Фарғона вилоятининг 5 та ҳудудида ҳоким алмашди

Президент ташрифи ортидан Фарғона вилоятининг Фарғона, Бағдод, Бешариқ ва Ўзбекистон туманларига, шунингдек, Марғилон шаҳрига янги ҳокимлар тайинланди.

Бугун, 29 апрел куни халқ депутатлари Бағдод туман кенгашининг навбатдан ташқари сессияси бўлиб ўтди.

Вилоят ҳокими Хайрулло Бозоров томонидан туман раҳбарлиги учун тақдим этилган Ҳожиқўзижон Қосимжонович Исоқов номзоди депутатлар томонидан якдиллик билан қўллаб-қувватланди.

Ҳожиқўзижон Исоқов 2021-2025 йилларда Фарғона вилояти ҳокимининг қурилиш, коммуникациялар, коммунал хўжалик, экология ва кўкаламзорлаштириш масалалари бўйича ўринбосари сифатида ишлаган, сўнгги вақтларда Фарғона вилояти 426-хўжаликлараро ихтисослашган кўчма механизмлар колоннаси МЧЖ бошлиғи лавозимида фаолият юритётганди.

Бағдод туманига 2024 йил февралидан буён Ғанижон Солиев раҳбарлик қилаётганди.

Нодиржон Рўзибоевич Машрапов Фарғона туманининг янги ҳокими этиб тайинланди.

Машрапов муқаддам Кадастр агентлиги Фарғона вилояти бошқармаси бошлиғи лавозимида ишлаган.

У туманга 2022 йил октябридан буён раҳбарлик қилиб келган Иномов Ҳамидулло ўрнини эгаллади.

Ўзбекистон туманига Расулжон Жўраев ҳоким этиб тайинланди.

У 1973 йилда Риштон туманида туғилган. 2000 йилда Тошкент ирригация ва кишлок хўжалигини механизациялаштириш мухандислар институтини тугатган. 2017 йилдан буён Фарғона вилоятининг Бешариқ туманини бошқариб келаётганди.

У Ўзбекистон туманига 2025 йил мартидан буён раҳбарлик қилиб келган Равшанбек Бегматов ўрнини эгаллади.

Ўз навбатида, Бешариқ туманида ҳам Жўраев ўрнига янги раҳбар иш бошлаган. Бу лавозимни Илёс Валериевич Новиков эгаллади.

Новиков 2018–2024 йилларда Фарғона вилоятининг Қўштепа тумани ҳокими бўлиб ишлаган. 2024 йил январ ойи охирида ўтказилган йиғилишда президент Шавкат Мирзиёев 2023 йилда 16 та туманда бирорта кўп қаватли уй-жой қурилмагани, ҳокимлар буни режа ҳам қилмаганини айтган ва бош вазирга мазкур туманлар ҳокимларининг лавозимига лойиқлигини кўриб чиқишни топширган эди. Шу йиғилишдан кейин Новиков ҳам ишдан кетганди.

Президентнинг Фарғона вилоятига ташрифи доирасида Марғилон шаҳри ҳокими Шукуруллохон Нисбатхонов ҳам лавозимидан озод этилди.

Унинг ўрнига Элбек Рустамович Рустамов шаҳарнинг янги раҳбари тайинланди.

Бунгача у Марказий банк Фарғона вилояти бош бошқармаси бошлиғи ўринбосари бўлиб ишлаган.

Муқаддам Фарғона вилояти ва Қашқадарё вилояти давлат солиқ бошқармаси раҳбари лавозимларида ишлаган Шукуруллахон Нисбатхонов 2023 йил августида Марғилон шаҳри ҳокими лавозимига тайинланганди. Ўша йил ноябрида «Яшил макон» умуммиллий лойиҳаси доирасида ва 2023-2024 йилги куз-қиш мавсумига тайёргарлик кўриш бўйича амалга оширилиши лозим бўлган ишларга бефарқлик билан ёндашиб, ўзига юклатилган вазифаларга масъулиятсизлик билан қарагани учун ҳайфсан жазосини олганди.