Қўшимча функционаллар
-
Тунги кўриниш
Тошкентда FIFAᵀᴹ Жаҳон чемпионати кубоги кенг жамоатчиликка намойиш этилди
Кубок сафари дунёнинг ўнлаб мамлакатларини қамраб олган бўлиб, миллионлаб мухлисларни бирлаштириши билан машҳур. Тошкент мазкур глобал турни кутиб олиш учун муҳим шаҳарлардан бири сифатида танланди. Ушбу лойиҳа спорт ишқибозларига жаҳон футболининг энг нуфузли совринини яқиндан кўриш имконини берди.
Фото: Coca-Cola
Ўзэкспомарказ кўргазмалар залида FIFAᵀᴹ Жаҳон чемпионати кубоги кенг жамоатчиликка тақдим қилинди. Тадбир Coca-Cola компанияси ташаббуси билан ўтказилган FIFAᵀᴹ World Cup Trophy Tour доирасида бўлиб ўтди.
Маросим Ўзбекистон миллий терма жамоасининг тарихда илк бор FIFAᵀᴹ Жаҳон чемпионатига йўлланма олгани фонида ўтказилгани билан ҳам алоҳида аҳамият касб этди. Унда сўзга чиққан Ўзбекистон Республикаси спорт вазири Адҳам Икромов кубокнинг рамзий қийматига тўхталди:
“Айнан бугун ушбу кубок Ўзбекистонда намойиш этилаётгани мамлакатимиз учун улкан шараф. Ёш футболчиларга эса бу орзуларни шакллантиришга туртки ва илҳом манбаи сифатида хизмат қилади”, – деди Адҳам Икромов.
Унинг таъкидлашича, Жаҳон чемпионати кубоги шунчаки спорт соврини эмас, орзу, бирдамлик ва футболнинг беқиёс кучини ифодаловчи тимсолдир. Вазир ўз сўзида давом этар экан, миллий терма жамоанинг Жаҳон чемпионатига йўлланма олишини мамлакат спорти тараққиёти яққол натижаси сифатида баҳолади.
Маросимда Ўзбекистон футбол ассоциацияси (ЎФА) раҳбарияти ва Cоcа-Cоlа компанияси беш йиллик ҳамкорлик шартномасини расман эълон қилди. Ҳамкорлик дастури ёшлар жамоаларини ривожлантириш ва мамлакат спорт инфратузилмасини мустаҳкамлашга қаратилган.
Coca-Cola компаниясининг Ўзбекистондаги бош директори Казумаса Мукае эса кубок сафари мазмуни ҳақида гапирди:
“Биз бу кубокни бутун дунё бўйлаб олиб юрамиз. Соврин фақат чемпионлар, давлат раҳбарлари ва FIFAᵀᴹ президенти томонидан кўтарилади. Уни Ўзбекистонда намойиш қилиш биз учун ҳам катта шараф. Қайд этиш жоиз, миллий терма жамоангизнинг Жаҳон чемпионатига чиқиши мамлакат футболи учун янги босқич. Бу кубок ёш футболчиларни келажакдаги майдонларда муваффақият қозонишга руҳлантиради”, – деди у.
Мукайе, шунингдек, Coca-Cola компанияси FIFAᵀᴹ Жаҳон чемпионати кубоги сафари расмий ҳомийси сифатида ўттиз йилдан буён фаолият юритиб келаётганини таъкидлади.
Тадбирда италялик машҳур футболчи, жаҳон чемпиони Марко Матерацци, шунингдек, Ўзбекистон футбол ассоциацияси раисининг биринчи ўринбосари Равшан Эрматов иштирок этди. Улар ёш футболчилар ва мухлислар билан учрашиб, Жаҳон чемпионати кубогининг мавқейи ва спортдаги интизом ҳамда иштиёқ ҳақида фикр алмашди.
Тадбир якунида меҳмонлар Ўзбекистонга олиб келинган асл Жаҳон чемпионати кубоги билан суратга тушиш имконига эга бўлишди.