Нотариуслар эскроу ҳисобварақда маблағ бор-йўқлигини онлайн текширади

Кўчмас мулк объектлари, ишлаб чиқарилганига ўн йилдан ошмаган М, Н, О ва Г тоифага кирувчи транспорт воситалари ҳамда махсус автотранспорт воситалари олди-сотди шартномалари бўйича ҳисоб-китобларни амалга ошириш учун нотариуслар ва банклар ўртасида электрон маълумотлар алмашиш тартибини белгилайдиган Низом лойиҳаси ишлаб чиқилди.

Лойиҳага кўра, шартнома тарафлари ўртасида келишувга эришилгандан сўнг харидор ёки унинг вакили банкка мурожаат қилиб, эскроу ҳисобварағи очади ва пул маблағларини ушбу ҳисобвараққа киритади. Ҳар бир олди-сотди шартномаси учун битта эскроу ҳисобварағи очилади.

Шартномани тасдиқлашдан олдин нотариус автоматлаштирилган ахборот тизими орқали банкка электрон сўров юбориб, эскроу ҳисобварақда шартнома суммасига тенг маблағ мавжуд ёки йўқлигини реал вақт режимида текширади. Агар ҳисобварақ ёпилган бўлса ёки маблағ етарли бўлмаса, нотариус шартномани тасдиқлашни рад этади.

Шартнома тасдиқланганидан сўнг нотариус бу ҳақда банкка электрон маълумот юборади. Банк эса эскроу ҳисобварақдаги пул маблағларини автоматик тарзда сотувчининг ҳисобварағига ўтказади.

Шунингдек, шартнома тасдиқланмаган тақдирда харидор ёки унинг вакилининг мурожаатига асосан эскроу ҳисобварақдаги маблағлар қайтариб берилади.

Низом талаблари ижроси устидан Адлия вазирлиги ҳамда Марказий банк томонидан мониторинг амалга оширилиши белгиланмоқда.