Францияда яна бир круиз кемаси вирус туфайли изоляция қилинди

Франция ҳукумати 90 ёшли йўловчи норовирусдан вафот этганидан кейин Бордо шаҳрида тўхтаган Ambition круиз лайнерида 1,7 мингдан ортиқ одамни изоляция қилди, деб ёзди France24.

Расмийларнинг нашрга маълум қилишича, Ирландия ва Буюк Британиядан 1233 йўловчи бўлган Ambassador Cruise Line кемаси 12 май куни Бордо ғарбий портига етиб келган. Франция соғлиқни сақлаш идоралари вакилларининг сўзларига кўра, лайнер йўловчиларидан бири - 90 ёшли эркак вафот этган, 50 га яқин кишида эса норовирус аломатлари пайдо бўлган.

Норовирус — ўта юқумли вирус бўлиб, ўткир гастроэнтерит, яъни ошқозон ва ичакнинг яллиғланишига сабаб бўлади. У кўпинча ифлосланган маҳсулотлар, сув ёки касал одам билан бевосита алоқа қилиш орқали юқади. Вирус ташқи муҳитда ўта яшовчанлиги ва юқтириш учун етарли бўлган жуда кичик дозаси билан ажралиб туради.

Норовирус инфекциясининг асосий белгиларига тўсатдан кўнгил айниши, қусиш, ич кетиши ва қорин оғриғи, шунингдек, баъзан иситма ва тананинг оғриши киради. Махсус даволаш усули йўқ - терапия сувсизланишнинг олдини олиш учун суюқлик ва электролитларни тўлдиришдан иборат.

Кема 6 май куни Шетланд оролларини (Шотландиядаги архипелаг) тарк этиб, Шимолий Ирландиядаги Белфаст, Буюк Британиядаги Ливерпул ва Франциядаги Брестга кириб, Бордога келиб тўхтади, у ердан Испанияга йўл олиши керак эди.

Май ойи бошида Аргентинадан Кабо-Вердега йўл олган MV Hondius круиз кемасида ҳантавирус тарқалиши қайд этилган эди. «Нолинчи» бемор Жанубий Америка бўйлаб саёҳат пайтида касалликни юқтириб олган.

10 май куни лайнер Тенерифега етиб келди, йўловчиларнинг бир қисми эвакуация қилинди - уларнинг барчаси Испания фуқаролари эди. Кейин Нидерландия, Туркия, Франция, АҚШ ва Буюк Британиядан келган йўловчилар кемани тарк этди. Эртаси куни йўловчиларни эвакуация қилишда иштирок этган Испания фуқаро гвардияси ходими юрак хуружидан вафот этди.

Кейинроқ Жаҳон соғлиқни сақлаш ташкилоти (ЖССТ) раҳбари Тедрос Аданом Гебрейесус мамлакатларни ҳантавируснинг янги ҳолатларига тайёргарлик кўришга чақирди. Унинг таъкидлашича, расмийлар ЖССТ тавсияларига қатъий риоя қилиши керак, жумладан, 42 кунлик карантин ва хавф гуруҳидаги одамларнинг саломатлигини доимий назорат қилиш. Шу билан бирга, ЖССТ ҳантавирус билан боғлиқ ҳолат пандемияга айланмаслиги ҳақида бир неча бор баёнот берди.