Париждаги сўл партия офиси портлаш таҳдидидан сўнг эвакуация қилинди

Лионда ўнг экстремист ўлдирилганидан кейин Париждаги сўл қанотдаги “Бош эгмаган Франция” партиясининг бош офиси эвакуация қилинди. Ушбу қотиллик учун масъулият сўл радикаллар зиммасига юкланмоқда. Ҳодиса сайловларга бир ой қолганда сиёсий вазиятни кескинлаштирди.

Фото: Thomas Padilla/AP

Ўта ўнг қарашли фаолнинг зўравонлик оқибатида ўлими ортидан — бу ҳодиса учун масъулият сўл экстремистлар зиммасига юкланаётган бир пайтда — Парижда Жан-Люк Меланшон раҳбарлик қиладиган “Бош эгмаган Франция” (LFI) сўл партиясининг марказий офиси эвакуация қилинди. “Бош эгмаган Франция” партиясининг миллий штаб-квартираси портлаш таҳдиди сабаб эвакуация қилинди”, — деди чоршанба, 18 феврал куни партия координатори Манюэл Бомпар.

Шунингдек, баёнотда ходимлар ва фаоллар хавфсиз жойда экани, биноларни эса итлар билан полиция текшириб чиқаётгани айтилган.

Шу орада Франция ҳукумати сўл радикаллар билан алоқаларда гумон қилинган LFI депутати Рафаэл Арнони Миллий ассамблеядаги фракциядан вақтинча чиқаришни талаб қилди. “LFI партияси ўз сафи ичида тартиб ўрнатиши керак”, — деди ҳукумат вакили Мод Брежон Franceinfo радиоси эфирида.

Аввалги куни кечқурун Лиондаги ўнг экстремистнинг ўлими бўйича иш доирасида Арнонинг парламент ёрдамчиси қўлга олингани маълум бўлди. Le Monde газетаси маълумотига кўра, жами 11 нафар гумонланувчи ушланган, уларнинг айримлари радикал қарашлари билан танилган.

Лиондаги бу ҳодиса Францияда муниципал сайловларга бир ой ҳам қолмаган бир пайтда сиёсий вазиятни янада кескинлаштирди. Ниқоб таққан ёшлар гуруҳи 12 феврал куни 23 ёшли ўнг экстремист Квентин Деранкни шафқатсизларча калтаклаган. У Лион университетларидан бирида LFI’дан бўлган франко-фаластинлик евродепутат Рима Ассан ташкил этган тадбирга қарши ўтказилган намойишларда қатнашган.

Икки кун ўтгач, фаол бош мия жароҳати оқибатида шифохонада вафот этди. Прокуратура эҳтиётсизлик орқали одам ўлдириш гумони бўйича тергов олиб бормоқда. Тергов маълумотларига кўра, камида олти киши уни ерга йиқитиб, тепкилаганидан кейин у бош қисмига ўлимга олиб келган жароҳат олган.

Ҳодисадан кейин ўнг ва ўнг-популист сиёсатчилар LFI’ни зўравонлик муҳитини яратишда айблади. Ўз навбатида, сўл популистлар бу иш сиёсий мақсадларга эришиш учун восита сифатида ишлатиляпти, деб баёнот бермоқда. Кузатувчиларнинг фикрича, натижада мўътадил сўл кучлар LFI билан ҳамкорлик қилишдан воз кечиши мумкин, бу эса ўнг-популист “Миллий бирлашма” (RN) партиясининг имкониятларини яхшилайди.