«Сити» ва «Ливерпул» яна очко йўқотди, «Реал»да янги юлдуз порлади

Англия: Кучли олтиликнинг 5 вакили дуранг ўйнади

«Манчестер Сити» – «Челси» 1:1
Голлар: Рейндерс, 42 (1:0). Фернандес, 90+4 (1:1)
«Манчестер Сити»: Доннарумма, Рубен Диаш (Аке, 81), Гвардиол (Ҳусанов, 51), О`Райли, Матеус Нунес, Родри, Рейндерс (Доку, 70), Бернарду Силва, Шерки, Фоден, Ҳоланд
«Челси»: Йергенсен, Бадиашиле, Чалоба, Гюсто, Ачимпонг (Хато, 62), Фернандес, Жеймс, Палмер, Педру Нету, Эстевао (Сантос, 46), Жоао Педро (Делап, 62)
Огоҳлантиришлар: Рубен Диаш, 54. Матеус Нунес, 79. Бернарду Силва, 90 – Жеймс, 52. Делап, 79. Фернандес, 90

Учрашувдан олдин «Сити» ва «Челси» бош мураббийларининг статистикаси антиқа кўринишда эди. Гвардиола катта футболда 1011 ўйинда ишлашга улгурган, Макфарлейнда – 0. «Челси» бош мураббийи вазифасини бажарувчи мутахассис учун бу ўйин фаолиятидаги илк ва охирги ўйин бўлиб қолиши мумкин, чунки жамоа яқин кунларда янги бош мураббий номини эълон қилишга тайёрланмоқда.

Меҳмонлар учун вазият таркибдаги муаммолар туфайли янада мураккаблашди: Кайседода – дисквалификация, Кукуреля, Фофана ва Санчес – соғлиқ билан боғлиқ муаммолар туфайли ўйнай олмасди. Колуилл эса анча вақтгача сафдан чиққан. Шу туфайли, «Сити» ўйиннинг илк дақиқалариданоқ ташаббусни қўлга олгани ҳеч кимни ажаблантирмади. Аммо ўйиндаги илк хавфли зарба меҳмонлар томонидан берилди. 20-дақиқада Эстевао деярли пеналти нуқтасидан (ҳатто яқинроқдан) яхши зарба йўллади, аммо Гвардиол тўп йўлини тўсиб чиқди.

Шундан кейин эса ўйин асосан бир дарвозага бўлди. Жавоб ҳужумида Фоден гол уриш учун яхши имкониятга эга бўлди. Бироз ўтиб Ҳоланд кетма-кет хавфли зарбалар йўллади, биринчи вазиятда Йоргенсен рикошет бўлиб келган тўпни майдон ташқарисига чиқариб юборишга улгурди, иккинчисида тўп устундан қайтди. Бу оралиқда «Челси» футболчилари тўпни шунчаки жарима майдонидан узоқлаштириш билан шуғулланишар ва мезбонлар дарҳол янги ҳужумни бошлашарди. Натижада 42-дақиқада «Сити» барибир ҳисобни очди. Сўнгги турларда юқори спорт формасини намойиш этаётган Рейндерс яқин тўққизликни аниқ нишонга олди, бу вазиятда Бадяшил уни қўриқлай олмади.

Айтиш мумкинки, биринчи бўлим кичик ҳисобда якунланиши «Челси»нинг омади келгани эди. Меҳмонлар устози танаффусда ниманидир ўзгартириши зарур эди. Натижада «Челси»да ҳимояда етарлича ишламайдиган Эстевао ўрнини Сантос эгаллади.

Ва иккинчи бўлимдаги илк ҳақиқий хавфли вазиятни ҳам лондонликлар юзага келтиришди. Меҳмонларнинг қарши ҳужуми Нету жуда қулай позициядан зарба бериши билан якунланди – аммо у дарвоза қаршисида, тўққиз метр масофадан туриб тўпни юқорига тепиб юборди.

Кейин эса «Сити»да ҳам алмаштириш амалга оширилди, аммо буниси мажбурий эди, чунки Гвардиол жароҳатланди. Хорватиялик ҳимоячи майдонни оқсоқланиб, шифокорлар ва Жеймсга суянганча тарк этди. Гвардиола унинг ўрнига Абдуқодир Ҳусановни ҳимоя марказига ташлади.

«Челси» ўйиннинг охирги чорагини ўта тажовузкор ўтказа бошлади. Бу реактив Делап майдонга туширилиши билан боғлиқ. У 72-дақиқада қарши ҳужумда яхши вазиятга чиқиб борди ва зарба йўллади. Тўп Ҳусановга тегиб тезлигини пасайтирди ва Доннарумма учун осон ўлжага айланди. Кейин эса у туфайли майдонда кичик жанжал юзага келди. У навбатдаги қарши ҳужумда дарвозабон билан яккама-якка вазиятга чиқиб бориши мумкин эди, аммо Ҳусанов уни зарарсизлантиришга эришди, ҳужумчи эса тўпни йўқотганидан кейин ўзбекистонлик ҳимоячини туртиб юборди. Воқеа жойига «Сити» футболчиларидан бир гуруҳи етиб келиб, унинг ўзига ҳужум қилишди.

Бу можаро ҳисобни тенглаштириши талаб этилган меҳмонларнинг яна бир неча дақиқасини ўғирлади.

Ўйиннинг 89-дақиқасида меҳмонлар яна иккита имкониятдан фойдалан олишмади, аввалига Палмер, кейин эса Делап жарима майдони ичида туриб тўпни тўғри тепа олмади. Шундан кейин «Сити» ғалабали ҳисобни сақлаб қоладигандек кўринаётганди, аммо АПЛнинг бу мавсумида ва айниқса бу турида қўшимча дақиқаларда кўп ишлар содир бўлмоқда. Бу сафар қўшимча дақиқаларда «Челси» Фернандеснинг голи эвазига мағлубиятдан қутулиб қолди. 90+4-дақиқада аргентиналик яримҳимоячи учинчи уринишда дарвоза тўрини ишғол этди. Лондонликлар Энцо Мареска истеъфога чиқарилганидан кейинги илк ўйинда, дисквалификациялар ва жароҳатлар туфайли асосий етакчиларисиз ўйнаган ҳолда «Сити»ни муҳим ғалабадан маҳрум этди.

«Челси» қимматли бир очко эвазига «МЮ»га етиб олиб, тўплар нисбатидаги устунлик туфайли қувиб ҳам ўтди. «Сити» эса қаторасига икки дурангдан кейин (ўтган турда «Сандерленд» билан 0:0) энди пешқадам «Арсенал»дан олти очкога ортда қолмоқда.

«Лидс» – «Манчестер Юнайтед» 1:1
Голлар: Ааронсон, 62 (1:0). Куня, 65 (1:1)
«Лидс»: Перри, Бийол, Стрейк, Борнау (Танака, 80), Ааронсон (Пиру, 87), Штаҳ, Груев (Нионто, 80), Гудмундссон, Жастин, Калверт-Люин, Окафор (Нмеча, 75)
«Манчестер Юнайтед»: Ламменс, Ҳевен, Мартинес, Йоро (Зиркзе, 63), Каземиро, Угарте, Шоу, Далот, Куня, Доргу, Шешко
Огоҳлантириш: Доргу, 34

Бир неча кун олдин «Лидс» ҳимояси «Ливерпул» ҳужумчиларини тўхтата олганди (0:0) ва декабр ойи бошида бошланган мағлубиятсиз сериясини давом эттирганди. «Элланд Роуд» ўйингоҳида «МЮ»га ҳам осон кечмади. Матеус Кунянинг тезкор голи Шешкодаги офсайд ҳолати туфайли бекор қилинди, кейин эса «қизил иблислар» ўйинидан кескинлик йўқолиб қолди. Биринчи бўлим мезбонлар устунлигида якунланиши ҳам мумкин эди, аммо Калверт-Люиннинг зарбасидан кейин тўп устунга тегди. Иккинчи бўлимда эса «Лидс»нинг бошқа футболчиси Аронсон ўз имкониятидан фойдаланди. «Юнайтед» майдон марказида тўп йўқотди, Ҳевен эса америкалик яримҳимоячини ўтказиб юборди.

Лекин бу гол меҳмонларга ижобий таъсир кўрсатди ва жамоа уйғонди. Рубен Аморим ҳам Зиркзени майдонга тушириш орқали топқирлик қилди. Нидерландиялик ҳужумчи қаторасига иккинчи турда голли ҳаракат амалга оширмоқда. Ўтган турда у «Вулверҳэмптон»га қарши ўйинда (1:1) ҳисобни очганди, энди эса майдонга тушганидан икки дақиқа ўтар ўтмас Куняни дарвозабон билан яккама-якка ҳолатга чиқариб юборди. «МЮ» ўтказиб юборилган голга уч дақиқа ичида жавоб қайтарди, аммо тарози палласини ўз томонига оғдира олмади. Жамоа сафардан мағлубият билан қайтиши ҳам мумкин эди, аммо Окафорнинг қайчи услубидаги зарбасидан кейин Ламменс қаҳрамонлик кўрсатди. Натижада «қизил иблислар» вақтинчага бўлса ҳам «Ливерпул»ни қувиб ўтолмади ва кучли тўртликдан ташқарида қолди.

«Фулҳэм» – «Ливерпул» 2:2
Голлар: Уилсон, 17 (1:0). Вирц, 57 (1:1). Гакпо, 90+4 (1:2). Рид, 90+7 (2:2)
«Фулҳэм»: Лено, Андерсен, Куэнка, Диоп, Кэрни (Берге, 74), Лукич (Рид, 90+2), Робинсон, Кастан, Уилсон (Траоре, 85), Смит-Роу (Кевин, 74), Хименес (Куси-Асаре, 85)
«Ливерпул»: Алиссон, ван Дейк, Конате, Керкез, Брэдли, Жонс (Киеза, 85), Гравенберҳ, Макаллистер, Вирц (Фримпонг, 76), Собослаи, Гакпо (Гомес, 90+6)
Огоҳлантиришлар: Уилсон, 71 – Гакпо, 90

Мерсисайдликларнинг «Фулҳэм» билан ўйини трибунадаги мухлислардан бирига тиббий ёрдам кўрсатилгани туфайли кечикиш билан бошланди. Ҳакамнинг ўйин бошлангани ҳақидаги ҳуштаги чалинганида эса «Ливерпул»да Экитике сафдан чиққани маълум бўлди. Унинг ўрнига ҳужум марказига туширилган Гакпо бир неча вазиятларни йўққа чиқарди, мерсисайдликлар тарбияланувчиси Уилсон эса ўз имкониятидан фойдаланди. У Хименеснинг узатмасидан кейин мезбон жамоа ҳимоячилари қўйишга уринган офсайд қопқонига тушмади ва дарвозанинг олис бурчагини аниқ нишонга олиб, Алиссонга ҳеч қандай имкон қолдирмади.

Арне Слот жамоаси фақат иккинчи бўлимга келиб ўйинда бурилиш ясади ва Вирц АПЛдаги иккинчи голини нишонлади. Унинг голи VAR орқали кўриб чиқилди ва якунда инобатга олинди.

Ўйинга қўшиб берилган дақиқаларда Гакпо барибир ўз мақсадига эришди ва голини футболкасини ечиб ташлаган ҳолда нишонлади. Аммо бу гол меҳмонларга ғалаба келтира олмади. Слот гол урган ҳужумчисини захирага олиб, ўрнига ҳимоячи туширди, мезбонлар эса Риднинг «тўққизлик»ка аниқ йўллаган зарбаси орқали сўнгги дақиқаларда мағлубиятдан қутулиб қолди. Ҳолбуки бу нуқтадан гол уриш эҳтимоли 0,04 xG этиб баҳоланганди.

«Ливерпул» қаторасига икки дурангдан кейин ҳам кучли тўртликда қолди, аммо пешқадам «Арсенал» билан орадаги фарқ энди 14 очкони ташкил этмоқда.

«Нюкасл Юнайтед» – «Кристал Пэлас» 2:0
Голлар: Гимарайнс, 71 (1:0). Тшау, 78 (2:0)
«Нюкасл Юнайтед»: Поуп, Шер, Тшау, Ҳолл (Ливраменто, 63), Майли, Тонали (Рэмси, 63), Жоэлинтон, Гимарайнс, Гордон (Барнс, 63), Мёрфи (Уиллок, 88), Висса (Волтемаде, 78)
«Кристал Пэлас»: Ҳендерсон, Лакруа, Геҳи, Лерма (Канво, 38), Ҳюз, Уортон (Дрейкс-Томас, 87), Митчелл, Клайн (Девенни, 52), Пино (Родни, 87), Жонсон (Уче, 72), Матета (Эсс, 87)
Огоҳлантиришлар: Гордон, 62 – Жонсон, 33. Митчелл, 49. Геҳи, 55

«Нюкасл» учун турнир жадвалида ўзидан юқорида турган жамоалар устидан ғалаба қозониш жуда муҳим эди ва якшанба куни «қарғалар»«Кристал Пэлас»ни мағлуб этиб, ниҳоят турнир жадвалининг биринчи ярмига қайтди. Лондонликлар фақат иккинчи бўлимнинг иккинчи қисмида таслим бўлди – жарима майдонига диагонал узатма Майли тўпни дарвозабон ҳудудига ошириши ва у ерда турган Бруно Гимараэс мавсумдаги еттинчи голини уриши билан якунланди. Бразилиялик футболчи АПЛда сермаҳсуллик борасида яримҳимоячилар орасида фақат Бруну Фернандешдан ортда (12) ва Райс билан иккинчи ўринни бўлишиб турибди. Бироз ўтиб ҳимоячи Тшау Эдди Ҳау жамоасининг устунлигини мустаҳкамлади. Параллел ўйинда эса «Тоттенҳэм» ва «Сандерленд» ўзаро дуранг ўйнаши ҳам «Нюкасл» фойдасига хизмат қиди. Энди «қарғалар» тўққизинчи ўринда, аммо Чемпионлар лигасига йўлланма берувчи тўртинчи ўрингача фарқ беш очкони ташкил этмоқда.

Испания: «Реал»нинг Мбаппесиз ҳаёти

«Реал» – «Бетис» 5:1
Голлар: Г. Гарсия, 20 (1:0). Г. Гарсия, 50 (2:0). Раул Асенсио, 56 (3:0). Эрнандес, 66 (3:1). Г. Гарсия, 82 (4:1). Ф. Гарсия, 90+3 (5:1)
«Реал»: Куртуа, Раул Асенсио, Рюдигер (Ф. Гарсия, 89), Каррерас, Валверде, Камавинга, Тшуамени (Себалйос, 81), Беллингҳэм, Родриго (Арда Гулер, 77), Винисиус Жуниор (Мастантуоно, 77), Г. Гарсия (Менди, 89)
«Бетис»: Валес, Натан, Бартра, Родригес, Ортис (Беллерин, 46), Деосса (Ло Селсо, 46), Рока (Алтимира, 67), Пабло Форналс, Руибал (Рикелме, 67), Антони (П. Гарсия, 88), Эрнандес
Огоҳлантиришлар: Винисиус Жуниор, 53 – Ортис, 19

«Реал» декабр охирида ўзининг асосий ҳужумчиси Мбаппени йўқотди. Тиззасидан жароҳатланган Килиан камида уч ҳафтага сафдан чиққан ва Испания Суперкубоги учун ўйинни ўтказиб юбориши аниқ. Ҳолбуки бу Ҳаби Алонсонинг «Қироллик клуби»даги келажаги учун ҳал қилувчи ўйин деб ҳисобланмоқда. Якшанба оқшомидаги ўйинда эса мадридликлар мураббийи, худди клублар ўртасидаги жаҳон чемпионатида бўлгани каби Гонсало Гарсияга имкон берди.

Ёш форвард эса бундан фойдаланди ва Родригонинг жарима зарбасидан берган узатмасини бош билан голга айлантириб, чемпионатдаги илк голини нишонлади. Иккинчи бўлимда эса Гонсало «Сантяго Бернабеу»да йиғилган мухлислардан олқишлар қабул қилиб олди. У жарима майдони чизиғи яқинида Валверденинг узатмасидан кейин тўпни кўкраги билан тўхтатиб олиб, иккинчи тегинишда тўпни ерлатиб бурчак томон аниқ йўналтирди. Кўп ўтмай «Реал»нинг бошқа бир тарбияланувчиси Раул Асенсио Родригонинг бурчакдан узатмасидан кейин ҳисобни йириклаштирди.

Аммо бу ҳали ҳаммаси эмасди. Қайсидир паллада мадридликлар бўшашишди ва Эрнандесдан гол ўтказиб юборди. Меҳмонлар шундан кейин ўйинда бурилиш ясаши ҳам мумкин эди. Аммо Куртуанинг сейви ҳамда икки зарба дарвоза тўсини ва устунга тегиши бунга йўл қўймади. Шундан кейингина мезбонлар ўзига келишди ва Арда Гулер дарвозабон ҳудудида очилган Гонсало Гарсияни тўп билан таъминлади, у эса товонида йўллаган зарбаси билан ҳет-трикни расмийлаштирди.

Ўйиндаги охирги гол ҳам академия футболчиси томонидан урилди, захирадан тушган Фран Гарсия ҳисобни янада йириклаштирди. Бу ғалабадан кейин мадридликлар турнир жадвалида «Барселона» билан тўрт очколик фарқни тиклашди.

«Реал Соседад» – «Атлетико» 1:1
Голлар: Серлот, 50 (0:1). Гонсалу Гедеш, 55 (1:1)
«Реал Соседад»: Ремиро, Чалета-Цар, Хон Мартин, Гомес, Арамбуру, Туррентес (Марин, 72), Солер, Гонсалу Гедеш (Барренечеа, 72), Кубо (Захарян, 89), Ойярсабал, Мендес (Оскарссон, 88)
«Атлетико»: Облак, Ганцко, Пубил, Руджери (Ле Норман, 46), Лиоренте, Коке (Распадори, 72), Барриос (Галлаҳер, 46), Баэна (Кардозо, 60), Симеоне, Серлот, Алварес (Гризманн, 60)
Огоҳлантиришлар: Гонсалу Гедеш, 13. Чалета-Цар, 45. Ойярсабал, 75 – Руджери, 44. Распадори, 78

Биринчи даврадан кейин «Реал Соседад» бош мураббийлигига тайинланган Пеллегрино Матараццо дебют учун ўта ноқулай рақибга дуч келди. Ўйиндаги асосий воқеалар иккинчи бўлимнинг дастлабки 15 дақиқалигига тўғри келди. Аввалига Серлот Жулиано Симеоненинг идеал узатмасидан кейин ҳисобни очди, беш дақиқа ўтиб Гонсалу Гедеш мувозанатни тиклади. Португалиялик яримҳимоячи Кубо ижросидаги шведка услубида берилган пасни йўққа чиқара олмасди. Ўйиннинг охирги қисмида ғалаба исталган томонга ўтиб кетиши мумкин эди. Аввалига мезбонлар посбони Ремиро Гризманн билан дуэлда устун келди ва рақибининг тўпни ўз устидан ошириб ташлашига йўл қўймади. Ҳакамнинг ўйин якунлангани ҳақидаги ҳуштаги чалиниши арафасида эса Барренечеанинг зарбасидан кейин тўп устуннинг ёнгинасидан ўтиб кетди. Матараццонинг дебюти ғалабали чиқмаган бўлса-да, рақибни ҳисобга олганда натижа ёмон эмас. «Атлетико» эса бу дурангдан кейин учинчи ўринга қайта олмади ва қўшимча кўрсаткичларга кўра «Вилярреал»дан ортда қолмоқда.