Қирғиз-тожик-ўзбек чегарасидаги «Дўстлик» халқаро савдо-иқтисодий парки концепцияси тақдим этилди

Умумий майдони 100 гектар бўлган мажмуа маъмурий, туризм, логистика, ишлаб чиқариш, тижорат ва истироҳат боғларини ўз ичига олади.

Фото: president.kg

Қирғизистон президенти Садир Жапаров Боткен вилоятига қисқа муддатли ташрифи чоғида Қирғизистон, Тожикистон ва Ўзбекистон давлат чегаралари туташган нуқтада ўрнатилган Дўстлик стеласи ҳамда «Дўстлик» халқаро савдо-иқтисодий парки концепцияси билан танишди.

Эслатиб ўтамиз, 2025 йил 31 март куни уч давлат раҳбарлари қардош халқлар дўстлиги, чегара масалаларини ҳал этиш ва минтақавий ҳамкорликнинг янги босқичини ифодаловчи рамзий стела очилиш маросимида онлайн тарзда иштирок этган эди.

Шунингдек, Садир Жапаровга уч давлатнинг чегара ҳудудида «Дўстлик» халқаро савдо-иқтисодий паркини қуриш лойиҳасининг бош режаси тақдим этилди. Тақдим этилган концепцияга кўра, умумий майдони 100 гектар бўлган мажмуа маъмурий, туризм, логистика, ишлаб чиқариш, тижорат ва истироҳат боғларини ўз ичига олиши мумкин. Лойиҳа савдо-логистика алоқаларини ривожлантириш, инвестицияларни жалб қилиш ва янги иқтисодий имкониятларни яратишга қаратилган.

Лойиҳа амалга оширилса, 5 мингдан ортиқ иш ўрни яратилиши ва чегараолди савдоси ҳажми ошиши кутилмоқда.

Шунингдек, концепция туризм инфратузилмасини ривожлантириш, халқаро маданий тадбирлар, этнофестиваллар ва кўргазмалар ўтказишни назарда тутади, бу эса маданий-гуманитар алоқаларни мустаҳкамлаш ва Буюк Ипак йўлининг тарихий меросини тарғиб қилишга хизмат қилади.

Жапаров Қирғизистон, Тожикистон ва Ўзбекистон ўртасидаги яхши қўшничилик муносабатларини янада мустаҳкамлаш муҳимлигини таъкидлаб, минтақадаги барқарорлик ва изчил тараққиёт учун қўшма инфратузилма ва иқтисодий ташаббусларнинг стратегик аҳамиятини қайд этди. Шунингдек, у «Дўстлик» халқаро савдо-иқтисодий парки лойиҳасини уч мамлакатнинг яқин ҳамкорлиги ва ўзаро ҳамкорлиги орқали муваффақиятли амалга ошириш мумкинлигини таъкидлади.

Якунда Садир Жапаров томонларнинг ўзаро қўллаб-қувватлаши билан ушбу лойиҳа савдо ва инвестициялар учун йирик майдонга, шунингдек, Марказий Осиё халқлари ўртасидаги тинчлик, ишонч ва бирдамлик рамзига айланишига ишонч билдирди.