Кўчмас мулк бўйича маълумотларни аниқлашнинг янги тартиби жорий этилди

Ўзбекистонда кўчмас мулк объектларини техник инвентаризациядан ўтказишнинг янги тартиби жорий этилди. Янги қоидалар кўчмас мулкнинг майдони, техник ҳолати ва бошқа кўрсаткичлари ҳақидаги маълумотларни аниқлаш ҳамда кадастр ҳужжатларини шакллантиришга қаратилган.

Фото: iStock

Адлия вазирлиги Кўчмас мулкни техник инвентаризациядан ўтказиш тартиби тўғрисидаги идоравий ҳужжатни давлат рўйхатидан ўтказди.

Ҳужжатга мувофиқ, техник инвентаризация кўчмас мулкнинг майдони, таркиби, техник тавсифлари ва амалдаги ҳолатини аниқлаш ҳамда унинг кадастр йиғмажилдини шакллантириш мақсадида амалга оширилади.

Техник инвентаризация Давлат кадастрлари палатаси муҳандислари ёки малака шаҳодатномасига эга кадастр муҳандислари томонидан ўтказилади. У бирламчи ва қайта инвентаризация шаклида амалга оширилади.

Жараён дастлабки камерал ишлар, дала ишлари ва дала ишларидан кейинги камерал ишлар босқичларини ўз ичига олади. Дала ишлари вақтида объект жойига чиққан ҳолда унинг ўлчамлари аниқланади, конструктив элементлари ҳамда муҳандислик-коммуникация тармоқлари ўрганилади.

Инвентаризация натижалари асосида кўчмас мулкнинг умумий ва фойдали майдони, ҳажми ҳамда бошқа техник кўрсаткичлари белгиланади. Шунингдек, объект режалари электрон шаклда тайёрланади.

Янги тартибга кўра, техник инвентаризация натижаларидан норози бўлган шахслар Кадастр агентлигига ёки судга мурожаат қилиш ҳуқуқига эга бўлади.

Мазкур тартиб кўчмас мулкка оид маълумотларнинг аниқлиги ва ишончлилигини таъминлашга хизмат қилиши кутилмоқда.