Трамп: Эронда режим ўзгариши – «рўй бериши мумкин бўлган ишларнинг энг яхшиси»

АҚШ президенти Доналд Трамп Эрондаги режимнинг ўзгариши – «рўй бериши мумкин бўлган ишларнинг энг яхшиси» эканини айтди ва шу билан мамлакатда руҳонийлар бошқарувини ўзгартириш ғоясини қўллаб-қувватлашини таъкидлади.

«47 йил фақат қуруқ гаплар бўлган. Бу вақт мобайнида биз жуда кўп одамни йўқотдик», – деган у.

Трамп Эрон раҳбарлигига кимни қўймоқчи эканига аниқлик киритишдан бош тортди, бироқ бу лавозимни эгаллаши мумкин бўлган «одамлар борлиги»ни таъкидлади. Эрон олий раҳбари оятуллоҳ Али Хоминаий Трампнинг сўнгги баёнотларига ҳозирча муносабат билдирмади.

Бу вақтда АҚШ Эронга ядровий келишув тузиш учун босимни кучайтириш мақсадида Яқин Шарққа иккинчи авиаташувчини юборган.

Трампнинг сўзларига кўра, дунёдаги энг йирик ҳарбий кема ва Американинг энг замонавий USS Gerald R Ford авиаташувчиси «жуда қисқа муддатда» Кариб ҳавзасидан Яқин Шарққа кўчирилади.

Трамп ўзига тегишли бўлган Truth Social платформасида Американинг Яқин Шарққа олдинроқ юборилган USS Abraham Lincoln авиаташувчиси олдига йўл олган ушбу авиаташувчининг аэрофотосини жойлаштирган.

Пентагон USS Abraham Lincoln авиаташувчисини январ ойида, АҚШ Эрон ҳукумати норозилик намойишларини шафқатсизларча бостиришига жавобан ушбу мамлакатга зарба бериш билан таҳдид қилганидан кейин минтақага юборганди.

Трамп ядровий келишувга эришилмайдиган бўлса, Эронга зарба бериш билан таҳдид қилган бўлса-да, чоршанба куни Оқ уйда Исроил бош вазири Бинямин Нетаняҳу билан бўлиб ўтган учрашувидан сўнг Теҳрон билан музокараларни давом эттиришни талаб қила бошлади.

«Келишув тузишнинг имкони бор ёки йўқлигини аниқлаш учун Эрон билан музокараларни давом эттиришни талаб қилганимдан бошқа ҳеч қандай якуний келишув йўқ», – дея ёзган Трамп Truth Social ижтимоий тармоғида.

Жума куни Форт-Брэггеда қилган чиқишида Трамп Теҳрон АҚШ зарбасидан қутулиб қолиш учун нима қилиши кераклиги ҳақидаги саволга жавобан Эрон «аввалроқ таклиф қилиши керак бўлган келишувни таклиф қилиши лозимлиги»ни айтди.

АҚШ Эронда уранни бойитиш ишларини тўхтатишни талаб қилмоқда, Нетаняҳу ҳукумати эса Теҳрондан баллистик ракеталар дастурини, шунингдек, Ҳамас ва «Ҳизбуллоҳ» каби радикал гуруҳларни қўллаб-қувватлашни қисқартиришни талаб қилмоқда.

Эрон шу пайтгача санкцияларни бекор қилиш эвазига ядровий дастурини чеклашга тайёрлигини билдирган, бироқ мамлакат президенти Масъуд Пизишкиён Теҳрон «ортиқча талабларга ён бермаслиги» ҳақида огоҳлантирган.

Трамп ўзининг биринчи муддатида АҚШни Обама даврида Эрон билан тузилган ядровий келишувдан олиб чиқиб, мамлакат иқтисодиётига жиддий путур етказган санкцияларни қайта тиклаганди.

2025 йил ёзида маъмурият Исроил ва Эрон ўртасида бўлиб ўтган 12 кунлик урушдан олдинроқ янги келишувга эришиш учун музокараларни қайта бошлаганди.