InfinBANK Мадина Касимбаева сўзаналарининг ижодий намойишини қўллаб-қувватлади

Тадбир доирасида янги ишлардан парчалар намойиш этилди. Уларда анъанавий ўзбек каштачилик санъати замонавий дизайн талқинида акс эттирилди. Кўргазма санъат ихлосмандлари, дизайнерлар ҳамда ишбилармон доира вакилларини бирлаштирган ёрқин маданий воқеага айланди.

Мадина Касимбаева ўзига хос услуби билан танилган бўлиб, унда миллий нақшлар, чуқур рамзийлик ва замонавий бадиий ечимлар уйғунлашган. Унинг ишлари нафақат маданий меросни асраб қолади, балки уни қайта талқин қилиб, замонавий мода ва интерьерда ҳам долзарб қилади.

Бундай ташаббусларни қўллаб-қувватлаш InfinBANK’нинг маданий ва ижтимоий лойиҳаларни ривожлантириш стратегиясининг бир қисми ҳисобланади. Банк Ўзбекистон миллий меросини асраш ва оммалаштиришга қаратилган тадбирларнинг доимий ҳамкори сифатида фаол иштирок этиб келмоқда.

“InfinBANK истеъдодли усталарни қўллаб-қувватлаш имкониятидан фахрланади. Улар нафақат анъаналарни сақлаб қолади, балки уларга янги мазмун бағишлайди. Бундай лойиҳалар мамлакатнинг маданий қиёфасини шакллантиради ва креатив саноатларнинг ривожланишига илҳом беради”, — деди InfinBANK маркетинг ва мижозларга хизмат кўрсатиш бўйича директори Элвира Гимадиева. 

Санъат вакиллари билан ҳамкорлик банкнинг нафақат молиявий институт, балки мамлакат маданий ҳаётининг фаол иштирокчиси бўлишга интилишини ҳам акс эттиради.

Кўргазма ўзбек ҳунармандчилиги анъаналари яшаб келаётгани ва ривожланишда давом этиб, янги аудитория орасида ҳам қизиқиш уйғотаётганининг яна бир тасдиғи бўлди.

Реклама ҳуқуқи ассосида