Запорижжя вилояти ҳарбий маъмурияти раҳбари Иван Федоровнинг Telegram орқали хабар беришича, қурбонлардан бири — 67 ёшли эркак Запорижжя шаҳрида бошқарилувчи авиация бомбаси хусусий уйга келиб тушиши оқибатида ҳалок бўлган.
Федоров маълумотларига кўра, Россия қўшинлари бир сутка давомида Запорижжя вилоятининг 45 та аҳоли пунктига жами 917 марта зарба берган.
Уларнинг 22 таси авиация зарбаси, 634 таси учувчисиз учиш аппаратлари орқали амалга оширилган ҳужумлар ва 261 таси артиллерия зарбаларидан иборат бўлган.
Вилоят раҳбарининг билдиришича, ҳужумлар оқибатида инфратузилма объектлари, турар жойлар ва автомобилларга зарар етгани ҳақида 124 та хабар келиб тушган.
Хабар эълон қилинган вақтда Украина Ҳарбий-ҳаво кучлари Запорижжя вилоятига бошқарилувчи авиация бомбаларидан фойдаланган ҳолда янги ҳужум уюштирилиши хавфи борлигидан огоҳлантирган. Шунингдек, реактив дрон Запорижжя шаҳри томон ҳаракатланаётгани маълум қилинган.
Россия томони Кирилловкада 12 киши ҳалок бўлганини билдирган
Бундан аввал, 25 июл куни Россия томонидан Запорижжя вилоятининг босиб олинган қисми раҳбари этиб тайинланган Евгений Балицкий Украина томони Кирилловкадаги туристик базаларга ҳужум қилганини билдирган.
Унинг маълумотларига кўра, тунги ҳужум оқибатида 12 киши ҳалок бўлган ва 19 киши яраланган. Балицкий қурбонларнинг тўрт нафари, жароҳатланганларнинг эса олти нафари болалар эканини айтган.
25 июл куни Запорижжяда савдо маркази ёнган
Ўша куни Украина расмийлари Россия қўшинларининг Киев назоратидаги Запорижжя вилояти ҳудудларига зарбалари ҳақида ҳам хабар берган.
Маълумотларга кўра, 25 июлга ўтар кечаси ҳужумлар оқибатида ўн киши жабрланган.
Украина Фавқулодда вазиятлар давлат хизмати Запорижжя шаҳрида икки қаватли савдо маркази, дўкон ва савдо павильонларида ёнғин чиққанини билдирган. Ёнғин қамраб олган умумий майдон 900 квадрат метрни ташкил этган.
25 июл тонгида Иван Федоров Запорижжяга яна зарбалар берилганини маълум қилган. Унинг сўзларига кўра, ҳужумлар оқибатида бир аёл ҳалок бўлган, яна 11 киши тиббий ёрдамга муҳтож бўлган. Жабрланганлар орасида 3, 5 ва 7 ёшли уч нафар бола ҳам бўлган.
26 июл тонгида Федоров Запорижжя шаҳри ва Запорижжя туманига тунги ҳужумлар оқибатида яна бир киши ҳалок бўлгани ва 12 киши яраланганини хабар қилган.
Сумига еттита авиация зарбаси берилгани айтилди
Украина Фавқулодда вазиятлар давлат хизмати 27 июл тонгида Россия қўшинлари Суми шаҳрига бошқарилувчи авиация бомбаларидан фойдаланиб еттита зарба берганини маълум қилди.
Қутқарув хизматига кўра, хусусий турар жойлар, инфратузилма объектлари ва транспорт воситаларига зарар етган. Жабрланганлар борлиги ҳақида ҳам хабарлар келиб тушган.
Шунингдек, Россия дронлари шаҳардаги корхоналардан бири ва савдо марказига зарба бергани айтилган. Украина қутқарув хизмати қайси корхона ва савдо маркази зарар кўрганига аниқлик киритмаган.
Ҳужумлар оқибатида юзага келган ёнғинларни ўчириш ишлари такрорий зарбалар хавфи туфайли қийинлашган. Кейинчалик барча ёнғинлар ўчирилгани маълум қилинган.
Харкив вилоятида уч киши жабрланди
Украина Фавқулодда вазиятлар давлат хизмати маълумотларига кўра, 27 июлга ўтар кечаси Харкив вилоятининг Изюм шаҳрига берилган зарбалар оқибатида уч киши жабрланган.
Ҳужумлардан сўнг иккита ёнғин келиб чиққан. Металл ангар конструкциялари ва омбор биноси ёнган. Ёнғин қамраб олган умумий майдон 500 квадрат метрни ташкил этган.
Қутқарувчилар кейинчалик ёнғинлар тўлиқ бартараф этилганини маълум қилган.
