Фантастик гол, баҳсли пеналти ва сўнгги дақиқалардаги драма. «Сити» ғалабани илиб кетди

«Сити» «Арсенал» билан 6 очколик фарқни тиклади

«Ливерпул» – «Манчестер Сити» 1:2
Голлар: Собослаи, 74 (1:0). Бернарду Силва, 84 (1:1). Ҳоланд, 90+3 – пеналти (1:2)
«Ливерпул»: Алиссон, ван Дейк, Конате, Керкез (Киеза, 90+4), Собослаи, Макаллистер, Гравенберҳ, Вирц, Гакпо (Жонс, 85), Салоҳ, Экитике
«Манчестер Сити»: Доннарумма, Гейи, Ҳусанов (Рубен Диаш, 61), Айт Нури, Матеус Нунес, Родри, О`Райли, Бернарду Силва, Мармуш (Шерки, 61), Семенё (Аке, 90+6), Ҳоланд
Огоҳлантиришлар: ван Дейк, 47. Алиссон, 90 – Мармуш, 42. Гейи, 69. Ҳоланд, 90. Бернарду Силва, 90
Четлатиш: Собослаи, 90

«Ливерпул» ва «Манчестер Сити» учрашуви сўнгги ўн йилликда инглиз класикосига айланиб қолди. Булар – кучли таркибларга эга, юлдуз мураббийлар ишлайдиган ҳамда бутун ер юзи бўйлаб миллионлаб мухлислардан иборат армияга эга бўлган икки суперклубдир. Аммо жорий мавсумда икки жамоада ҳам пасайиш юзага келди.

Мерсисайдликлар ўтган мавсумни аъло даражада ўтказиб, чемпионликни қўлга киритганди, аммо ёзда кенг кўламли қайта қуришга қўл урилди ва жамоа ўз ўйин услубини йўқотди. Ёзги трансферларда ажойиб ижрочилар жамоага олиб келинди, аммо бу таркиб ҳали ўз ўйинини топиб ололмаяпти. Бу эса беқарор натижаларга сабаб бўлмоқда. Жамоа 23-турда «Борнмут»га ютқазганди, кейин эса ЕЧЛда «Қорабоғ» (6:0), АПЛда «Нюкасл» (4:1) йирик ҳисобларда мағлуб этилди.

«Сити»да натижалар бўйича нисбатан яхшироқ вазият – жамоа ЕЧЛнинг сўнгги турида кучли саккизликка илиниб қолди, АПЛда эса анчадан буён иккинчи ўринни ҳеч кимга бермади. Аммо «шаҳарликлар» ўйинини ҳам «Ливерпул»никига қараганда барқарорроқ деб бўлмайди: «Энфилд»даги ўйингача Пеп Гвардиола шогирдлари чемпионатнинг сўнгги олти турида атиги бир ғалабага эришганди.

Арне Слот жамоасининг мавсумдаги энг муҳим ўйинларидан бирига ўз ихтиёридаги энг кучли таркибни туширди, Гвардиола эса ўзи учун ноодатий бўлган 4-4-2 схемасини танлаб, бир вақтнинг ўзида Эрлинг Ҳоланд ва Омар Мармушга бошланғич таркибдан жой топиб берди. Натижада Фоден, Шерки ва Рейндерс захира ўриндиғида қолдирилди.

Аммо «Сити»нинг бу схемаси амалда классик 4-4-2 кўринишида эмас, балки «ромб»ни ифода этарди. Унда Родри таянч зонасида қолди, О'Райли, Семенё ва Бернарду Силва мунтазам равишда рақиб мудофаа чизиқларига кириб, комбинациялар уюштиришди. Ўйиннинг дастлабки қисмида «Ливерпул» фаолроқ бўлишга ва бўш ҳудудлар топишга интилди, аммо ўйиннинг 22-дақиқасига келиб экранда «Сити» бу вақтгача рақиб жарима майдони томон 31 узатма амалга оширгани, мезбонларда эса бундай узатмалар сони атиги битта бўлгани ҳақида титр чиқарилди.

Биринчи бўлимда ҳар икки жамоа ҳам бир мартадан пеналтига даъвогарлик қилди. Аввалига Мармуш жарима майдонига йиқилди, аммо Крейг Поусон бунга эътибор қаратмади.

Видеотакрор Конате рақиб ҳужумчиси билан контактни жарима майдони ташқарисида бошлаганини кўрсатди.

Бўлим охирида эса Бернарду Силва жарима майдони ичида Салоҳнинг қўлидан тортиб қолди. Аммо ҳакам бу вазиятни ҳам эътиборсиз қолдирди, VAR яна аралашмади.

Иккинчи бўлим эса биринчисига қараганда интенсивроқ кечди. 46-дақиқадаёқ Салоҳ қулай позицияга чиқиб борди, аммо унинг зарбаси ўхшамади. «Сити» дарҳол жавоб қайтарди, Алиссон сўнгги дақиқада тўпни Мармушнинг оёқлари остидан олиб қўйишга улгурди. Бироз ўтиб ван Дейк Ҳоландга ишлатилган учун сариқ карточка олди.

Шундан кейин «Ливерпул» ташаббусни тўлиқ ўз қўлига олди. Мерсисайдликлар тўпни ўзида кўпроқ вақт давомида ушлаб тура бошлади ва ҳужумлар уюштирди. Экитике ажралиб турди: француз ҳужумчиси бир неча вазиятларга эга бўлди, аммо унинг зарбалари дарвоза соҳасига тўғри бормади. Яна бир вазиятда у Вирцни қулай вазиятга чиқарди, аммо Гейи зарба йўлини блоклаб, жамоасини қутқарди.

Ўйиннинг бир соати ортда қолаётганида эса майдонда ўзбекистонлик мухлислар учун хавотирли вазият юзага келди: Абдуқодир Ҳусанов ўз жамоадоши Жанлуижжи Доннарумма билан тўқнашувдан кейин шифокорлар ёрдамига эҳтиёж сезди.

Тиббиёт ходимлари унга бош мия чайқалиши ташхисини қўйишди ва футболчи майдонда қолишни истаганига қарамай, унга ўйинни давом эттиришга рухсат беришмади. Гвардиола унинг ўрнига Рубен Диашни майдонга ташлади.

Ўйиннинг 75-дақиқасида эса «Ливерпул» рақиб дарвозасидан тахминан 30 метр масофада стандарт вазият ишлади. Аммо Доннарумма бу масофани узоқ деб ҳисоблади ва «жонли девор»га икки киши қўйиш билан кифояланди. Доминик Собослаи эса фантастик зарбаси билан уни бу қарори учун жазолади. Дарвозабон ўрнидан қимирлашга ҳам улгурмади.

Венгриялик яримҳимоячи амалда мавсум бошида «Арсенал»га урган голини такрорлади. Ўшанда унинг фантастик голи жамоасига ғалаба келтирганди, аммо бу сафар барчаси бошқача кечди.

«Ливерпул»да ҳисобни сақлаб қолиш учун ўйнашга қарор қилди. Аммо Гвардиола шогирдлари ўйиннинг сўнгги қисмида вазиятни ўз томонига оғдира олишди. 84-дақиқада Ҳоланд иккинчи қаватда тўп учун курашда Конатедан устун келди ва тўпни олдинга ташлаб берди, Бернарду Силва эса тўпга Алисондан олдинроқ етиб бориб, бир тегинишда дарвозани аниқ ишғол этди. Бу вазиятда Собослаи офсайд чизиғини ушлашда хатога йўл қўйди.

Ҳакам ўйинга 7 дақиқа қўшиб берди, мухлислар ўйин дуранг ҳисоб билан якунланишига тайёргарлик кўра бошлади, аммо 90+1-дақиқада бош ҳакам мезбонлар дарвозасига пеналти белгилади. Бу анча баҳсли қарор эди, чунки Алисон Нунес билан тўқнашганида рақиб футболчиси тўп майдон ташқарисига чиқиб кетиб бўлганди.

Ҳоланд эса бу совғадан фойдаланди ва «Энфилд»даги илк голини урди.

Голдан кейин Гвардиола ҳимояни кучайтириш учун Акени майдонга ташлади.

Шундан кейин майдонда бўлиб ўтган воқеалар ҳақида алоҳида мақола ёзса бўлади. Пеналти туфайли қўшиб берилган дақиқалар узайди.

90+7-дақиқада Айт-Нури ўйинга нуқта қўйиши мумкин эди, аммо Алисон «Ливерпул»ни ўйинда қолдирди. Бир дақиқа ўтмай Доннарумма Макаллистернинг рикошет бўлиб келган зарбасини қайтариб қолди.

Сўнгги дақиқада Алисон рақиб жарима майдонига етиб борди. «Ливерпул» дарвозабони ўз вақтида қўшимча дақиқаларда ғалаба голини урганди, аммо бу сафар меҳмонлар қарши ҳужумга чиқиб кетишди.

100-дақиқада Шерки майдоннинг иккинчи қисмидан туриб тўпни ерлатиб бўш қолган дарвоза томон тепди.

Эътибор аниқликка қаратилгани учун зарба у қадар кучли эмасди, Ҳоланд ва Собослаи тўпга етиб олиш учун пойга ўйнашди. Бу пойгада ортда қола бошлаган Собослаи эса рақибини қўли билан тўхтатиб, ундан ўтиб кетди.

«Ливерпул» футболчиси ҳам тўпга ета олмади, унга энди Ҳоланд халақит берди ва тўп дарвоза тўрига кириб кетди.

Вазиятга VAR аралашди: Ҳоланд Собослаига тўпга етиб боришга халал қилгани учун гол бекор қилинди, ўз навбатида Собослаи Ҳоландни ушлаб қолгани учун унга қизил карточка кўрсатилди.

«Сити»га ғалаба учун икки гол ҳам етарли бўлди. «Ливерпул» эса энди кейинги турда «Сандерленд»га қарши кечадиган ўйинда Собослаининг хизматларидан фойдалана олмайди.

Ўз уйида ютқазган мерсисайдликлар тўртинчи ўриндаги «Челси»дан тўрт очкога ортда қолмоқда. Слот жамоаси АПЛнинг сўнгги етти ўйинида атиги бир ғалабага эришган. «Сити» эса ҳаёт-мамот ўйинидан уч очко билан қайтди ва «Арсенал» билан пойгани давом эттирадиган бўлди – орадаги фарқ яна 6 очкони ташкил этмоқда.