Трамп маъмурияти: Миннесотадаги рейдлар якунланди

Иммиграция ва божхона хизмати (ICE) АҚШнинг Миннесота штатида ноқонуний мигрантларга қарши операциясини қисқартирмоқда, деб хабар қилди пайшанба, 12 феврал куни Оқ уйнинг чегара назорати бўйича координатори Том Хоман. Унинг айтишича, АҚШ президенти Доналд Трамп “эришилган ютуқлар”ни инобатга олган ҳолда штатдан федерал агентларни чиқариш ҳақидаги унинг таклифига рози бўлган.

Матбуот анжуманида Хоман Metro Surge операцияси давомида “кўп жиноятчилар” ҳибсга олинганини, энди Миннесота улар учун “камроқ қулай” бўлишини билдирди. Аввалроқ Оқ уй федерал кучлар Миннесотада тахминан 4 минг нафар “жиноятчи — ноқонуний мигрант”ни қўлга олганини, улар орасида “қотиллар, зўравонлар, банда аъзолари” борлигини маълум қилган эди.

Шу билан бирга, Хоман операция давомида ICE агентлари ҳеч кимни касалхоналарда, бошланғич мактабларда ёки черковларда қўлга олмаганини таъкидлади. “Бироқ бу жойлар истисно қилинмайди”, — деб қўшимча қилди мансабдор. У федерал кучлар Миннесотадан “мамлакат бўйлаб бошқа жойларга” қайта йўналтирилишини айтиб, бу “президентнинг чегаралар хавфсизлигини таъминлаш ва оммавий депортациялар ўтказиш бўйича вазифаларини бажариш” учун қилинишига урғу берди.

Январ ойида Миннеаполис шаҳри ICE ва Трампнинг миграция сиёсатига қарши оммавий норозилик намойишлари билан қамраб олинган эди. Шаҳар аҳолисининг норозилигига ICE агентлари икки нафар АҚШ фуқаросини — 37 ёшли тиббий ходим Алекс Преттини ва 37 ёшли Рене Гудни ўлдиргани сабаб бўлган.

Миннесота губернатори Тим Уолц ICE операциясига қарши бир неча бор чиқиш қилган ва унинг мақсадга мувофиқлигига шубҳа билдирган. Ушбу операциянинг салбий оқибатлари ҳақида гапирар экан, Уолц иқтисодий зарар, федерал ҳокимиятга бўлган ишончнинг йўқолиши ва кўплаб одамлар, жумладан болалар учун ҳам руҳий оғир тажриба бўлганини тилга олди.

“Бизда шундай болалар борки, улар учун синфдошининг олиб кетилгани ҳақиқати энг асосий хотирага айланади ва бу бутун умри давомида улар билан қолади”, — деди Уолц.