Аббос Файзуллаев: Жаҳон чемпионатида гуруҳдан чиқишимиз ҳайрон қоларли иш бўлмайди!

Жаҳон чемпионати саралаш босқичида майдонга чиққан, ўзини кўрсатган, кўп меҳнати сингган футболчилар билан интервьюлар бериб боряпмиз. Навбат “Истанбул Башакшеҳир” клуби ва миллий жамоа ҳужумкор яримҳимоячиси Аббос Файзуллаевга. Биз Истанбулга сафаримиз давомида Миллий жамоамизнинг мухлислар ёқимтойига айланган футболчимиз билан эксклюзив суҳбат уюштирдик.

Миллий жамоадаги рақобат

- Мен миллий жамоага энг кичик ўйинчилардан бири сифатида борганман. Аммо барибир ўша рақобатга тайёр бўлиб бориш керак. Балки ўша пайт тайёр бўлмаган бўлишим мумкиндир, лекин катта футболда ўзингизга ишончингизни майдонда кўрсатмасангиз, бунақа рақобатни ёриб ўтиш қийин. Боз устига миллий жамоада босим ҳам кучли, тажрибалироқ ўйинчилар бор у ерда.

Футболда жой ҳеч қачон кафолатланмайди. Ўша пайтдаги ҳолатингиздан келиб чиқиб, агар яхши формада бўлсангиз, тренер лойиқ кўрса, ўйинга туширади. Агар ёмон формада бўлсангиз, терма жамоа масъулияти кучли бўлгани учун бунақа рискка ҳеч ким бормаса керак.

Россиядан Туркияга

ЦСКАда совринларни ютдик, бундан хурсанд эдим. Бироқ янги мураббий келгач, майдондаги позициямни ўзгартирди. Бу эса ўйинимда пасайиш бўлишига сабаб бўлди, деб ўйлайман. Чунки аввал унақа позицияда ўйнамаганман, ундай функцияларни бажармаганман. Шу туфайли ўсишдан тўхтадим озроқ, менимча.

Шартномам тугашига бир йил қолган эди. Фаолиятимда ўзгариш қилишни, Европада ўйнашни, еврокубокларда иштирок этишни истадим. Москвада ҳаммаси яхши эди, мени клубдагилар ҳам, мухлислар ҳам яхши кўришарди. Бироқ еврокубокларда ўйнаш, топ-5 чемпионатлардан бирига ўтиш учун трамплинни излаш истаги Туркияни танлашда муҳим роль ўйнади. Сиёсий ҳолат туфайли Россиядан янада кучлироқ жойга кетиш амримаҳол эди. Туркияда эса бундай тўсиқ йўқ.

Ҳозир бош мураббий Нури Шаҳин билан муносабатларимиз яхши, ўйин амалиёти бор. Туркиядагилимдан мамнунман.

Бошида бу ерда ҳам осон бўлмади. Мослашишга вақт керак бўлди. Боз устига Шаҳиндан аввалги мураббий мени ўйинларга туширмади. Хафа бўлдим. Кейин эса эндигина ўйинларда қатнаша бошлагач, миллий жамоада жароҳат олдим. Бироқ айбни ўзимдан қидирдим ва бу паузалар менга фойда бўлди, дейишим мумкин. Ўтириб, ҳаммасини ўйлаб олдим. Бунақаси кетмайди, дедим ўзимга ўзим.

Европа амбициялари ҳақида

Идеалимда “Барселона”да ўйнаш. Аммо реал қарасак, бу жуда қийин. Ақалли испаниянинг ўртамиёна жамоаларидан бирига ўтиб, ўйин амалиётига эга бўлиш. Уёғини кейин кўрамиз. Мен доим Испанияда ўйнашни орзу қилганман ва бу мақсадимдан чекинмайман. Агар пул устувор бўлганида, Саудия Арабистонига кетишим мумкин эди, чунки бу вариант ҳам бор эди менда. Айнан топ-5 чемпионатларидан бирида ўйнаш истагим туфайли Туркиядаман.

Жаҳон чемпионатига йўлланма ҳақида

Жаҳон чемпионатига йўл осон бўлмади. Абу-Дабидаги ўйинда ҳакам ҳуштак чалганидан кейин барча орзуларим, бутун фаолиятим кўз олдимдан ўтди. Елкамдан тоғ ағдарилгандек бўлди. Стадионда отам ва акам бор эди. Уларнинг хурсандчилигини кўрдим. Ўзим унча-мунчага йиғлайдиган одам эмасман, аммо ўша пайт қувонч кўзёшларини тиёлмадим.

Кейинги Қатарга қарши ўйинга бемалол, ҳеч қанақа босимсиз, эркин, фақат футболдан завқ олиш учун чиқдик.

“Жаҳон чемпионатида биз...”

Орзу ўз йўлига, бироқ реал қарайдиган бўлсак...

Жаҳон чемпионатига ҳеч ким ютқазамиз деб бормайди. Ўзимиздан максимал кўпроқ нарсани хоҳлашимиз керак. Гуруҳдан чиқсак, менимча, ҳеч ким бундан норози бўлмайди. Асосий ўйинчилар соғ-омон бўлиб турса, гуруҳдан чиқишимиз мумкин. Буни инкор қилмасдим. Колумбия ҳам, Португалия ҳам кучли рақиб. Лекин футболда ҳамма нарса бўлиши мумкин.

Руҳий жиҳатдан Мундиалга тайёрман. Шунча вақтдан бери орзу қилиб юриб, эришгандан кейин уёққа тайёр бўлмай боришнинг иложи ҳам йўқ ва ҳаққимиз ҳам йўқ. Ота-она, яқинлар, Ўзбекистон бизга кўз тикиб турибди, ахир.

Аббос Файзуллаев билан тўлиқ интервьюни Kun.uz’нинг Youtube саҳифасида томоша қилишингиз мумкин.