АҚШ Кариб денгизида еттинчи танкерни ушлади

АҚШ Кариб денгизида яна бир нефт танкерни қўлга олди. АҚШ Қуролли кучларининг Жанубий қўмондонлиги (Southcom) сешанба, 20 январ куни ижтимоий тармоқларда Sagitta кемаси АҚШ президенти Доналд Трамп жорий этган санкцияга тушган танкерлар блокадасини бузганини билдирган. Кема Ички хавфсизлик вазирлиги билан ҳамкорликда америкалик ҳарбийлар томонидан назоратга олинган.

Хабарда қайд этилишича, АҚШ Венесуэладан чиқиб кетаётган нефт тўғри тарзда ва қонуний асосларда етказиб берилишини кафолатлашга қатъий бел боғлаган. Southcom маълумотига кўра, амалиёт давомида ҳеч қандай ҳодиса юз бермаган.

Кемалар ҳаракатини кузатиш хизмати VesselFinder маълумотларига кўра, Sagitta нефт танкери Панама байроғи остида сузади ва АҚШ, ЕИ ҳамда Буюк Британиянинг санкция рўйхатларига киритилган. Шу билан бирга, MarineTraffic портали маълумотига кўра, худди шу номли ва худди шу идентификацион рақамли танкер Либерия байроғи остида сузади.

Бу — Венесуэладан нефт экспорт қилишда иштирок этаётган танкерларни таъқиб қилиш операцияси доирасида АҚШ ҳарбийлари тўхтатиб, қўлга олган еттинчи ҳолат.

Илк ҳолатлардан бири сифатида 7 январ куни Россия компаниясига тегишли, икки ҳафтадан зиёд АҚШ соҳил қўриқлаш кемасининг таъқибидан қочиб юрган Marinera (Bella 1) танкери ушланган эди. Россия бу танкернинг ушланишини ноқонуний куч ишлатиш амалиёти деб атаган. Москва маълумотларига кўра, Вашингтон экипаж таркибидаги икки нафар РФ фуқаросини озод қилишга ваъда берган. Аммо 20 январ куни Россия ташқи ишлар вазири Сергей Лавров бу ваъда бажарилмаганини маълум қилди.

АҚШ ҳокимияти баҳоси бўйича, Венесуэла нефт экспортининг тахминан 70 фоизи “соя флоти” кемалари ҳиссасига тўғри келади.