Импорт товарларини декларациялаш жараёни соддалаштирилди

Эндиликда импорт қилинаётган товарларни божхонада расмийлаштириш жараёни янада енгиллаштирилади. Адлия вазирлиги томонидан давлат рўйхатидан ўтказилган янги ўзгартишларга кўра, тадбиркорларга божхона тўловларини ҳар бир товар туркуми бўйича алоҳида амалга ошириш ҳамда айрим рухсатнома ҳужжатларисиз дастлабки декларациялаш имконияти яратилди.

Фото: Huffington Post

Янги тартибга мувофиқ, товарлар даврий божхона юк декларацияси асосида олиб кирилганда, декларацияловчининг мурожаатига кўра божхона божи ва солиқларни ҳар бир товар туркуми учун алоҳида тўлаш мумкин бўлади. Бунинг учун божхона органлари томонидан махсус ҳисобот юритилади.

Шунингдек, товарларни кейинчалик тўлиқ божхона юк декларациясини тақдим этиш шарти билан дастлабки декларациялаш тартиби жорий этилди. Энди мувофиқлик, экологик, ветеринария сертификатлари, санитария-эпидемиологик хулоса, карантин рухсатномаси ва айрим техник қурилмалар учун рухсатнома ҳужжатлари мавжуд бўлмаган ҳолларда ҳам товарларни дастлабки тарзда декларациялаш мумкин.

Қолаверса, даврий божхона юк декларацияси асосида товарларни декларациялашда тўлиқ декларацияни расмийлаштиришга тўсқинлик қилувчи айрим чекловлар бекор қилинди.

Мутасаддиларга кўра, мазкур ўзгартишлар ташқи иқтисодий фаолият иштирокчилари учун қулайликларни ошириш, божхона жараёнларини тезлаштириш ҳамда ортиқча бюрократик тўсиқларни қисқартиришга хизмат қилади.