Трамп Макронга 200 фоизлик бож киритиш билан таҳдид қилди

АҚШ президенти Доналд Трамп Франция президенти Эмманюэл Макронга француз вино ва шампанларига 200 фоизлик бож киритиш билан таҳдид қилди.

Трамп журналистлар Макрон унинг Ғазо бўйича тинчлик кенгашига қўшилиш таклифини рад этиши мумкинлигини айтишганидан сўнг ана шундай баёнот берди.

«Хўш, у ҳеч кимга керак эмас, чунки яқинда лавозимини тарк этади... Унинг вино ва шампанларига 200 фоизлик божлар киритаман ва у қўшилади», — деди АҚШ президенти журналистларга.

Эмманюэл Макроннинг президентлик муддати келаси йили якунига етади. У навбатдаги сайловларда қатнашмаслигини билдирган.

16 январ куни АҚШ президенти Доналд Трамп Тинчлик кенгашини шакллантириши ҳақида маълум қилди. Тинчлик кенгаши ижроия кенгашига қуйидагилар кирган: Трамп – кенгаш раиси сифатида, АҚШ давлат котиби Марко Рубио, АҚШ президентининг Яқин Шарқ бўйича махсус вакили Стив Уиткофф, Трампнинг куёви Жаред Кушнер, Буюк Британиянинг собиқ бош вазири Тони Блэр, америкалик тадбиркор Марк Роуэн (Forbes унинг бойлигини 8,2 млрд доллар деб баҳолайди), Жаҳон банки раҳбари Ажай Банга, миллий хавфсизлик бўйича маслаҳатчи ўринбосари Роберт Гэбриэл.

Трамп шунингдек, дунёнинг қатор етакчилари, жумладан, Ўзбекистон президенти Шавкат Мирзиёевга Тинчлик кенгашига аъзо бўлиш учун таклиф юборган. Президент Ўзбекистон Тинчлик кенгашига таъсисчи давлат сифатида қўшилишга тайёрлигини билдирган.