Чоршанба тонгида Исломободдаги шифохонанинг туғруқ бўлимида келиб чиққан ёнғин оқибатида камида 14 нафар янги туғилган чақалоқ ҳалок бўлди.
Ëнғин 26 август куни эрталаб соат 07:00лар атрофида Покистон Тиббиёт фанлари институтининг (PIMS) «Оналик ва болаликни муҳофаза қилиш» бўлимида бошланган. Бу ҳақда маҳаллий нашрларга таяниб, Reuters хабар бермоқда.
Қутқарувчиларнинг сўзларига кўра, учинчи қаватдаги фожиали ёнғинга чақалоқлар хонасида кондиционернинг портлаши сабаб бўлган. Ёнғин бошланган вақтда палатада 15 нафар янги туғилган чақалоқ бўлган, улардан фақат бири қутқариб қолинган. Омон қолган ягона чақалоқни шифокор қутқариб қолган.
Маҳаллий Geo TV телеканали 15 нафар қурбон борлигини айтган бўлса, бош вазир идораси 14 чақалоқ ҳалок бўлганини тасдиқламоқда.
Қутқарув хизмати ходимлари касалхонадан камида 19 кишини қутқарган. Улар орасида 10 нафар аёл, етти нафар бола ва икки нафар эркак бор.
«BBC Urdu» хизмати касалхона расмийсидан иқтибос келтиришича, ёнғин кондиционер блокида бошланган ва кислород уланмалари орқали тезда алангаланиб кетган. Соғлиқни сақлаш вазири Мустафо Камол ёнғин содир бўлган палатадаги чақалоқлар ё инкубаторларда бўлган, ёки кислород ускуналарига уланганини айтди.
Reuters гувоҳининг сўзларига кўра, бўлим ҳудуди ўраб олинган ва касалхона биноси ташқарисида тез ёрдам машиналари тўплангани кўринган.
