Reuters: Эроннинг янги раҳбари деэскалация бўйича таклифларни рад этди

Эроннинг янги олий раҳбари Мужтаба Хоминаий Яқин Шарқдаги можарони юмшатиш бўйича, Теҳронга икки воситачи давлат вакиллари орқали етказилган таклифларни рад этди. Бу ҳақда 17 март, сешанба куни Reuters агентлиги юқори лавозимли эронлик амалдорга таяниб хабар қилди.

Агентлик суҳбатдошининг, исми сир сақланган ҳолда айтган сўзларига кўра, Хоминаий Эрон АҚШ ва Исроилдан “қаттиқ ва жиддий” қасос олиши керак, деб ҳисоблайди. Бу позиция у янги олий раҳбар этиб тайинланганидан кейин ташқи сиёсат бўйича ўтказилган биринчи йиғилишда баён қилинган. Шу билан бирга, у учрашувда шахсан иштирок этган-этмаганига аниқлик киритилмаган.

Мужтаба Хоминаий 8 март куни тайинланганидан буён жамоатчилик олдида кўрингани йўқ. Хоминаийнинг халққа қаратилган 12 мартдаги биринчи мурожаати матнини Эрон давлат телеканали бошловчиси ўқиб эшиттирган.

Воситачилар орқали етказилган “кескинликни пасайтириш ёки ўт очишни тўхтатиш” ҳақидаги таклифларга жавобан, Эрон раҳбари “то Қўшма Штатлар ва Исроил тиз чўктирилмагунича, мағлубиятни тан олмагунича ва товон тўламагунича, тинчлик учун муносиб вақт бўлмайди”, деб билдирган, деди эронлик амалдор.

Бундан олдин дипломатик саъй-ҳаракатлардан хабардор Reuters манбалари АҚШ президенти Доналд Трамп маъмурияти Яқин Шарқдаги иттифоқчиларнинг Эрон билан урушни тўхтатиш бўйича музокараларни бошлаш таклифларини қайтарганини хабар қилган эди. Шу билан бирга, Теҳрон АҚШ ва Исроил томонидан берилаётган зарбалар тўхтамагунича ҳар қандай сулҳ имкониятини рад этмоқда.