Парижда Илoн Маскнинг X компанияси офисида тинтув ўтказилди

Илон Маскка тегишли X ижтимоий тармоғининг Париждаги ваколатхонасида тинтув ўтказилди. Бу ҳақда Париж прокуратураси маълум қилди. Текширув кибержиноятчиликка қарши курашувчи бўлим, Франция миллий полицияси ва Европол иштирокида амалга оширилган.

Фото: AP

Reuters агентлигига кўра, тинтув 2025 йил январда бошланган тергов доирасида ўтказилган. Тергов француз парламентарийсининг шикояти асосида очилган. Гап, эҳтимол, Миллий ассамблея депутати, “Қайта тикланиш” партияси вакили Эрик Боторел ҳақида кетмоқда. У X алгоритмларини “бир ёқлама” деб атаб, платформа Маск томонидан сотиб олинганидан сўнг бошқарувга “очиқ аралашувлар” бўлганини айтган. Шунингдек, X тармоғида “хавфсиз ва ҳурматга асосланган муҳитни таъминлаш тобора қийинлашаётгани”ни таъкидлаган.

Яна бир шикоят Франция давлат тузилмаларидан бирининг киберхавфсизлик бўйича директори томонидан берилган. У платформа алгоритмида “жиддий ўзгаришлар” юз берганини, бу эса “сиёсий душманлик, ирқий мазмундаги контент”нинг кўпайишига олиб келганини билдирган.

2025 йил июл ойида X компанияси бу айбловларни сиёсий сабабларга боғлиқ деб атаган эди.

Тинтувдан сўнг Илон Маск ва X’нинг собиқ бош директори Линда Яккарино 20 апрел куни Париж прокуратурасига эшитувга чақирилгани маълум бўлди.

Тергов, шунингдек, Маскка тегишли xAI компанияси томонидан ишлаб чиқилган Grok чат-боти юзасидан ҳам кенгайтирилмоқда. У реал инсонлар фотосуратлари асосида жинсий мазмундаги тасвирлар яратиши мумкинлиги ҳақида шикоятлар тушган. Энди тергов доирасида, жумладан, болалар порнографиясини тарқатишга кўмаклашиш ва жинсий характердаги дипфейк орқали тасвир ҳуқуқини бузиш гумонлари ҳам кўриб чиқилмоқда.

Хабар чоп этилган пайтга қадар X компанияси Париждаги офисида ўтказилган тинтувга расман изоҳ бермаган.