Энг кўп солиқ ва божхона имтиёзини олган компаниялар маълум қилинди

Коррупцияга қарши курашиш агентлиги Солиқ ва Божхона қўмиталаридан олинган маълумотлар асосида солиқ тўловчиларнинг 2025 йил якуни бўйича солиқ ва божхона имтиёзларидан фойдаланиш ҳолатларини таҳлил қилди.

Ўтган йилда умумий солиқ ва божхона имтиёзлари қиймати 178,1 трлн сўмни (2023 йилда 127,1 трлн сўм, 2024 йилнинг биринчи ярмида 63,4 трлн сўм) ташкил этган. Яъни шунча маблағ корхона ва ташкилотларнинг ихтиёрида қолдирилган.

178,1 трлн сўм имтиёздан 119 трлн сўм солиқ, 59,1 трлн сўмини божхона имтиёзлари ташкил этади.

Навоий ва Олмалиқ кон-металлургия комбинатлари ҳамда банклардан ташқари энг кўп имтиёздан фойдаланган ташкилот – Uzbekistan GTL. Компанияга 2,8 трлн сўмлик солиқ имтиёзлари берилган. Кейинги ўринларда Uzbekistan Airways (2,4 трлн сўм) ва Ўзбекнефтгаз (1,7 трлн сўм). Кучли бешликдан Ўзбекистон темирйўллари (1,1 трлн сўм) ҳамда UzAuto Motors (899 млрд сўм) ҳам жой олган.

Ўзбекистонда табиий газни марказлашган тартибда харид қилиш ва сотиш функциясини бажарувчи UzGasTrade 2025 йилда энг кўп божхона имтиёзларидан фойдаланган – 2,1 трлн сўм. Шунингдек, темирйўл релслари учун темирбетон шпал ишлаб чиқарувчи RWS Optimum’га – 1,4 трлн сўм, Enter Engineering Қораўзак ИЭС’га 1,1 трлн сўм имтиёз берилган.

Доимий равишда божхона имтиёзидан энг кўп фойдаланган 5 та ташкилотнинг 4 таси Enter Engineering’га алоқадор тузилмалар. Улар 1,8 трлн сўмдан ортиқ имтиёздан фойдаланган.

Шунингдек, 2025 йил давомида Марказий Осиё – Хитой газ қувурлари тармоғининг Ўзбекистондан ўтган қисми оператори – Asia Trans Gas 860 млрд сўмлик, My Freighter МЧЖ 660 млрд сўмлик, Humo тўлов тизими 542 млрд сўмлик солиқ имтиёзидан, Trest 12 қурилиш компанияси  519 млрд сўмлик, Gorilla Energy МЧЖ эса 414 млрд сўмлик божхона имтиёзидан баҳраманд бўлган.