Киев Донбассда эркин иқтисодий зона ташкил этиш таклифини ўрганмоқда

Украина эҳтимолий ярашув (оташкесим)дан кейин Донбассда эркин иқтисодий зона (ЭИЗ) ташкил этиш ҳақида АҚШ таклиф қилган режани кўриб чиқмоқда, деди Украина президенти Володимир Зеленский Bloomberg агентлигига берган интервюсида. Унинг таъкидлашича, бу режани амалга ошириш Россия томонидан ҳам симметрик қадамларни талаб қилади ва Украина ичида кенг муҳокамани тақозо этади.

Қўшинлар олиб чиқилгандан кейин озод этилган ҳудудларда ташкил этилиши мумкин бўлган зона махсус ҳуқуқий ва солиқ режими асосида ишлайди. “Формат мураккаб, аммо адолатли”, — дея қайд этди Зеленский.

Украина президенти, шунингдек, муқобил сценарийни ҳам тилга олди: у қўшинлар олиб чиқилмасдан жангларни тўхтатишни, кейин эса баҳсли масалаларни дипломатик йўл билан ҳал этишни назарда тутади. Бироқ Зеленскийнинг айтишича, Россия ҳаракатлари Кремлнинг ҳақиқий дипломатияга тайёр эмаслигини кўрсатмоқда.

Бундан ташқари, Володимир Зеленский Украина ҳеч қачон босиб олинган ҳудудларни Россияники деб тан олмаслигини таъкидлади — ҳатто тўлиқ суверенитетни тиклаш келажакда амалга ошса ҳам. Унинг сўзларига кўра, Украина томони ҳудудлар бўйича таклифларга доир ўз изоҳларини Америка жамоасига етказган ва энди Москвадан жавоб кутиб турибди.

Европа етакчиларининг Москва билан мулоқотни қайта тиклаш зарурлиги ҳақидаги сўнгги баёнотлари тўғрисидаги саволга жавобан Зеленский бундай алоқаларга қарши эмаслигини айтди. “Мен Европанинг Россия билан гаплашишига қарши эмасман, айниқса ҳозир — АҚШ томонидан босим бор пайтда ва Европа хавфсизлик кафолатлари ҳақида гапира бошлаганида. Биз якуний босқичга яқинлашяпмиз, ҳатто ҳозирча у айнан қандай кўриниш олишини билмасак ҳам”, — деди Украина президенти.