Санъаткорлар ҳар бир тўй учун алоҳида солиқ тўлашига тўғри келиши мумкин

Ўзбекистонда концерт-томоша фаолияти билан шуғулланувчи шахсларни солиққа тортиш бўйича янги тартиб режалаштирилмоқда. Адлия вазирлиги бу ҳақда президент қарори лойиҳасини жамоатчилик муҳокамасига қўйди.

Таклиф қуйидагича: 2026 йил 1 сентябрдан бошлаб ижрочилар ва ижодий жамоаларнинг ижодий фаолияти билан боғлиқ барча хизматлари солиқ органларининг “Soliq” мобил иловасида рўйхатга олинади.

Ижрочилар 2026 йил 1 сентябрдан 2029 йил 1 январга қадар жисмоний шахслардан олинадиган даромад солиғини “бир хизмат – бир тўлов” тамойили асосида, қатъий белгиланган миқдорларда тўлайди. (Меҳнат шартномаси асосида меҳнат вазифаларини бажариш билан боғлиқ ижодий фаолият бундан мустасно).

“Бир хизмат – бир тўлов” тамойили доирасидаги солиқ миқдори санъаткорнинг рейтинги ва хизмат кўрсатилган жойга боғлиқ бўлиб, базавий ҳисоблаш миқдори билан ўлчанади:

• 1-рейтинг гуруҳи ижрочилари: Тошкент шаҳрида – 3 БҲМ (ҳозирда 1 млн 236 минг сўм); Нукус шаҳрида ва вилоят марказларида – 2 БҲМ (ҳозирда 824 минг сўм); бошқа шаҳарлар ва қишлоқ жойларда – 1 БҲМ (ҳозирда 412 минг сўм).
• 2-рейтинг гуруҳи ижрочилари: Тошкент шаҳрида – 2 БҲМ; Нукус шаҳрида ва вилоятлар марказларида – 1 БҲМ; бошқа шаҳарлар ва қишлоқ жойларда – 0,5 БҲМ.
• 3-рейтинг гуруҳи ижрочилари: Тошкент шаҳрида – 1 БҲМ; Нукус шаҳрида ва вилоят марказларида – 0,5 БҲМ; бошқа шаҳарлар ва қишлоқ жойларда – 0,25 БҲМ.

Юқорида келтириб ўтилган тартиб 2026 йил 1 сентябрдан жорий этилган тақдирда, шу санадан эътиборан концерт-томоша фаолиятини амалга оширувчилар учун якка тартибдаги тадбиркорлар сифатида айланмадан олинадиган солиқни тўлаш тартиби татбиқ этилмайди.

Ижрочилар томонидан мобил иловага тегишли маълумотлар киритилмаслиги ва белгиланган миқдордаги тўлов амалга оширилмаслиги – лицензия талабларини қўпол равишда бузиш деб ҳисобланади.

2026 йил 1 сентябрдан тегишли маълумотлар “Soliq” иловасига киритилмаган ва белгиланган тўлов амалга оширилмаган тақдирда:

• бу – солиқ базасини яшириш (камайтириб кўрсатиш) деб эътироф этилади ҳамда шартномалар ўртача қийматининг 20 фоизи миқдорида, лекин 20 БҲМ (ҳозирда 8 млн 240 минг сўм)дан кам бўлмаган суммада жарима қўлланилади.
• ушбу ҳуқуқбузарлик ҳақида хабар берган жисмоний шахсларга, ушбу маълумот асосида ўтказилган текшириш якунига кўра ҳуқуқбузардан ундирилган жарима суммаси ҳисобидан қўлланилган жариманинг 20 фоизи миқдорида мукофот тўланади.

Маданият вазирлигининг ҳудудий бўлимлари маҳалла солиқ инспектори билан биргаликда ўзига бириктирилган ҳудудда жойлашган тўй-маросимлар ўтказиладиган жойлар, ресторанлар, концерт заллари, стадионлар, клублар, дискотекалар, кафе-барларда, тантаналар залларида ижрочилар қонуний асосда ижодий хизмат кўрсатаётганини мунтазам назорат олиб боради.

2029 йил 1 январдан бошлаб эса:

• концерт-томоша фаолиятини лицензия асосида амалга оширувчилар ўз хизмати учун тўловни фақат нақдсиз шаклда қабул қилиши талаб этилади;
• жисмоний шахслардан олинадиган даромад солиғи ставкаси ижрочилар ва мижозлар ўртасидаги шартнома қийматидан келиб чиққан ҳолда, бироқ қатъий миқдорлардан кам бўлмаган миқдорда белгиланади;
• концерт-томоша хизматларини кўрсатиш – аҳоли ва барча субъектлар томонидан “Soliq” мобил иловасида хизмат кўрсатиш жойи, санаси, қиймати тўғрисидаги маълумотларни акс эттириш билан бир қаторда, масъулиятни ўз зиммасига олган ҳолда оммавий оферта тарзидаги шартномаларни рўйхатдан ўтказиш тартибида амалга оширилади;
• жисмоний шахслардан олинадиган даромад солиғи ва ижтимоий солиқни ҳисоблаш, ушлаб қолиш, бюджетга ўтказиш, ҳисоботларни тақдим этиш солиқ органи томонидан автоматик тарзда амалга оширилади; бунда солиқ органлари солиқ ҳисоботини тақдим этиш муддатидан кечиктирмай солиқ суммасини мобил иловага бириктирилган банк карталаридан автоматик тарзда ундириб олади, етарли маблағ мавжуд бўлмаган қисми бўйича эса ҳисобот куни тўлов хабарномаси юборилади;
• йиллик умумий даромаднинг 30 фоизи миқдоридаги харажатлар тасдиқловчи ҳужжатларсиз чегириб ташланади;
• тасдиқланган харажатлар суммаси умумий даромаднинг 30 фоизидан ошган тақдирда, қўшимча равишда ушбу даромаднинг 10 фоизи миқдори чегирилади;
• лицензия олиш учун ундирилган давлат божи ва ижтимоий солиқ суммалари харажат сифатида қайд этилади ҳамда даромадлар таркибидан чегирилади.

Қарор лойиҳаси бўйича жамоатчилик муҳокамаси 10 апрелгача давом этади.