Халқаро наркотармоқнинг Ўзбекистондаги фаолиятига чек қўйилди. Бу ҳақда ИИВ матбуот хизмати хабар берди.
Маълум қилинишича, ИИВ Тезкор қидирув департаменти томонидан ДХХ, Божхона қўмитаси ва хорижий давлатларнинг ҳуқуқни муҳофаза қилувчи органлари билан ҳамкорликда Тошкентда кенг қамровли тезкор-қидирув тадбирлари ўтказилган.
Тадбирлар давомида пойтахтдаги олийгоҳлардан бирида таҳсил олувчи 21 ёшли талаба интернет-наркодўконда кладмен бўлиб ишлагани аниқланган. Унинг бошқарувидаги Onix машинаси Янгиҳаёт туманида тўхтатилиб текширилганда, салон қисмига яширилган 500 грамм алфа-PVP синтетик гиёҳвандлик моддаси топилган.
Тезкор тадбирларнинг иккинчи йўналишида жиноий уюшманинг Наманган вилоятида фаолият юритиб келган аъзоси қўлга олинган.
Халқаро йўналишдаги ҳамкорлик натижасида трансмиллий жиноий уюшма етакчиларидан бири хорижий давлат ҳудудида яшириниб юргани аниқланган. У шу давлатнинг ҳуқуқни муҳофаза қилувчи органлари томонидан ушланган.
Трансмиллий жиноий уюшманинг Ўзбекистон ҳудудидаги фаолиятига алоқадор шахсларни аниқлашга қаратилган тезкор-қидирув тадбирлари натижасида уюшманинг 7 нафар омборчиси ва уларга ишлаган 6 нафар закладчик, шунингдек, уюшма етакчиларидан бири, жами 14 киши қўлга олинган.
Улардан 2,5 кг синтетик гиёҳвандлик воситаси процессуал тартибда расмийлаштириб олинган.
Қўлга олинганларнинг барчасига нисбатан жиноят иши қўзғатилиб, қамоқ эҳтиёт чораси қўлланган.
