Зеленский: Лвивдаги терактни РФ Telegram орқали ташкил этган

Украина президенти Володимир Зеленский Лвив марказида содир бўлган теракт ортида Россия томони турганини маълум қилди. Ушбу теракт оқибатида 22 феврал, якшанбага ўтар кечаси полиция ходими ҳалок бўлган. Зеленский бу ҳақда ўша кун оқшомида ўзининг Telegram-каналида эълон қилинган видеомурожаатида айтди.

“Ижрочилар Telegram орқали ёлланган. Ўнлаб шунга ўхшаш ҳолатларнинг олди олинди. Украина ҳуқуқни муҳофаза қилувчи органлари доимий равишда бундай ёллашларга қарши курашиб келмоқда”, — деди Зеленский. Давлат раҳбарининг сўзларига кўра, Украина разведкасида “россияликлар бундай ишлар, яъни украинларга қарши амалдаги ҳужумларни яна давом эттирмоқчи” эканини кўрсатувчи маълумотлар бор.

Терактдан кейин қўлга олинган аёлга мазкур жиноят, шунингдек қурол билан қонунга хилоф муомала қилиш бўйича айблов эълон қилинган. Украина бош прокурори идораси маълум қилишича, гап Ровно вилоятидаги Костопил шаҳрида яшовчи 33 ёшли аёл ҳақида кетмоқда.

“Гумон объектив далилларга асосланган бўлиб, улар қўлга олинган шахс 23 ёшли полиция ходимининг ҳаётига зомин бўлган ва яна 20 дан ортиқ кишининг яраланишига олиб келган терактни содир этганини кўрсатади”, — дейилади хабарда. Қайд этилишича, 33 ёшли ушланган аёл яшаган ва бўлган жойларда ўтказилган тинтувлар давомида “ғайриқонуний фаолият далиллари олинган”.

Украина терговчилари версиясига кўра, 21 феврал кечқурун гумонланувчи Лвив марказидаги бинолардан бири ёнига икки дона қўлбола портловчи қурилма қўйган. Бир соат ўтгач, полицияга Харкив вилоятидан қўнғироқ тушган: унда шу бинода жойлашган дўконга ноқонуний кириш ҳақида хабар берилган.

Полиция экипажи етиб келганида биринчи портлаш содир бўлган, иккинчи наряд келганида эса яна бир портлаш рўй берган. Портлаш оқибатида 23 ёшли полиция ходими ҳалок бўлган, 25 киши яраланган. Лвив шаҳар мэри Андрей Садовийнинг билдиришича, 22 февралга келиб шифохоналарда 12 киши қолган, улардан иккисининг аҳволи жуда оғир.

Ҳуқуқ-тартибот идоралари таъкидлашича, гумонланувчи портловчи қурилмаларни ўрнатгандан кейин таксида кетган, портловчи модда эса эҳтимол масофадан туриб ишга туширилган. Терактни ижро этган деб гумон қилинаётган аёл Старий Самбор шаҳрида ушланган — бу шаҳар Полша ва Словакия чегаралари яқинида жойлашган. Шунингдек, полицияга қўнғироқ қилган шахснинг кимлиги аниқланган, аммо ҳозирча ошкор қилинмаяпти. Айтилишича, Зеленский мурожаатидан бир неча дақиқа олдин чиққан постда ҳуқуқ-тартибот идоралари терактга Россия томонининг алоқадорлигини текшираётганини билдирган.

Зеленский айтган маълумотлардан кейин Украина президенти офисининг ўринбосари Ирина Верешчук Telegram ва “шунга ўхшаш бошқа аноним платформалар”нинг “имкониятларини чеклаш” ҳақида ўйлаб кўришга чақирди. “Яна бир бор кўряпмизки, душман Telegram’дан террористларни ёллаш, улар фаолиятини мувофиқлаштириш ва терактлар содир этиш учун тизимли равишда фойдаланяпти. Агар халқимиз ҳаётини ҳимоя қилиш ва миллий хавфсизликни таъминлаш учун бу платформалар имкониятларини чеклаш керак бўлса, демак, биз буни қилишимиз керак”, — деб ёзди Верешчук ўзининг Telegram-каналида.