Бу ҳақда 24 июл куни Санкт-Петербургнинг «Фонтанка» нашри хабар берди.
Санкт-Петербург Қонунчилик мажлисига сайловлар 18–20 сентябр кунлари ўтказилиши режалаштирилган. «Яблоко» ягона сайлов округи бўйича 62 нафар номзодни илгари суришни режалаштирган эди.
Шаҳар сайлов комиссияси раиси ўринбосари Олег Зацепанинг айтишича, партия 15 июл куни сайловда иштирок этиш учун зарур ҳужжатлар тўпламини, жумладан, молиявий ҳисоботни тақдим этган.
Бироқ комиссия хулосасига кўра, молиявий ҳисоботни имзолаган партия вакили бундай ваколатга эга бўлмаган.
«Молиявий ҳисобот амалда тақдим этилмаган деб ҳисобланади, чунки уни имзолаш ваколати бўлмаган шахс имзолаган. Бу камчиликни бартараф этиб бўлмайди», — дея Зацепанинг сўзларини келтиради «Ротонда» Telegram-канали.
«Яблоко» комиссия хулосасига қўшилмади
«Яблоко» вакили Павел Шапчиц сайлов комиссияси йиғилишида бу хулосага эътироз билдирди.
Унинг таъкидлашича, партия вакилига берилган ишончномадаги ваколатлар рўйхати чекланган эмас. Ҳужжатда «жумладан» деган сўз ишлатилгани сабабли партия ўз ҳуқуқшуноси молиявий ҳисоботни тақдим этиш ваколатига эга бўлган, деб ҳисоблайди.
Санкт-Петербург сайлов комиссияси раиси Максим Мейскин эса Россия Марказий сайлов комиссияси ҳужжатларига таяниб, ишончномада тўғридан тўғри кўрсатилмаган ваколатлар берилмаган деб ҳисобланишини айтди.
Шундан сўнг комиссия «Яблоко» номзодларини Санкт-Петербург Қонунчилик мажлиси сайловларида иштирок этиш учун рўйхатга олишга қарши овоз берди.
Партия раҳбари Марказий сайлов комиссиясига мурожаат қилган
Комиссия қарори қабул қилинишидан бир неча соат олдин «Яблоко» партияси раиси Николай Рибаков Россия Марказий сайлов комиссияси раиси Элла Памфиловага очиқ мурожаат йўллаган.
Мурожаат «рўйхатга олиш рад этилишига тайёргарлик кўрилаётгани муносабати билан» юборилган.
Рибаков Памфиловадан вазиятга аралашишни ва ҳал қилувчи овоз ҳуқуқига эга Марказий сайлов комиссияси аъзосини Санкт-Петербург сайлов комиссияси йиғилишида иштирок этиш учун юборишни сўраган.
Шу билан бирга, Санкт-Петербург сайлов комиссияси бошқа бир қатор сиёсий партияларнинг номзодлар рўйхатини сайловда иштирок этиш учун рўйхатдан ўтказган.
Хусусан, «Адолатли Россия», «Янги одамлар» ва Россия Федерацияси Коммунистик партияси рўйхатлари тасдиқланган. Бундан аввал «Ягона Россия» ва «Яшиллар» партияларининг рўйхатлари ҳам рўйхатдан ўтказилган эди.
ЛДПР номзодларини рўйхатдан ўтказиш масаласи кейинроқ кўриб чиқилиши кутилмоқда.
