ФХХ Алексеевга суиқасдда гумонланувчилар айбига иқрор бўлганини маълум қилди

Москвада ГРУ бошлиғи ўринбосари, генерал-лейтенант Владимир Алексеевга суиқасд уюштиришда гумонланган Любомир Корба ҳамда Виктор Васин айбига иқрор бўлиб, кўрсатма берди, дея эълон қилди РФ Федерал хавфсизлик хизмати Жамоатчилик билан алоқалар маркази.

Россия махсус хизматлари версиясига кўра, улар Украина хавфсизлик хизмати буюртмаси бўйича ҳаракат қилишган, жиноятнинг бевосита ижрочиси – Любомир Корбани ёллашда Полша махсус хизматлари иштирок этган, бунда улар Корбанинг 1998 йилда туғилган ва Катовице шаҳрида яшовчи ўғли, Полша фуқароси Корба Любошдан фойдаланишган.

Маълум қилинишича, Любомир Корба 2025 йил августида ёлланиб, Киевдаги полигонда қурол ишлатишга ўргатилган ва Россияга «Киев – Кишинёв – Тбилиси – Москва йўналиши бўйича юборилган».

ФХХ Жамоатчилик билан алоқалар маркази баёнотида айтилишича, генерал Алексеевни ўлдириш учун Украина махсус хизматлари 30 минг доллар ваъда қилишган.

Москвада Корба юқори мартабали ҳарбийлар ортидан кузатув амалга оширган. ФХХ маълум қилишича, Корба ўз иқрорномасида 2025 йил декабрида Алексеевни ўлдиришга кўрсатма олганини айтган. У Москва областидаги махфий жойдан овоз пасайтиргич ўрнатилган ҳамда ўқ-дориси бўлган Макаров тўппончасини олган, унга Алексеев яшайдиган уй подъездига кириш учун электрон калитни эса Зинаида Серебрицкая тақдим этган. Ушбу аёл сўнгги ойларда генерал билан битта уйда яшаб келган ва «Украинага жўнаб кетиш»га улгурган.

ФХХга кўра, ишдаги иккинчи гумонланувчи Виктор Васин Корба суиқасдга тайёргарлик кўраётганида у яшаб туриши учун квартира ижарага олган, шунингдек, уни жамоат транспортидан фойдаланиш учун ойлик чипталар билан таъминлаган. Васин «„Коррупцияга қарши кураш фонди“ тарафдори экани, Москвадаги норозилик акцияларида қатнашгани, „Ақлли овоз бериш“ ҳамда „Навалний штаби“ сайтларида рўйхатдан ўтгани, шунингдек, ижтимоий тармоқларда РФ Конституциясига ўзгартиришлар киритишга қарши ҳамда „Сўл фронт“ ҳаракати раҳбари, экстремистик фаолияти учун қамалган Сергей Удалцовни қўллаб-қувватловчи постлар жойлаштиргани» маълум қилинган.

РФ мудофаа вазирлиги генерал-лейтенанти Владимир Алексеевга суиқасд 6 феврал куни тонгда амалга оширилганди. Генералга Москванинг Волоколамское шосседаги уйи подъезди олдида бир неча бор ўқ узилган. Алексеев оғир аҳволда шифохонага ётқизилган. 7 феврал куни генерал операциядан кейин ўзига келгани хабар қилинди. 

Россия ташқи ишлар вазири Сергей Лавров Алексеевга уюштирилган суиқасд «Зеленский режимининг музокаралар жараёнини бузишга қаратилган доимий провокацияларга интилишини тасдиқлаши» ҳақида гапирди. Украина ташқи ишлар вазири Андрей Сибига Киевнинг суиқасдга алоқадорлиги ҳақидаги айбловларни рад этди.