«Сити»да ғалабасиз серия, «Барса» жавобсиз 5 та гол урди. Кун ўйинлари

Англия: «Арсенал»нинг рақобатчилари чекинмоқда

«Манчестер Сити» – «Брайтон» 1:1
Голлар: Ҳоланд, 41 – пеналти (1:0). Митома, 60 (1:1)
«Манчестер Сити»: Доннарумма, Ҳусанов, Аллейн, Аке (О`Райли, 73), Матеус Нунес (Люис, 73), Гонсалес (Родри, 64), Рейндерс, Фоден (Шерки, 73), Доку, Бернарду Силва, Ҳоланд
«Брайтон»: Вербрюгген, Данк, ван Ҳекке, Де Кейпер, Ҳиншелвуд, Айяри (Милнер, 83), Грос, Гомес (Груда, 77), Митома (Уотсон, 83), Ферди Кадиўғли, Рюттер (Уэлбек, 77)
Огоҳлантиришлар: Доннарумма, 60 – Данк, 29. Грос, 41. ван Ҳекке, 53. Де Кейпер, 60. Митома, 69. Уотсон, 89

«Манчестер Сити» олдинги икки турда кетма-кет дуранг қайд этгач («Сандерленд» билан 0:0, «Челси» билан 1:1), чемпионлик пойгасидаги позициясини ёмонлаштирди, бу ҳам етмаганига асосий ҳимоячилари Йошко Гвардиол ва Рубен Диашдан айрилди. Натижада, клуб раҳбарияти «Уотфорд»дан ёш ҳимоячиси Макс Аллейнни муддатидан олдин қайтарди ва «Брайтон»га қарши ўйиннинг бошланғич таркибига киритди, шунингдек, Абдуқодир Ҳусанов анчадан буён илк бор АПЛ ўйинида стартдан жой олди.

Ва «Манчестер Сити» иккинчи даврадаги ўйинда ҳам «чайкачилар» мудофаасини бузиб ўтишга қийналди, Жереми Доку, Бернарду Силва ва Эрлинг Ҳоланд ўз имкониятларидан фойдалана олмади. Фақат бўлим охирида Гомеснинг ортиқча жонбозлиги меҳмонларга панд берди, у ҳимоячиларга ёрдам бериш учун жарима майдонига қайтди ва Докуга қарши эҳтиётсиз ҳаракат қилди. VAR аралашуви билан белгиланган пеналтини Ҳоланд аниқ ижро этиб, «Сити» сафидаги 150-голини урди.

Иккинчи бўлимда эса «шаҳарликлар» вазиятларни йўққа чиқаришда давом этди ва ҳисобдаги устунликни мустаҳкамлай олмади, бу эса Митома ҳисобни тенглаштиришига олиб келди. Япониялик вингер кўп ўтмай жамоасини олдинга олиб чиқиши ҳам мумкин эди, аммо бу сафар омад мезбонларга кулиб боқди. Кейин эса Ферди Кадиўғли дарвозага кириб кетаётган тўпни тўхтатди.

Мезбонлардаги энг қулай имконият эса рақиб жарима майдони ичида қўпол хатога йўл қўйиб, тўп йўқотганида юзага келди. Шерки Ҳоландни жуда қулай позицияга чиқарди, аммо ҳужумчи тўпни дарвозабон турган нуқтага қарата тепди. Эрлингнинг кейинги зарбасини эса ван Ҳекке тўсиб қолди. Пепда қатоасига учинчи ўйинда дуранг, турнир жадвалидаги вазият эса пайшанба оқшомида «Арсенал» ва «Ливерпул» ўртасида Лондонда кечадиган ўйиндан кейин ойдинлашади. Мезбонлар ғалаба қозонгудек бўлса, энг яқин таъқибчилар билан орадаги фарқ 8 очкога етади.

Ўйиндан кейин Пеп Гвардиола Абдуқодир Ҳусанов ҳақида илиқ фикрлар билдирди: «Макс билан тандемда ажойиб ўйин кўрсатишди. Ҳуса жуда зўр ўйнади; орқадан узун паслар билан бизга ёрдам берди. Ҳусанов бутун майдондаги кенгликни назорат қила олади, жуда тез. У ҳали улғайиб, янада жасурлашади ва жараёнга, ўйинга кўпроқ жалб этилади. Бу вақт масаласи. Ҳимояда у энг юқори даражада».

«Кристал Пэлас» – «Астон Вилла» 0:0
«Кристал Пэлас»: Ҳендерсон, Лакруа, Геҳи, Канво, Ҳюз, Уортон, Митчелл, Девенни (Соса, 90), Пино, Жонсон, Матета
«Астон Вилла»: Мартинес (Бизот, 46), Линделёф, Конса, Дин (Матсен, 73), Кэш, Тилеманс, Камара (Богард, 82), Макгинн (Мален, 73), Роджерс, Санчо (Буэндия, 65), Уоткинс
Огоҳлантиришлар: Жонсон, 67. Митчелл, 83

Чемпионлик пойгасидаги яна бир жамоа «Астон Вилла» ҳам бу турда очко йўқотди. Лондонда «Кристал Пэлас»га қарши кечган ўйинда ҳисоб очилмади – 0:0. Бу Унаи Эмери жамоаси учун сўнгги 16 ўйиндаги учинчи ғалабасиз ўйин бўлди. Натижада бирмингҳэмликлар учинчи ўринда қолди.

«Фулҳэм» – «Челси» 2:1
Голлар: Ҳименес, 55 (1:0). Делап, 72 (1:1). Уилсон, 81 (2:1)
«Фулҳэм»: Лено, Андерсен, Куэнка (Кевин, 46), Диоп, Кэрни (Сессенон, 73), Берге, Робинсон (Лукич, 73), Кастан, Уилсон (Траоре, 90+1), Смит-Роу (Рид, 83), Ҳименес
«Челси»: Санчес, Адарабиойо, Чалоба, Кукуреля, Гюсто (Ачимпонг, 76), Сантос (Ҳато, 28), Кайседо, Фернандес (Жеймс, 65), Педру Нету, Палмер (Жоао Педро, 75), Делап
Огоҳлантиришлар: Куэнка, 45. Кастан, 78. Ҳименес, 90 – Фернандес, 24. Адарабиойо, 25. Палмер, 25
Четлатиш: Кукуреля, 22

Лиам Росениорнинг «Челси» бош мураббийи лавозимидаги дебюти қизил карточка туфайли барбод бўлди.

Меҳмонлар 22-дақиқадаёқ озчилик бўлиб қолишди, «Фулҳэм» дарвозабони Лено узун узатма билан жамоадошларини олдинга бошлаганида Кукуреля дарвозабон билан яккама-якка вазиятга чиқиб кетиши мумкин бўлган Уилсонни жарима майдони чизиғи устида ушлаб қолди.

Арбитр меҳмон жамоа футболчиларининг эътирозларига қарамай, қарорини ўзгартирмади ва баҳслашгани учун уч футболчига сариқ карточка кўрсатди. Бўлим охирида мезбонлар дарвозани ишғол этишди, аммо ҳужум бошланишида Ҳименесдаги кичик офсайд ҳолати туфайли Уилсоннинг голи бекор қилинди.

Иккинчи бўлимда эса ушбу мексикалик ҳужумчи Бергенинг узатмасига идеал тарзда очилиб, Чалобадан илдамроқ ҳаракат қилди ва боши билан тўпни дарвозанинг пастки бурчаги томон йўналтирди. Делап эса яккама-якка вазиятда тўпни Ленонинг устидан ошириб ташлай олмади. Кўп ўтмай ушбу ҳужумчи кўп ўтмай чемпионатдаги илк голини уриб, мувозанатни тиклади. Аммо бу гол билан ўйинда бурилиш ясалмади. Аксинча, мезбонлар Уилсон шу оқшом ҳақли бўлган гол эвазига ғалабани илиб кетишди. Ҳозирча Энцо Маресканинг истеъфоси дарҳол эффект бермаяпти.

«Бёрнли» – «Манчестер Юнайтед» 2:2
Голлар: Ҳевен, 13 – автогол (1:0). Шешко, 50 (1:1). Шешко, 60 (1:2). Энтони, 66 (2:2)
«Бёрнли»: Дубравка, Эстев, Ҳамфрис, Лоран, Угочукву, Флорентину, Лукас Пирес, Уокер, Эдвардс (Сонне, 90+2), Межбри (Энтони, 58), Бройя (Фостер, 76)
«Манчестер Юнайтед»: Ламменс, Мартинес, Ҳевен (Йоро, 61), Шоу, Далот, Каземиро (Майну, 74), Угарте (Лэйси, 84), Бруну Фернандеш (Маунт, 61), Куня (Зиркзе, 74), Доргу, Шешко
Огоҳлантиришлар: Межбри, 41. Фостер, 90

Рубен Аморим истеъфога чиқарилиши ва ўрнига Даррен Флетчер тайинланиши ҳам ҳозирча «МЮ»га натижа келтирмаяпти. Аммо ўйиндаги ўзгаришлар кўзга ташлана бошлади. Биринчидан, «қизил иблислар» португалиялик мутахассис ўжарлик билан қўллашда давом этган 3-4-3 схемасидан воз кечилди. Иккинчидан, ниҳоят Шешко трансферини оқлай бошлади. Словениялик ҳужумчи дублни расмийлаштирди ва унинг биринчи голига жароҳат туфайли 21 декабрдан буён илк бор майдонга қайтган Бруну Фернандеш ассистентлик қилди. Кейин эса Шешко Доргунинг узатмасидан кейин тўпни тўхтатмасдан дарвоза тўрига йўллади. Аммо манкунианликларга барибир нимадир етишмаяпти. Гоҳ мудофаадаги ишончли ўйин, гоҳ ҳужумларни якунлашдаги аниқлик. Масалан, Бруну аввалига қулай имкониятдан фойдалана олмади, кейин эса унинг бурчакдан узатмасини Ҳевен дарвоза устуни олдида турган ҳолда хато зарба берди ва автогол учун айбини юва олмади. Ўйин охирида майдонга туширилган 18 ёшли Лэйси «МЮ»га ғалаба олиб келиши мумкин эди – аммо дебютантнинг зарбасидан кейин тўп тўсинга тегди.

«Брентфорд» – «Сандерленд» 3:0
Голлар: Тиаго, 30 (1:0). Тиаго, 65 (2:0). Ярмолюк, 73 (3:0)
Аниқ ижро этилмаган пеналти: Ле Фе, 60’
«Брентфорд»: Келлеҳер, Айер, Коллинз, Ҳенри, Кайоде (Ҳики, 82), Ярмолюк, Янелт, Люис-Поттер (Дамсгор, 61), Шаде, Йенсен (Ҳендерсон, 76), Тиаго (Нелсон, 82)
«Сандерленд»: Руфс, Баллард (Киркин, 79), Мукиеле, Алдерете (О`Найен, 83), Ҳюм, Гертрейда (Нил, 79), Жака, Ле Фе, Адингра (Майенда, 52), Ригг (Мандл, 52), Бробби
Огоҳлантиришлар: Тиаго, 43. Янелт, 63 – Ҳюм, 45

Фаворитлар очко йўқотишидан фойдаланган «Брентфорд» бешинчи ўринга кўтарилиб олди. «Асаларилар» таркибдаги муаммолар туфайли пастлашда давом этаётган «Сандерленд» мудофаасини яксон этишди. Бу жараённинг энг фаол иштирокчиси эса ўтган турдаги ҳет-трик ортидан бу ўйинда дубл қайд этган Игор Тиаго бўлди, ушбу ҳужумчи энди жорий мавсумдаги голлари сонини 16 тага етказиб олди ва бразилиялик футболчиларнинг АПЛдаги рекордини янгилади (бунгача Роберто Фирмино, Габриэл Мартинелли ва Матеус Куня бир мавсумда кўпи билан 15 тагача гол уришган).

Ушбу тўпурар форвард ўтган ёзда Тоуни ўрнига «Брюгге»дан сотиб олинган, аммо биринчи мавсумида жароҳат туфайли кўп ўйинларни ўтказиб юборганди. Мураббийлар штаби эса уни янги мавсум учун оптимал ҳолатга келтиришди ва у билдирилган ишончни оқламоқда. Кейт Эндрюс эса «Тоттенҳэм»га кетган Томас Франкка муносиб ўринбосар бўлиб чиқди. Ирландиялик мутахассис раҳбарлигида «асаларилар» ЕЧЛ ўринлари учун курашга қўшилди – кучли тўртликни ёпиб турган «Ливерпул» билан орадаги фарқ атиги бир очко.

«Нюкасл Юнайтед» – «Лидс» 4:3
Голлар: Ааронсон, 32 (0:1). Барнс, 36 (1:1). Калверт-Люин, 45+5 – пеналти (1:2). Жоэлинтон, 54 (2:2). Ааронсон, 79 (2:3). Гимарайнс, 90+1 – пеналти (3:3). Барнс, 90+12 (4:3)
«Нюкасл Юнайтед»: Поуп, Шер (Рэмси, 76), Тшау (Ботман, 46), Ҳолл, Майли, Тонали (Ливраменто, 46), Жоэлинтон, Гимарайнс, Гордон (Мёрфи, 81), Барнс, Волтемаде (Висса, 75)
«Лидс»: Перри, Бийол, Стрейк, Родон (Борнау, 90+7), Ампаду, Штаҳ (Окафор, 80), Груев (Танака, 90+7), Гудмундссон, Жастин, Ааронсон (Нионто, 90+7), Калверт-Люин (Нмеча, 87)
Огоҳлантиришлар: Тшау, 7. Гордон, 45. Жоэлинтон, 45 – Калверт-Люин, 22. Ампаду, 90

Чоршанба оқшомидаги энг шиддатли тўқнашув – «Сент-Жеймс Парк»да кечди, «Нюкасл» ва «Лидс» ўйин давомида қувлашмачоқ ўйнади, аммо якунда мезбонлар драматик ғалабага эришишди. «Қарғалар» уч бор ҳисобда ортда қувишди, аммо учтадан кўпроқ гол уриш имкониятига эга бўлган ва бу имкониятдан фойдалана олмаган «Лидс» якунда мағлубиятга учради (Поуп тўпга чиқишда хатога йўл қўйганида, Жастиннинг зарбасидан кейин тўп тўсинга тегди, ҳозирда гол машинасини эслатаётган Калверт-Люин эса қайтган тўпни дарвозага киритиб юбора олмади).

Мезбонлар охиригача курашишди ва ўйинга қўшиб берилган дақиқаларда Бруну Гимараэс пеналтидан ҳисобни тенглаштирди. Бу вазиятда шу куни икки гол урган Аронсон ўз жамоаси жарима майдони ичида тўпни қўли билан ўйнаганди. Қўшиб берилган дақиқалар охирида эса (90+12) Барнс ғалаба голини урди. Бу АПЛ тарихида энг кеч урилган ғалаба голига айланди, натижада Эдди Ҳау жамоаси «МЮ» ва «Челси»ни қувиб ўтиб, олтинчи ўринга кўтарилди.

«Борнмут» – «Тоттенҳэм» 3:2
Голлар: Тел, 5 (0:1). Эванилсон, 22 (1:1). Крупи, 36 (2:1). Палиня, 78 (2:2). Семенио, 90+5 (3:2)
«Борнмут»: Петрович, Крупи (Брукс, 64), Кук, Семенио, Сенеси, Скотт, Таверние (Диаките, 87), Трюффер, Ҳилл, Хименес (Адли, 87), Эванилсон (Унал, 64).
«Тоттенҳэм»: Викарио, Бергвалл (Одобер, 57), Бентанкур (Грей, 86), ван де Вен, Коло-Муани (Ришарлисон, 67), Палиня, Порро, Ромеро, Симонс, Спенс, Тел.

«Борнмут» ўз уйида «Тоттенҳэм»ни мағлуб этди – 3:2, ғалаба голини Антуан Семенио 90+5-дақиқада урди. Ўйин Матис Телнинг бешинчи дақиқадаги голи билан бошланганди, аммо мезбонлар биринчи бўлимнинг ўзида вазиятни ўз томонига оғдира олишди: аввалига Эванилсон Таверненинг узатмасидан кейин бош билан аниқ зарба берди, кейин эса Эли Крупи Маркос Сенесининг қанотдан узатмасини голга айлантирди.

Иккинчи бўлимда Палиня қайчи услубидаги зарбаси билан мувозанатни тиклади.

Ўйин дурангга қараб кетаётганди, аммо шу куни жамоа сафидаги сўнгги ўйинида майдонга тушган Семенио жарима майдони ташқарисидан чиройли гол уриб, «Манчестер Сити»га кетишидан олдин мухлислар билан чиройли хайрлашди: қўшимча дақиқада, ўз туғилган кунида ва ғалаба келтирган гол.

Бу орқали «Борнмут» 11 ўйин давом этган ғалабасиз сериясига якун ясаб, АПЛнинг энг томошабоп жамоаси мақомини (ушбу жамоа иштирокидаги ўйинларда ўртача 3,52 гол урилмоқда) мустаҳкамлади. Сўнгги 12 ўйинда атиги икки ғалабага эришган «Тоттенҳэм» турнир жадвалининг 14-поғонасида қолмоқда.

Ушбу жамоа бош мураббийи Томас Франк эса ўйиндан олдин «Арсенал» логотипи акс этган стаканда қаҳва ичаётгани акс этган фотоси муҳокамалар марказига чиқди. Ижтимоий тармоқдагилар, бу сурат унинг истеъфосига қўшимча туртки бўлишини айтиб, ҳазил қилишмоқда.

«Барса» финалга чиқди

«Барселона» – «Атлетик» 5:0
Голлар: Торрес, 22 (1:0). Фермин Лопес, 30 (2:0). Баржи, 34 (3:0). Рафиня, 38 (4:0). Рафиня, 52 (5:0)
«Барселона»: Х. Гарсия, Кубарси, Э. Гарсия, Балде (Мартин, 64), Кунде, Педри (Ямал, 72), де Йонг (Бернал, 64), Рафиня (Рэшфорд, 65), Фермин Лопес, Баржи (Олмо, 72), Торрес
«Атлетик»: Симон, Вивиан, Паредес, Бойро (Лекуэ, 57), Аресо, Ҳаурегисар, Рего (Санчес, 61), Сансет (Руис де Галаррета, 54), Наварро (Гомес, 54), Беренгер, Иняки Уилямс (Гурусета, 54)

Испанияда янги анъана пайдо бўлди – Испания Суперкубоги ўйинлари қишда, Саудия Арабистонида ўтказилмоқда. Мини-турнирда тўрт жамоа ўйнайди, турнир битта ўйиндан иборат яримфинал босқичидан бошланади.

Айтиш мумкинки, қуръада «Барселона»нинг омади келганди: инқироз давридаги «Атлетик» «Реал» ёки «Атлетико»дан анча осонроқ рақиб.

Ханси Флик Ямални захирада қолдирди. Diario Sport маълумотига кўра, Ламин кичик шикастланиш туфайли охирги машғулотларни ўтказиб юборган ва Флик уни финал учун асраган. Ямал ўрнига ҳужумнинг ўнг қанотида бошқа бир истеъдодли футболчи – 20 ёшли Руни Баржи туширилди.

«Атлетик» илк дақиқаларданоқ «Барса»га жиддий жанг таклиф қилмоқчи эканини кўрсатиб, бир неча қизиқарли ҳужумлар уюштирди. Аммо кейин тўп каталонияликларга ўтди ва 16 дақиқа ичида ўйин тақдири ҳал бўлди: 22-дақиқадан 38-дақиқагача бўлган оралиқда тўртта гол урилди. Фермин Лопес ўзи битта гол уриб, икки голга узатма берди, Рафиняда 1+1, Руни ва Торрес ҳам биттадан гол уришди. Фермин Торрес ўтган турда «Эспанёл»га қарши ўйинда (2:0) захирадан тушиб, икки голли узатмага муаллифлик қилганди. У барча турнирлар доирасидаги жами 14 гол билан «Барселона»нинг энг яхши тўпурари бўлиб турибди. Ундан кейин Рафиня (10), Ямал (9) ва асосий таркибни узил-кесил унга бой берган Левандовски (9) жойлашган.

Танаффусдан кейин «Барса» биргина гол билан чекланди. Рафиня Баржининг саъй-ҳаракатлари билан дублни расмийлаштирди. Ўйиннинг сўнгги йигирма дақиқасида Ямал ҳам майдонда кўриниш берди: у бир неча бор ўз услубида (бутсасининг ташқи қисми билан) узатмалар берди, аммо гол урмади. Жамоа усиз ҳам барчасини ҳал қилиб бўлганди – 5:0.

«Барселона» осонлик билан финалга чиқди ва рақибини кутмоқда. Рақиб 8 январ кунги «Реал» ва «Атлетико» баҳсида маълум бўлади. Финал 11 январга белгиланган.