Ҳайитда саховат ишлари ва 500 минг сўмлик фейк банкнота – маҳаллий дайжест

Қурбон ҳайити муносабати билан эҳтиёжманд аҳоли қўллаб-қувватланади. Адлия, ИИВ ва Тоғ-кон саноати вазирлиги давлат бошқарувидаги энг илғор идоралар деб топилди. Навоий вилояти, Хатирчи туманида сел оқибатларини бартараф этиш ишлари бошланди. Интернетда 500 минг сўмлик янги банкнота ҳақида фейк хабарлар тарқалди. Куннинг муҳим янгиликлари билан таништирамиз.

Қурбон ҳайити муносабати билан эҳтиёжманд аҳоли қўллаб-қувватланади

Президент Шавкат Мирзиёев Қурбон ҳайити муносабати билан эҳтиёжманд аҳолини ижтимоий-иқтисодий жиҳатдан қўллаб-қувватлаш юзасидан таклифлар тақдимоти билан танишди.

Таклифларга кўра, Қурбон ҳайити муносабати билан кенг кўламли тадбирларни амалга ошириш назарда тутилмоқда. Жумладан, оғир ва ногиронликни келтириб чиқарувчи касалликларга чалинган 10 минг нафар болада жарроҳлик амалиёти ўтказиш, 2,3 минг нафар онкологик, гематологик ва онкогематологик ташхис қўйилган беморларни тиббий текширувдан ўтказиш, даволаш ва жарроҳлик амалиётлари, шунингдек, камида 350 нафар беморда жигар ва буйрак трансплантацияси амалиётини ўтказиш харажатини қоплаш кўзда тутилган.

8 минг нафардан зиёд етим ва ота-она қарамоғидан маҳрум бўлган бола ҳамда Ватанни ҳимоя қилиш йўлида қурбон бўлган ота-она фарзандларининг омонат ҳисобварақларига 200 АҚШ доллари миқдорида пул маблағи ўтказилади. Давлат таъминотидаги оилалар, ўзгалар парваришига муҳтож бўлган ёлғиз яшовчи ҳамда ёлғиз кексалар ва ногиронлиги бўлган шахслар озиқ-овқат тўплами билан таъминланади. Мазкур чора-тадбирлар “Вақф” хайрия жамоат фондига ажратиладиган 690 миллиард сўм маблағ ҳисобидан молиялаштирилади.

Адлия, ИИВ ва Тоғ-кон саноати вазирлиги давлат бошқарувидаги энг илғор идоралар деб топилди

Президент иштирокида бўлиб ўтган тадбирда «Ўзбекистон – 2030» стратегиясини амалга ошириш бўйича Адлия вазирлиги энг намунали деб топилди. Таъкидланишича, вазирлик қисқа вақт ичида замонавий, очиқ ва рақамли адлия институтига айланди. Айни пайтда 30 та платформа орқали 380 та тўлиқ рақамлаштирилган хизмат кўрсатилмоқда, 780 дан ортиқ хизматдан эса онлайн фойдаланиш имконияти яратилган.

Тоғ-кон саноати ва геология вазирлиги ресурсларни бошқариш бўйича энг намунали вазирлик сифатида эътироф этилди. Қайд этилишича, геология-қидирув ишларида сув сарфи 20 фоизга қисқартирилган, асосий кончилик ускуналарини маҳаллийлаштириш даражаси эса 84 фоизга етказилган.

Ички ишлар вазирлиги давлат хизматларини кўрсатишдаги ижобий натижалари учун энг намунали идора деб тан олинди. Бугунги кунда вазирлик хизматларининг 95 фоизи тўлиқ рақамли шаклда тақдим этилмоқда. Шунингдек, тарқоқ бўлган 72 та маълумотлар базаси ягона «Хавфсиз шаҳар» тизимига бирлаштирилган.

Навоий вилоятида сел оқибатларини бартараф этиш ишлари бошланди

Навоий вилоятида сел ҳодисаси оқибатларини бартараф этиш мақсадида махсус штаб тузилди.

21 май куни Хатирчи туманида кучли сел келиб, 4 та сой яқинида яшовчи аҳоли вақтинчалик хавфсиз ҳудудга кўчирилганди. Ҳозир навбатчилик ташкил қилиниб, ишлар олиб борилмоқда.

Вилоятнинг 3 та туманидаги айрим ҳудудларда сел келди. Айниқса, Хатирчи туманида талафотли бўлди: сой ўзанига сиғмаган сел машиналарни оқизиб кетди, уйларнинг томорқаларигача кириб бориб, зарар етказди. Хусусан, туманнинг Қорача, Қуччи, Лангар, Ангидон, Олтинсой ва Майдон маҳаллаларида эвакуация ишлари ташкил этилиб, махсус техникалар жалб қилинган. Аҳоли хонадонлари ва томорқаларида тўпланиб қолган сув махсус техникаларда тортиб олиняпти.

Интернетда 500 минг сўмлик янги банкнота ҳақида фейк хабарлар тарқалди

Марказий банк ижтимоий тармоқларда тарқалаётган 500 минг сўмлик янги банкнот муомалага чиқарилиши ҳақидаги хабарларга муносабат билдирди. Регуляторга кўра, мазкур маълумот асоссиз ва ҳақиқатга тўғри келмайди.

«Бугунги кунда янги пул белгисини муомалага чиқариш масаласи Ўзбекистон Республикаси Марказий банки томонидан кўзда тутилмаган», дейилади МБ изоҳида.

Маълумот учун, «Марказий банк тўғрисида»ги қонунга кўра, янги пул белгиси аввало Сенат томонидан маъқулланиши керак. Шундан сўнг Марказий банк янги пул белгиси тавсифи ва унинг муомалага чиқарилиши тўғрисидаги маълумотларни оммавий ахборот воситаларида эълон қилади.