Трампнинг компанияси криптовалютада 405 млн доллар йўқотди

Trump Media компаниясининг 2025 йилда криптовалютага киритган инвестициялари биринчи чоракда кўпмиллионлик зарар келтирди. Трамп ушбу компаниянинг 53 фоиз акциясига эгалик қилади.

Фото: AP

Truth Social ижтимоий тармоғига эгалик қилувчи ва АҚШ президенти Доналд Трамп оиласи томонидан назорат қилинувчи Trump Media & Technology Group Corp. компанияси ҳисоботига кўра, 2026 йилнинг биринчи чорагида криптовалюта бўйича реализация қилинмаган зарарлар сабабли даромадлар 405,9 миллион долларга камайгани қайд этилган.

Компаниянинг ўтган йили криптовалютага инвестиция киритиши кўпмиллионлик зарарга олиб келган. Бунинг қарийб 370 млн доллари рақамли активлар ва акциялар бўйича бажарилмаган мажбуриятларга тўғри келади.

CoinGecko маълумотига кўра, ҳозирда Trump Media ҳисобида ўтган йил июлида 108,5 минг доллардан сотиб олинган 9500дан ортиқ биткойн бор. Компания феврал охирида 2000 биткойнни сотди. Ўшанда унинг нархи 70 минг доллардан сал арзон эди. Ҳозирда бир биткойн нархи 80 минг доллардан ортиқроқни ташкил этмоқда.

Апрел охирида Trump Media бош директори Девин Нунйес компания акциялари нархи 2022 йилдан бери 90 фоиздан ортиқроққа тушиб кетгани боис истеъфога чиққанди. Ўша пайтда акция нархи 97 доллардан баландроқ бўлган, ҳозирда эса 8,93 долларга тенг.

Ўтган йил ноябрида биткойн нархининг кескин қулаши ортидан Trump Media 400 млн доллар йўқотганди.

Трамп Trump Media компаниясининг 53 фоиз акциясига эга йирик акциядори ҳисобланади.