Зеленский: Донбасс бўйича муроса — ҳудудга алоҳида мақом

Украина президенти Володимир Зеленский Донбасс бўйича муросавий ечим сифатида махсус қоидаларга эга эркин иқтисодий зона яратишни таклиф қилди. У буни минтақадан Украина қўшинларини олиб чиқиш шарти сифатида Американинг Fox News телеканалига берган интервюсида айтди. Интервю душанба, 29 декабр куни эълон қилинган.

Зеленский таъкидлашича, Украина Россия билан урушни тартибга солиш учун ўз ҳудудларидан воз кеча олмайди, чунки бу мамлакат қонунларига, жамият позициясига ва жойлардаги реал вазиятга зид. “Биз шунчаки ўз ҳудудларимиздан чиқиб кетолмаймиз. Бу қонунимиз доирасидан ташқари. Бу фақат қонун ҳақида эмас — у ерда одамлар яшайди, у ерда армиямиз бор”, — деди у интервюда.

Володимир Зеленский ҳудудлар масаласи тинчлик музокараларидаги энг қийин мавзу эканини тан олди. Унинг сўзларига кўра, бу — Киев ва Москва позициялари кескин фарқ қиладиган ягона банд. Президент айтишича, бу ҳудудларда ҳануз тахминан 300 минг украин яшайди, уларнинг кўпчилиги Россия босқини ва жанглардан жабр кўрган. Шу боис у ҳудудлар масаласига фақат расмий ёки соф сиёсий ёндашиб бўлмаслигини уқтирди.

“Ҳамма тинчликни хоҳлайди, лекин ҳар қандай нарх эвазига эмас. Ҳудудлардан воз кечиш бўйича референдум Украина учун ижобий натижа бермайди”, — деди у. Зеленский фикрича, Украина жамияти бундай референдумни қўллаб-қувватламайди.

Украина президенти Донбасс бўйича “реал муроса” сифатида эркин иқтисодий зона яратишни айтди: “Агар биз бир неча километрга чекинсак, Россия ҳам шундай қадам ташлаши ва ўз кучларини ҳам бир неча километрга ортга тортиши керак. Ана шу эркин иқтисодий зонада махсус қоидалар амал қилади”.

28 декабр куни Володимир Зеленский ва Доналд Трамп Флоридада музокара ўтказган. Ундан кейин Украина ва АҚШ раҳбарлари томонлар Украинадаги урушни тинч йўл билан ҳал қилиш мақсадига “жуда яқин” эканини айтган.

Зеленскийнинг сўзларига кўра, “тинчлик режасининг 20 банди 90 фоиз даражада келишилган”, АҚШ томонидан хавфсизлик кафолатлари эса тўлиқ келишиб олинган. Ўшанда Украина президенти тинчлик режасини референдумга қўйиш эҳтимолини ҳам истисно қилмаган — биринчи навбатда “ҳудудлар масаласи жуда мураккаб” экани сабабли.