Абитуриентларга рухсатномаларни бериш бошланди

2026–2027 ўқув йили учун олий ва касбий таълим муассасаларига ўқишга кириш мақсадида рўйхатдан ўтган абитуриентлар тест синовларида иштирок этиш учун рухсатномаларини юклаб олиши мумкин.

Фото: Kun.uz

Билим ва малакаларни баҳолаш агентлиги маълум қилишича, онлайн рўйхатдан ўтган абитуриентларга «Абитуриент рухсатномаси»ни бериш бошланди.

Абитуриентлар рухсатномани my.uzbmb.uz портали орқали шахсий идентификация рақами (ЖШШИР) ҳамда паспорт серияси ва рақамини киритган ҳолда юклаб олиши мумкин.

Тест синовида иштирок этиш учун абитуриентлар белгиланган вақтдан кечикмасдан паспорт (ID-карта) ва абитуриент рухсатномаси билан келиши шарт.

Билим ва малакаларни баҳолаш агентлигига кўра, паспорт нусхаси ёки бошқа ҳужжатлар билан келган, шунингдек, белгиланган вақтдан кечиккан абитуриентлар тест синовларига киритилмайди.