Покистонда юзлаб намойишчилар АҚШ консуллигига ҳужум қилди

Полиция куч ишлатиши оқибатида камида бир киши ҳалок бўлган.

Фото: Видеодан кадр

500 га яқин киши АҚШнинг Покистон жанубидаги Карачи шаҳрида жойлашган консуллиги биносига бостириб кирган. Бу АҚШ ва Исроилнинг зарбалари оқибатида Эрон диний раҳнамоси Али Хоминаий ўлдирилиши ортидан рўй берди, деб хабар қилди 1 март куни Associated Press. Агентликнинг ёзишича, акцияда шиа мазҳабига мансуб мусулмонлар иштирок этган.

Полиция ва ҳарбийлар намойишчиларни тарқатиш учун калтак ва кўздан ёз сиздирувчи газ қўллаган.

Маҳаллий полиция вакили Муҳаммад Жаводнинг сўзларига кўра, тўқнашув оқибатида камида бир киши ҳалок бўлиб, яна бир неча намойишчи яраланган.

Кейинроқ Покистон қутқарув хизмати Edhi АҚШ консулхонаси олдидаги намойиш чоғида олти киши ҳалок бўлгани ва яна бир неча киши яраланганини маълум қилди. Бу вақтда айрим манбаларда қурбонлар сони 10 нафарлиги ҳақида хабар берилган.

Исроил ва АҚШ Эронга 28 феврал куни ҳужум бошлади. Теҳронга йўлланган зарбалар оқибатида мамлакат олий раҳбари Али Хоминаий ҳалок бўлган.

Тайёрлаган Азиз Қаршиев

#Покистон #Карачи

Эрон ядро дастури бўйича музокаралар самарасиз тугаши ортидан, 2026 йил 28 феврал куни АҚШ ва Исроил Эрон ҳудудига зарбалар бера бошлади. Президент Доналд Трамп ҳужумлардан мақсад Теҳрондаги режимни ағдариш эканини эълон қилди. Эроннинг жавоб зарбалари АҚШнинг Яқин Шарқдаги базалари ва Исроил ҳудудларига қаратилди. Минтақадаги қатор шаҳарларда дронлар ёки ракеталар қулаши кузатилди.