Пентагон: Эрон флоти “жангга яроқсиз” — асосий кема чўктирилди

Эроннинг IRIS Dena фрегати, 4 март, чоршанба куни Шри-Ланка соҳиллари яқинида чўкиб кетди, у Америка сувости кемаси томонидан ҳужумга учраган. Бу АҚШ мудофаа вазири Пит Ҳегсетнинг Пентагондаги брифинг чоғидаги баёнотида айтилди. “Америка сувости кемаси халқаро сувларда ўзини хавфсиз деб ҳисоблаган Эрон ҳарбий кемасини чўктирди”, — деди АҚШ Мудофаа вазирлиги раҳбари. Ушбу идора президент Доналд Трамп фармони билан “уруш вазирлиги” деб қайта номлангани ҳам қайд этилди.

Ҳегсет гап қайси кема ҳақида кетаётганини аниқ айтмади. Бироқ бир неча соат олдин Эроннинг IRIS Dena фрегати Шри-Ланканинг ҳудудий сувлари яқинида ҳалокатга учрагани маълум бўлган эди. Ўша пайтда Reuters агентлиги манбаларга таяниб, кема сувости кемаси томонидан ҳужумга учраганини хабар қилган.

Пентагон раҳбари қўшимча қилиб, Америка ҳарбийлари ҳужумларидан кейин Эрон флоти “жанг қобилиятига эга эмас — йўқ қилинган, пароканда бўлган, тор-мор этилган” деди. Унинг айтишича, зарбалар Эроннинг энг қиммат ҳарбий кемаларидан бири — “Сулаймоний” синфига мансуб ракета катамарани-корветига ҳам берилган. Бу класс эронлик собиқ генерал Қосим Сулаймоний шарафига шундай номланган; у Доналд Трампнинг биринчи президентлик муддатида АҚШ ҳарбийлари томонидан ўлдирилган эди. “Менимча, АҚШ президенти уни икки марта ўлдирди”, — деди Ҳегсет.

Шри-Ланка ҳарбий-денгиз кучлари чоршанба куни кейинроқ маълум қилишича, чўккан IRIS Dena кемасидан ҳалок бўлганларнинг 87 та жасади олиб чиқилган, яна 32 киши қутқариб қолинган. Аввалроқ Шри-Ланка ташқи ишлар вазири Вижита Херат парламентда IRIS Dena бортида 180 киши бўлганини айтган эди. Шундан сўнг орол давлати қутқарув операцияси учун кемалар ва ҲҲК самолётларини йўллаган.

Ҳодиса АҚШ ва Исроилнинг Эронга қарши уруши бешинчи кунида содир бўлди. Икки мамлакат 28 феврал куни эрталаб Эрон ҳудудига зарба беришни бошлаган. АҚШ президенти Доналд Трамп Ислом Республикасининг ядровий дастурини йўқ қилиш нияти борлигини билдирган ва Эрон армиясини қурол ташлашга, мамлакат аҳолисини эса “тақдирини ўз қўлига олишга” чақирган.

Эрон давлат ОАВ 3 март куни Эрон Қизил Ярим Ой жамияти маълумотларига таяниб хабар беришича, зарбалар натижасида мамлакатда камида 787 киши ҳалок бўлган. Эрон олий раҳбари Али Хоминаий ва бир қатор юқори лавозимли куч тузилмалари вакиллари ҳалок бўлгани ҳам тасдиқланган. Эрон жавобан Исроилга ва Форс кўрфазининг бир қатор давлатларига зарба берган, у ерларда ҳам ҳалок бўлганлар бор. Теҳрон араб давлатлари билан уришмаётганини, балки минтақадаги АҚШ ҳарбий базаларига зарба бераётганини таъкидламоқда.