CleanTechnica маълумотларига кўра, 2026 йилнинг дастлабки беш ойида BYD 1 миллион 249 минг 405 та электромобил сотган. Гарчи компаниянинг Хитой ички бозоридаги савдолари давлат субсидияларининг қисқариши туфайли 22 фоизга камайган бўлса-да, халқаро бозорларда талабнинг ортиши умумий натижаларга ижобий таъсир кўрсатган.

Иккинчи ўринни эгаллаган Tesla ҳисобот даврида 595 минг 647 та автомобил сотган. Шунга қарамай, Илон Маск компанияси Хитой ишлаб чиқарувчилари учун асосий рақобатчи бўлиб қолмоқда.

Хитой брендлари бозорда устунлик қилмоқда

Энг кўп сотилган 20 та электромобил бренди рейтингига 11 та Хитой компанияси кирди. Улар орасида BYDдан ташқари Geely, Leapmotor, Wuling, Li Auto, Xiaomi, Zeekr, MG, Aion, AITO ва Xpeng ҳам бор.

Ушбу 11 та бренд жами 3,13 миллионга яқин электромобил сотган бўлиб, бу ТОП-20 компаниялари сотган автомобилларнинг 64 фоизини ташкил этган.

Бошқа йирик ишлаб чиқарувчилар ҳам кучли натижа кўрсатди

Рейтингда Хитой брендлари ва Tesla билан бир қаторда қатор халқаро компаниялар ҳам юқори ўринларни эгаллаган. Жумладан:

Volkswagen — 215 489 та;
BMW — 192 650 та;
Toyota — 176 749 та;
Kia — 169 019 та;
Mercedes-Benz — 150 208 та;
Audi — 138 006 та;
Hyundai — 134 782 та автомобиль сотган.

Рейтингга гибрид автомобиллар ҳам киритилган

Тадқиқот муаллифлари рейтинг тузишда тўлиқ электр қувватида ҳаракатланувчи автомобиллар билан бир қаторда гибрид моделлар ҳам ҳисобга олинганини таъкидлаган.

Экспертлар баҳосига кўра, фақат тўлиқ электр автомобиллари ҳисобланган тақдирда ҳам BYD етакчиликни сақлаб қолган бўлар эди. Бу ҳолатда компания тахминан 557 минг, Tesla эса 406 минг тўлиқ электр автомобилини сотган.

Таҳлиллар жаҳон электромобил бозорида Хитой ишлаб чиқарувчиларининг таъсири тобора кучайиб бораётганини, айниқса BYD халқаро майдонда асосий етакчига айланганини кўрсатмоқда.