Шанба куни тонгида Москвадаги Қизил майдонда Иккинчи жаҳон урушидаги ғалабанинг 81 йиллигига бағишланган ҳарбий парад ўтказилди.
Украинадаги уруш бошланганидан буён илк бор бу йилги парадга ҳарбий техникалар олиб келинмади. «Қирқилган формат»ни Кремлдагилар Украина томонидан ҳужум хавфи, шунингдек, бу йилгиси юбилей парад эмаслиги билан изоҳлашган.
Россия президенти Владимир Путин эса шанба куни кечқурун журналистлар билан мулоқотида бу сафарги парад ҳарбийлар ўз кучларини «махсус ҳарбий амалиёт»га ҳамда «рақибни тор-мор этиш»га қаратиши кераклиги сабабли ҳам шундай форматда ўтказилганини айтди.
9 май куни Москвада мобил интернет тўлиқ ўчирилди, шунингдек, блокировка даврида ҳам «оқ рўйхат» асосида ишлаши мумкин бўлган ресурслар фаолияти тўхтатилди.
Сулҳ олдидан Россия агар Киев парадни «барбод қилиш»га уринадиган бўлса, бунга жавобан россиялик ҳарбийлар Украина пойтахти бўйлаб ракеталар орқали ёпирилма зарба беришидан огоҳлантирди.
Украина президенти Володимир Зеленский эса 8 май кунги чиқишларида парад вақтида Москва бўйлаб зарба бериши ҳақида тўғридан тўғри гапирмаган бўлса-да, Россия раҳбарияти Қизил майдон устидаги Украина дронларидан «қўрқаётгани»ни айтганди.
АҚШ, Россия ва Украина уч кунлик сулҳ ҳақида эълон қилганидан сўнг, Зеленский парад ўтказишга «рухсат бергани»ни маълум қилди: у томонидан имзоланган фармонда тўғридан тўғри шу ҳақда гап кетган ва парад вақтида Қизил майдонга ҳужум қилмасликка ваъда берилган, ҳудуднинг координаталари аниқ қилиб кўрсатилганди.
Путин параддаги чиқишида тарих ҳақида кўп гапирди ва яна бир бор Россия Украинага қарши урушда ғалаба қозонишини айтди, уни одатдагидек «махсус ҳарбий амалиёт» деб атади.
«Ғолиб авлоднинг буюк жасорати бугун махсус ҳарбий амалиётдаги вазифаларни бажараётган жангчиларни илҳомлантирмоқда. Улар бутун НАТО блоки томонидан қуроллантирилаётган ва қўллаб-қувватланаётган тажовузкор кучга қарши турмоқда», – деди у.
Путиннинг Қизил майдондаги нутқидан сўнг, Россия ҳарбий техникалари намойиш этилди – аммо фақат видеороликлар орқали.
