ЙПХдан қочган BMW'лар иши: прокуратура суд қарорига протест киритди

Uzbelas Performance автосервиси раҳбари Асадбек Жумаевга нисбатан январ ойидаги маъмурий ҳуқуқбузарлик ишида судя айбловни ўзгартириб, 20 БҲМ (8,4 млн сўм) жарима тайинлаган. Ишни тергов судяси Ботиралибек Омонов кўриб чиққан бўлиб, аввалроқ ушбу судянинг Li 9 ва BYD тўқнашуви борасидаги қарори шов-шувли тарзда бекор қилинганди. Энди прокуратура унинг Жумаевга нисбатан қароридан норози.

ЙПХга бўйсунмаган иккита BMW воқеасининг иштирокчиси бўлганидан “фахрланиши” ва бу ҳолатни тарқатгани учун “кичкина жарима” билан қутулиб кетганини айтган Асадбек Жумаев ўшанда 8,4 млн сўм жаримага тортилгани маълум бўлди. Kun.uz суд ҳужжати билан танишди.

Маъмурий ҳуқуқбузарлик ЖИБ Мирзо Улуғбек туман судида кўриб чиқилган. Суднинг 2026 йил 16 январдаги қарорида ёзилишича, Асадбек Жумаев 7 январ куни Instagram'даги Uzbelas ва UzbelasPerfomance саҳифаларида бир гуруҳ ҳуқуқбузарлар томонидан ЙПХ ходимининг тўхташ ишорасига бўйсинмай ҳаракатлангани акс этган видеолавҳани эълон қилган.

Суриштирув органи Асадбек Жумаевнинг ҳаракатини Маъмурий жавобгарлик тўғрисидаги кодекснинг 201-1-моддаси 1-қисми, яъни қонунчилик ҳужжатларини бажармасликка ёки бузишга омма олдида даъват қилиш билан малакалаган. Бундай қилмиш БҲМнинг 60 бараваридан 80 бараваригача миқдорда жарима солишга сабаб бўлиши белгиланган.

Ишни кўрган тергов судяси Ботиралибек Омонов ҳуқуқбузарнинг ҳаракати МЖтКнинг 195-2-моддаси, яъни ҳуқуқни муҳофаза қилувчи органлар ходимларининг фото-видеотасвирини уларнинг обрўсизлантирилишига олиб келадиган тарзда бузиб тарқатиш билан қайта малакалаган. Бундан ҳуқуқбузарлик БҲМнинг 20 бараваридан 50 бараваригача миқдорда жарима солишга ёки 10 суткагача маъмурий қамоққа олишга сабаб бўлади.

Суд қарори билан, Асадбек Жумаев БҲМнинг 20 баравари – 8 млн 420 минг сўм жаримага тортилган.

Бош прокуратура бугун, 27 феврал куни эълон қилган баёнотга кўра, Uzbelas Performance автосервиси раҳбари Асадбек Жумаев иштирокидаги видеоинтервю ўрганиб чиқилган. Ўрганиш натижаларига кўра, ҳолатга холис ҳуқуқий баҳо бериш мақсадида 2026 йил 26 феврал куни Мирзо Улуғбек тумани прокуратураси томонидан Тошкент шаҳар судининг жиноят ишлари бўйича судлов ҳайъатига протест киритилиши таъминланган.

Таъкидлаш лозим, аввалроқ Ботиралибек Омонов раислигида кўрилган Li 9 ва BYD тўқнашувига оид иш ҳам шов-шув бўлганди. Ўшанда суд қарори билан Li 9 катта тезликда келиб урган BYD машинаси ҳайдовчиси зиммасига 798 млн сўм моддий зарар юкланган эди. Апелляция суди бу қарорни бекор қилиб, ишни суриштирувга қайтариб юборганди.

Аввалроқ Асадбек Жумаев ўз интервюсида бу воқеа видеотасвирга олиш учун қилинганини тан олганди. “Тўғрисини айтиб кетаман: уни қанақадир “нарочно” қилмаганмиз, у нарса YouTube видео учун қилинган”, – деганди у.

Эслатиб ўтамиз, кеча – 26 феврал куни Тошкент шаҳар ИИББ “атиги ўнта минималка билан қутулиб кетдик” дея ёлғон ахборот тарқатгани учун Жумаевни жавобгарликка тортди.

МЖтКнинг 202-2-моддасига асосан, жамоат тартибига таҳдид солувчи ёлғон ахборотни тарқатиш – БҲМнинг 50 бараваридан 100 бараваригача жаримага сабаб бўлади.