«Одамлар буни ҳеч қачон кечирмайди. Ҳеч қачон». Зеленский Донбассни Россияга бериш таклифи ҳақида

Украина аҳолиси мамлакат қуролли кучларини Донецк областидан олиб чиқиб кетиш ва бу ҳудудни Россияга топшириш шартини ўз ичига олган тинчлик битимини қабул қилмайди, деди Украина президенти Володимир Зеленский Axios нашрига берган интервюсида.

«Ҳиссий жиҳатдан одамлар буни ҳеч қачон кечирмайди. Ҳеч қачон. Улар кечирмайди... мени ҳам, АҚШни ҳам», – деган Зеленский. У украинлар нима учун улардан қўшимча ер бериш талаб қилинаётганини тушуна олмаслигини қўшимча қилган: «Булар – барча фуқаролар, байроқлар, ер – мамлакатимизнинг бир қисми».

Зеленский Украина аҳолиси фақат Донбассдаги фронт чизиғини музлатишни назарда тутувчи келишувни қабул қилиши мумкинлигини айтиб ўтган. «Агар биз ҳужжатга ҳозирги туташув чизиғига амал қилиш тўғрисидаги бандни киритсак, ўйлайманки, одамлар референдумда буни қўллаб-қувватлайди. Менинг фикрим шундай», – деди у.

Зеленскийнинг айтишича, АҚШ музокарачилари – Стив Уиткофф ва Жаред Кушнер – унга РФ урушни тугатмоқчилиги ва Украина томони Женевада музокаралар бошланишидан олдин бу маълумотни ҳисобга олган ҳолда ўз позициясини ўзгартириши кераклигини билдирган.

Украина президенти эса уларга вазиятни анча пессимистроқ баҳолашини маълум қилган. У АҚШ вакилларига ўзини украинларга улар «муваффақиятсизлик» деб ҳисоблайдиган қарашни ўтказишга мажбурламасликни маслаҳат берган.

Зеленский АҚШ президенти Доналд Трамп Россияни эмас, балки Украинани тинчлик учун ён беришга чақиришини «адолатсизлик» деб атаган. У Трамп учун Москвадан кўра Киевга босим ўтказиш осонроқлигини тахмин қилган. «Бу унинг ечими эмас, балки шунчаки тактикаси эканига умид қиламан», – деган Зеленский Аxios учун интервюсида.

Шу билан бирга, у Трампга урушни якунлашга қаратилган саъй-ҳаракатлари учун миннатдорчилик билдирган. У Уиткофф ва Кушнер билан музокараларида босим бўлмаётганини қайд этган.

Зеленский яна бир бор ҳудудлар масаласида ютуққа эришишнинг энг яхши йўли – унинг Владимир Путин билан учрашуви бўлишини таъкидлаган.

Россия ва Украина 2025 йилда Доналд Трамп Оқ уйга қайтганидан буён АҚШ воситачилигида урушни якунлаш бўйича музокаралар олиб бормоқда. 17 феврал куни Женевада музокараларнинг навбатдаги раунди бошланди.

Томонлар келишувга эриша олмаётган асосий банд – Донбасс ҳудуди кимга қолиши бўйича. Россия бу ҳудудни ёки музокаралар йўли билан, ёки куч ишлатиш орқали ўзиники қилмоқчи. АҚШ украин қўшинларини Донецк областининг ҳали Украина назоратида қолаётган қисмидан олиб чиқишни ва ҳудудда ҳарбийлардан холи бўлган «эркин иқтисодий зона» ташкил этишни таклиф этмоқда. Бу ҳудудни ким бошқариши номаълум.

Зеленский қўшинларни олиб чиқиш масаласини муҳокама қилишга тайёрлигини, шу билан бирга, Москва ҳам ўз қўшинларини Донбассдан олиб кетиши кераклигини айтмоқда.

Украина раҳбарининг сўзларига кўра, Киев ва Вашингтон ҳар қандай тинчлик шартномаси Украинада референдумга қўйилиши кераклиги ҳақида келишиб олган.