Еврокомиссия Зеленскийнинг Орбанга таҳдидини танқид қилди

Европа комиссияси (ЕК) Украина президенти Володимир Зеленскийнинг Венгрия бош вазири Виктор Орбанга қаратилган таҳдидларини танқид қилди ва уларни “қабул қилиб бўлмайдиган” деб атади. Бу ҳақда 6 март, жума куни, Брюсселда Европа комиссияси вакили Олоф Гилл тегишли баёнот берди. “Бундай турдаги тил қабул қилиб бўлмайди. Европа Иттифоқига аъзо давлатларга нисбатан таҳдидлар бўлмаслиги керак”, — деб келтирди унинг сўзларини AFP агентлиги. “Бизнинг мақсадимиз — ҳамма бироз тинчланиши, риторикани юмшатиши ва умумий мақсадларга эришиши”, — деди Гилл.

Ўз навбатида, Венгриядаги мухолифатдаги “Тиса” партияси етакчиси, Европа парламенти депутати Петер Мадяр Зеленскийни ўз сўзларига изоҳ беришга ва керак бўлса, уларни қайтариб олишга чақирди. “Мен аниқ айтиб қўймоқчиман: ҳеч бир хорижий етакчи ҳеч бир венгерга таҳдид қила олмайди”, — деб иқтибос келтирди сиёсатчининг сўзларини Венгриянинг 24.hu онлайн газетаси. Мадяр, шунингдек, “Дружба” қувури орқали нефт ўтказишни қайта тиклашга чақирди.

Венгриялик сиёсатчи Зеленский ва Россия президенти Владимир Путин томонидан бўлган “шантаж ва таҳдид уринишларини” энг қатъий тарзда рад этишини билдирди.

“Тиса” партияси раҳбари Венгриянинг энергия таъминоти миллий масала эканини, у партиявий сиёсат ва сайловолди кампанияси доирасидан ташқарида туришини таъкидлади. Мадяр, шунингдек, Зеленский ўз сўзларига аниқлик киритиб, Венгриядан узр сўрамагунича, Европа Иттифоқи раҳбарияти Украина билан барча муносабатларни тўхтатиши керак, деб ҳисоблайди.

Европарламент депутати фикрича, мамлакатга янги бош вазир керак, чунки Орбан доимий иғво ва қутқулар билан мамлакатни можаро ва тартибсизликка тортмоқда.

Венгрияда парламент сайловлари 12 апрел куни бўлиб ўтади.

Бундан аввал, 5 март куни, Украина президенти Володимир Зеленский, агар кимдир Киевга Европа ёрдамини тўсиб қўйишда давом этса, Украина қуролли кучларига “Европа Иттифоқидаги бир одамнинг манзилини” беришини айтган эди. Унинг сўзларидан гап Венгрия бош вазири Виктор Орбан ҳақида кетаётгани англашилган.

“Европа Иттифоқидаги бир одам 90 миллиардни, ёки шу 90 миллиарднинг биринчи траншини тўсиб қўймаслигига умид қиламиз, шунда украин жангчиларида қурол бўлади, акс ҳолда — ўша одамнинг манзилини қуролли кучларимизга берамиз. Қўнғироқ қилиб, у билан ўз тилида гаплашишади”, — деди Украина раҳбари. “Бу пулларга бизда бошқа муқобил вариант йўқлигини тушунамиз”, — дея қўшимча қилди у.

Венгрия 20 февралдан буён Украина учун Европа Иттифоқи ёрдамини тўсиб келмоқда. Гап 90 миллиард евролик кредит ҳақида кетмоқда, шундан 60 миллиард евро бевосита Украинанинг мудофаа эҳтиёжлари учун мўлжалланган.

Венгрия ўз ветосини шундай изоҳламоқда: Украина ҳудуди орқали ўтувчи “Дружба” нефт қувурига Россия зарба берганидан кейин, Киев гўёки таъмирлаш ишларини амалга оширмаётгани учун, мамлакат Россия нефтини олмай қўйган. Володимир Зеленский ўтган ҳафта Будапешт танқидига жавоб қайтарар экан, Россия нефтига Европа бозорида ўрин йўқлигини айтган эди.

Венгрия ташқи ишлар вазири Петер Сийярто сўзларига кўра, Будапешт “Дружба” қувури орқали Венгрияга нефт транзити қайта тикланмагунича ўз позициясини ўзгартирмайди.