Мирзо Улуғбек тумани солиқ инспекцияси бошлиғи ишдан олиниб, жиноят иши қўзғатилди

У инспекция биносининг бир қисмини шахсий мақсадда ижарага бериб, 315 миллион сўмни ўзлаштирган, иш фаолиятида гуруҳбозликка ва маишатбозликка берилган.

Тошкент шаҳри Мирзо Улуғбек тумани солиқ инспекцияси бошлиғи Дилшод Усмонов ишдан олинган. Бу ҳақда президент Шавкат Мирзиёев раислигидаги видеоселектор йиғилишида маълум қилинди.

Ўтган ҳафтада ушбу амалдорга нисбатан жиноят иши қўзғатилган.

Қайд этилишича, Тошкент шаҳрида яширин ва кузатилмайдиган иқтисодиёт 60 триллион сўмга етган, бу бюджет йилига 7,5 триллион сўмни йўқотяпти дегани.

Биргина акциз солиғи тўловчилар ишлаб чиқариш ва реализация ҳажмини яширгани оқибатида 66 миллиард сўм солиқдан қочилган.

Яширин иқтисодиётга қарши курашиш ва солиқ маъмурчилиги бўйича пойтахт солиқ органларининг иши мутлақо қониқарсиз экани қайд этилди.

Масалан, қўшимча қиймат солиғи тўловчиларнинг қарийб 30 минги ҚҚСнинг бирор сўмини тўламаган. Ёки савдо, сервис ва умумий овқатланишдаги касса аппаратининг тўртдан бири ишлатилмаяпти.

Йиғилишда пойтахтдаги айрим солиқ бошлиқлари тушумни кўпайтириш ўрнига қўштирноқ ичидаги «тадбиркор»ларга «ҳомийлик» қилиш билан бандлиги кўрсатиб ўтилган. Хусусан, шаҳарда ўтказилган текширувларда 70 миллиард сўм солиқ ҳисобланмасдан қолгани аниқланган. Сўнгги икки йилда шаҳар солиқ идораларининг 19 нафар ходими коррупция бўйича жиноий жавобгарликка тортилган, бюджетга 27 миллиард сўм зарар етказилган.

«Ўтган ҳафта Мирзо Улуғбек тумани солиқ инспекциясининг бошлиғи Дилшод Усмонов ишдан олиниб, жиноят иши қўзғатилди. У инспекция биносининг бир қисмини шахсий мақсадда ижарага бериб, 315 миллион сўмни ўзлаштирган, иш фаолиятида гуруҳбозликка ва маишатбозликка берилган», – дея қайд этилади президент матбуот хизмати хабарида.