон Запорижжя атом электр станцияси (ЗАЭС)ни Украина иштирокисиз бошқариш масаласини муҳокама қилаётганини айтган. Бу ҳақда 25 декабр, пайшанба куни “Коммерсант” газетаси ушбу учрашувда бўлган ўз мухбирига таяниб ёзди.

Нашр маълум қилишича, Путин Америка томони ЗАЭСда майнингни ташкил этишга ҳам қизиқиш билдираётганини қўшимча қилган. Шу билан бирга, Кремл раҳбарининг сўзларига кўра, АҚШ ташаббуси билан томонлар Украинага электр энергияси “етказиб беришни кўриб чиқмоқда”.

Путин яна шундай деган: ЗАЭСда украин мутахассислар ишламоқда, аммо улар аллақачон Россия паспортларини олган.

Бир кун олдин Украина президенти Володимир Зеленский Киев ва Вашингтон келишган “асосий” тинчлик режасини эълон қилди. Ушбу режанинг бир бандига кўра, ЗАЭСни Украина, АҚШ ва Россия биргаликда эксплуатация қилиши (ҳамкорликда ишлатиши) назарда тутилган. Зеленскийнинг айтишича, Украина РФ билан тўғридан тўғри ишлашни истамайди, шунинг учун бу банд ҳали келишув босқичида турибди.

Европадаги энг йирик атом станцияси ҳисобланган ЗАЭС 6 та энергоблокдан иборат бўлиб, умумий қуввати 6000 МВт. У Энергодар шаҳри яқинида, Каховка сув омборининг (суви камайган қисми) жанубий соҳилида жойлашган.

Россия Запорижжя АЭСни 2022 йил март ойида — кенг кўламли уруш бошланганидан кўп ўтмай босиб олган ва станцияни “Росэнергоатом” АЖ бошқарувига ўтказган.

ЗАЭСнинг барча реакторлари тўхтатилган, аммо улар доимий равишда совитиб турилиши шарт. Совитиш тизими ташқи электр тармоғидан қувват олади. Агар электр таъминоти узилиб қолса, қувват дизел генераторлар орқали таъминланади.