Қамчиқ довонида сотувчини милтиқ билан жароҳатлаган эркак 4 йилдан кўпроққа қамалди

Оҳангаронда дўконга қурол билан бостириб кириб, сотувчига таҳдид қилган эркак жиноий жазога тортилди. Kun.uz суд ҳужжати билан танишди.

Суд ҳукмига кўра, 1992 йилда туғилган Д.К. 2025 йил 22 октябр куни тунда Қамчиқ довонидаги дўконда савдо қилувчи Ш.Н.нинг олдига борган. Улар аввалдан ўзаро таниш бўлишган. Эркак Ш.Н.ни ўлдириш билан қўрқитиб, қўлидаги милтиқ билан унинг бош қисмига урган. Оқибатда сотувчи аёл жароҳатланган.

Д.К. судда айбига қисман иқрорлик билдириб, аёлни ўлдириш нияти бўлмаганини айтган. Эркак ўз кўрсатмасида Ш.Н. билан оила қурмоқчи бўлганини, Россияда ишлаб юрганида уй олиш учун унга пул жўнатганини, сўнгра ундан шу пулларни сўрай бошлаганини айтган.

“Турли баҳоналарни айтиб, мени алдаб келди. Ўша куни ов қуролим ва 2 дона патронни олиб, ҳовлида юрган дайди итларни отиш учун уйдан чиқдим. Шу орада унга қўнғироқ қилиб, олган нарса ва буюмларингни бериб юбордингми, деб сўрадим. У “Вақтим бўлмаяпти, ҳар куни ишдаман” деди. Шунда тайёрлаб қўйишини, ўзим бориб олиб кетишимни айтдим. Сўнг кўчада бўлганим сабабли пиво ичдим.

Шу орада такси чақирдим. Ов қуролимни уйга ташлаб чиқишга эриниб, ўзим билан бирга олиб кетдим. У ишлайдиган дўконга бордим. Олдига кириб, ўзимнинг нарсаларимни сўраган вақтимда у мени эшитишни истамасдан, гап қайтарди. Шунда бош қисмига ов қуролимнинг қўндоғи билан бир маротаба урдим”, деган у судда.

Жабрланувчи Ш.Н. эса ҳақиқатан ҳам Д.К. Россиядан пул жўнатганини, унинг маълум қисмини ўртоғи олиб кетганини, яна бир қисмини эса унинг ўзи бўлиб-бўлиб олганини айтган.

“Шундан кейин орамизга совуқчилик тушиб, тез-тез уришадиган бўлдик. У мени ўзининг уйида ов милтиғи билан ўлдиришини айтиб, қўрқитиб келди. Ушбу ҳолат бўйича унинг яқин қариндошларига ҳам бир неча маротаба айтганман. Шунда ҳам у ўзига тегишли хулоса чиқармасдан, менга тазйиқ ўтказишда давом этиб келди”, деган аёл ўз кўрсатмасида.

ЖИБ Оҳангарон туман судининг 2026 йил 1 апрелдаги ҳукми билан Д.К. Жиноят кодексининг 112-моддаси (ўлдириш ёки зўрлик ишлатиш билан қўрқитиш) 1-қисми ва 277-моддаси (безорилик) 3-қисми “б” бандида назарда тутилган жиноятларни содир этганликда айбли деб топилди. Унга 4 йил 3 ой озодликдан маҳрум қилиш жазоси тайинланди. Жазони манзил колонияларда ўташ белгиланди. 

Д.К. Қамчиқ довонидаги савдо дўконига милтиқ билан бостириб кириб, сотувчини ургани аввалроқ хабар қилинганди. Орадан кўп ўтмай у қамоққа олинганди.