Трампнинг ўғиллари Қозоғистон вольфрамига сармоя киритди

АҚШ президенти Доналд Трампнинг ўғиллари – кичик Доналд Трамп ва Эрик Трамп Қозоғистоннинг дунёдаги энг йирик вольфрам конини ўзлаштираётган компанияда улушга эга бўлди, деб хабар берди Financial Times.

Келишув, жумладан, лойиҳа АҚШ ҳукуматидан 1,6 миллиард долларгача ёрдам олгани ва президент ўғилларининг сармояси бу факт оммага маълум бўлишидан олдин амалга оширилгани учун эътиборни тортди.

Ака-укалар 2025 йил август ойида Dominari Securities билан боғлиқ махсус инвестиция воситаси орқали Skyline Builders қурилиш компаниясидаги улушларни сотиб олишди. Октябрь ойи охирида улар деярли 24 миллион долларлик акцияларни хусусий жойлаштиришда иштирок этиб, ўз позицияларини оширдилар - 22 сентябрь куни Қозоғистон президенти Қосим-Жўмарт Тўқаев Доналд Трампга йирик вольфрам лойиҳасини Американинг Cove Kaz Capital гуруҳига ўтказиш нияти ҳақида хабар берганидан сўнг.

31 октябрь куни Skyline Нью-Йоркдаги Cove Capital гуруҳининг «шуъба корхонаси» бўлган Kaz Resources компаниясининг 20 фоиз улушини 20 миллион долларга сотиб олди. 6 ноябрь куни Cove Capital ва Қозоғистоннинг «Таю-Кен Самрук» миллий тоғ-кон компанияси дунёдаги энг йирик ўзлаштирилмаган вольфрам ресурси мақомига даъвогар бўлган Шимолий Катпар ва Юқори Қайроқтини биргаликда ўзлаштиришини расман эълон қилди. Келишув доирасида Cove Kaz лойиҳанинг 70 фоизини, Қозоғистон томони эса 30 фоизини олади.

2026 йил 30 апрелда Cove Kaz Capital, Kaz Resources ва Skyline бирлашишни якунлади ва янги бирлашган компания Kaz Resources бренди остида Nasdaq биржасига чиқишни режалаштирмоқда. Бирорта ҳам расмий пресс-релизда кичик Доналд ёки Эрик Трампнинг исми тилга олинмаган.

Америка Эксимбанки лойиҳани молиялаштириш учун 900 миллион долларгача, Халқаро тараққиёт корпорацияси (DFC) эса яна 700 миллион долларгача маблағ ажратишга тайёрлигини билдирди. Cove Capital раҳбари Пини Алтхаус нашрга президент Трамп, давлат котиби Марко Рубио ва савдо вазири Ҳовард Лютникдан «бевосита ёрдам» олганини айтди. Унинг сўзларига кўра, у шахсан Трампнинг ўғиллари билан гаплашмаган ва уларнинг Skyline’даги улушининг аниқ миқдорини билмайди.

Кичик Доналд Трампнинг вакили уни «пассив инвестор» деб атади ва у «ҳеч қандай компаниялар номидан федерал органлар билан ҳамкорлик қилмаслигини» таъкидлади. FT нашрининг ёзишича, ака-укалар акцияларни дастлабки сотиб олиш пайтида бўлажак шартнома ҳақида билган ёки унинг тузилишига таъсир кўрсатган деб ҳисоблашга асос йўқ. Шунга қарамай, демократлар аниқ манфаатлар тўқнашувига ишора қилмоқда - бу кичик Трампнинг 1789 Capital венчур фонди унга сармоя киритганидан сўнг давлат шартномасини қўлга киритган Vulcan Elements ноёб ер элементлари билан боғлиқ воқеага ўхшайди.

Вольфрам зирҳли снарядлар, бурғулаш асбоблари ва кинетик ракеталар ишлаб чиқаришда қўлланилади. Тоғ-кон саноати бўйича стратег Кристофер Экклстоуннинг сўзларига кўра, «вольфрам ҳозир Пентагоннинг асосий истаги, улар уни ҳар қандай нархда хоҳлайди». Бироқ, таҳлилчиларнинг огоҳлантиришича, Қозоғистон конлари жуда эрта босқичда бўлиб, саноат даражасига чиқиш учун анча вақт ва сармоя талаб қилади.