Европа кенгаши бош котиби Ален Берсе 19 июл куни футбол бўйича 2026 йилги жаҳон чемпионати финали олдидан эълон қилинган очиқ мактубида ФИФА фаолиятига нисбатан бир қатор эътирозларни билдирди.
Унинг таъкидлашича, чемпионат якунланган бўлса-да, футбол бошқарувига оид жиддий муаммолар сақланиб қолмоқда.
«Байрам бугун кечқурун якунланади. Аммо саволлар қолади. Навбатдаги инқироз аллақачон бошланган. Унинг икки номи бор — пул ва ҳокимият», — деди Берсе.
ФИФАга бир нечта йўналиш бўйича эътирозлар билдирилди
Ален Берсе ФИФАни сиёсий таъсирларга мойиллик, ирқий можаролар билан боғлиқ баҳслар ҳамда ADI Predictstreet букмекерлик компанияси билан ҳамкорлик қилгани учун танқид қилди. Унинг фикрича, бундай ҳамкорлик спортда фирибгарлик хавфини кучайтириши мумкин.
Европа кенгаши ва ФИФА ўртасида 2018 йилда ўзаро англашув меморандуми имзоланган бўлиб, унга мувофиқ федерация инсон ҳуқуқларини ҳимоя қилиш, шаффоф бошқарув ва яхши корпоратив бошқарув тамойилларига амал қилиш мажбуриятини олган.
Берсенинг фикрича, Шимолий Америкада бўлиб ўтган 2026 йилги жаҳон чемпионати давомида юзага келган воқеалар мазкур келишувни қайта кўриб чиқиш зарурлигини кўрсатди. Шу муносабат билан у 2030 йилги мундиалгача янги рамкавий келишув бўйича музокаралар бошлашни таклиф қилди.
Жаҳон чемпионати давомида ФИФА танқидлар марказида бўлди
2026 йилги жаҳон чемпионати давомида ФИФА ва унинг президенти Жанни Инфантино бир неча бор танқидларга учради.
Энг катта баҳсларга сабаб бўлган ҳолатлардан бири АҚШ терма жамоаси ҳужумчиси Фоларин Балоганга нисбатан қўлланган дисквалификациянинг бекор қилиниши бўлди. Оммавий ахборот воситалари маълумотларига кўра, бу масала бўйича АҚШ президенти Доналд Трамп Инфантинога шахсан қўнғироқ қилган.
Шунингдек, мутахассислар ва мухлислар ФИФАни мусобақада спорт жиҳатидан кўра шоу ва тижоратга кўпроқ урғу берилгани учун ҳам танқид қилди. Хусусан, реклама танаффуслари, турли тантанали маросимлар ва кўнгилочар дастурлар сони ортгани қайд этилди. Финал учрашувининг танаффусида эса АҚШдаги Super Bowl анъанасига ўхшаш катта концерт-шоу ташкил этилди.
Инфантинонинг хусусий самолётдаги сафарлари ҳам баҳсларга сабаб бўлди
Associated Press агентлиги ҳисоб-китобларига кўра, турнир давомида ФИФА президенти Жанни Инфантино Qatar Airways авиакомпаниясига тегишли хусусий самолётда қарийб 95 минг километр масофани босиб ўтган ва 43 та учрашувда қатнашган.
Бу ҳолат ФИФАнинг атмосферага чиқариладиган СО₂ ҳажмини қисқартириш ҳақидаги ваъдаларини ҳисобга олганда, ташкилотга нисбатан иккиюзламачилик ҳақидаги танқидларни янада кучайтирди.
Испания жаҳон чемпиони бўлди
2026 йилги футбол бўйича жаҳон чемпионати 11 июндан 19 июлгача АҚШ, Канада ва Мексикада ўтказилди. Турнир доирасида жами 104 та учрашув бўлиб ўтди.
Финалда Испания терма жамоаси амалдаги жаҳон чемпиони Аргентинани 1:0 ҳисобида мағлуб этиб, 2026 йилги мундиал ғолиби бўлди.
