“Беруний–Тўрткўл” йўли лойиҳаси бўйича пора талаб қилган мансабдор ушланди

Қорақалпоғистон Республикасида “Ўзйўлкўприк” кластери давлат муассасаси филиали мансабдор шахси қурилиш ишларини олиб бериш эвазига 10 минг АҚШ доллари талаб қилган вақтида тезкор тадбирда ушланди. Унга нисбатан жиноят иши қўзғатилиб, айни пайтда тергов ҳаракатлари олиб борилмоқда.

Фото: Давлат хавфсизлик хизмати

“Ўзйўлкўприк” кластери давлат муассасасининг Қорақалпоғистон Республикаси филиали мансабдор шахси хизмат мавқеидан фойдаланган ҳолда қурилиш фаолияти билан шуғулланувчи МЧЖга ўзининг юқори лавозимда ишловчи танишлари орқали “Беруний–Тўрткўл” А380-сонли магистрал йўл қурилиши лойиҳасининг 5 километрлик иш ҳажмини олиб беришни ваъда қилган.

Эвазига у МЧЖ раҳбаридан 10 минг АҚШ доллари талаб қилган.

Давлат хавфсизлик хизматининг Қорақалпоғистон Республикаси бўйича бошқармаси ходимлари томонидан ўтказилган тезкор тадбир давомида ушбу мансабдор шахс сўралган пул маблағини олган вақтида қўлга олинди.

Ҳозирда унга нисбатан Жиноят кодексининг 168-моддаси 3-қисми “в” банди ва 28,211-моддаси 1-қисми билан жиноят иши қўзғатилиб, тергов ҳаракатлари олиб борилмоқда.

Фуқаролардан шу каби қонунбузилиш ҳолатларга дуч келса, Давлат хавфсизлик хизматининг 1520 қисқа рақамига қўнғироқ қилиб хабар бериш сўралган. Шахснинг сир сақланиши кафолатланади.