«Сити» Родрига ўринбосар олди, «Реал» ва «Тоттенҳэм»да қайта қуриш, «Бавария» ёш юлдузларни Германиядан чиқармаяпти, «Барса» ва «Атлетико» юлдузлари океанортига йўл олишди.
Фото: Getty ImagesФото: Getty Images
Жаҳон чемпионати вақтида ҳам Европа клублари ишлашдан тўхтамади ва янги мавсумга тайёргарлик доирасида таркибларини кучайтириб олишди.
Эллиот Андерсон
Қаердан: «Ноттингҳэм Форест» Қаерга: «Манчестер Сити» Ёши: 23 Амплуаси: марказий яримҳимоячи Фуқаролиги: Англия Нархи (Transfermarkt): 135 миллион евро
«Манчестер Сити» мунтазам равишда майдон маркази учун футболчилар сотиб олади, лекин барча трансферлар ҳам омадли чиқмайди. «Шаҳарликлар» ўтган ёзда Тиджани Рейндерс ва Нико Гонсалесга катта пул сарфлаганди, ундан олдинроқ тажрибали Матео Ковачич харид қилинганди, аммо улардан ҳеч бири кутилган даражани намойиш эта олмади. Энди «Сити» ўтган мавсум АПЛнинг энг яхши яримҳимоячиларидан бири бўлган, жаҳон чемпионатида ҳам ўзини кўрсатган Элиот Андерсонни сафга қўшиб олди. У жамоани тарк этиши кутилаётган Родрининг ўрнини эгаллайди. Бу билан клуб таркибини жиддий даражада кучайтирди, аммо футболчини қўлга киритиш унинг бозор нархидан икки баробар кўпроқ сарфлашга тўғри келди.
Сандро Тонали
Қаердан: «Нюкасл» Қаерга: «Тоттенҳэм» Ёши: 26 Амплуаси: марказий яримҳимоячи Фуқаролиги: Италия Нархи: 108 миллион евро
Номдор клубларда анчадан буён Тоналининг хизматларига талаб мавжуд эди ва бу ёзда ҳам унинг номи кўплаб клублар билан, жумладан, АПЛ чемпиони «Арсенал» ва учинчи ўрин соҳиби «МЮ» билан боғланаётганди. Аммо амалда футболчи «қарғалар» сафидан ўтган мавсумни 17-ўринда якунлаган «Тоттенҳэм»га алмаштирди. «Нюкасл» Тоналини оғир кунларида қўллаганди ва энди унинг трансфери учун катта пул ишлаб олди, футболчининг ўзи эса ўз маҳалладоши Роберто Де Дзерби қўли остида қайта қуриш даврига кирган «шпорлар»да ўз омадини синаб кўради.
Мантиқан тушунтириш қийин бўлган яна бир трансфер. «Тоттенҳэм» яна бир футболчига космик сумма тўлади. «Вест Ҳэм» чемпионшипга тушиб кетганига қарамай, Фернандес яхши мавсум ўтказганди: унга «Манчестер Юнайтед», «Реал» ва яна бир қатор грандлар қизиқиш билдираётганди. Аммо 22 ёшли португалиялик кутилмаганда «Тоттенҳэм»ни танлади – бунга у ўзи яшаб турган шаҳарни ўзгартиришни истамагани ҳам сабаб бўлиши мумкин. Энди у лондонликлар клубининг янги лойиҳасидаги муҳим футболчилардан бири бўлади. Унинг салоҳияти жуда катта, аммо у буни Шимолий Лондон клубида қанчалик юзага чиқара олишини вақт кўрсатади.
У ўтган мавсум охирида Европа лигасида кўрсатган ўйинларидан кейин тилга тушганди, жаҳон чемпионатида эса ҳақиқий юлдузга айланди. Манзамби – бир вақтнинг ўзида бир қанча позицияларни ёпа оладиган универсал аскар, техникаси ажойиб, кучли ва аниқ зарбага эга, қолаверса, жуда ёш – атиги 20 да. Бундай кўрсаткичларга эга бўлган футболчи топ-клублар учун ҳақиқий топилма, аммо бу мавсум қатор етакчилари билан хайрлашган «Астон Вилла» барчадан илдамроқ ҳаракат қилди. Бу Жоаннинг ўзи учун ҳам тўғри танлов бўлиши мумкин – бирмингҳэмликлар клубида унда ўйин амалиёти кўпроқ бўлади, бир неча мавсумданн кейин эса исталган гранд сафига бориб қўшилиши мумкин.
Марко Палестра
Қаердан: «Аталанта» Қаерга: «Челси» Ёши: 21 Амплуаси: ўнг қанот ҳимоячиси Фуқаролиги: Италия Нархи: 57 миллион евро
Палестрани ҳозирча асосан Италияда танишади, аммо янги мавсумда у ўзига бўлган муносабатни ўзгартириши мумкин. Марко 21 ёшда ва у А Сериянинг ўтган мавсумида кашфиётга айланди ва «Аталанта»нинг энг яхши футболчиларидан бири бўлди. Ҳимоянинг ўнг қанотида ҳаракатланувчи ушбу футболчининг истиқболи ёрқин кўринмоқда, Лондон клубида у асосий таркиб учун Мало Гюстога рақобат кўрсатади, бу эса Ҳаби Алонсога Рис Жеймсни ўзини яхшироқ ҳис қиладиган таянч зонасида ўйнатишга имкон беради. Палестра учун аввалига «Интер» асосий даъвогар эди, аммо инглизлар клуби футболчини илиб кетгач, италянлар клуби раҳбари Беппе Маротта агентлардан шикоят қилиб, улар трансферлар бозорига катта таъсир кўрсата бошлаганини айтди.
«Челси» ва «МЮ» мунтазам равишда бир-бирига футболчи сотади. Бу сафар Андрей Сантоснинг навбати келди. Бразилиялик ушбу яримҳимоячини лондонликлар катта умидлар билан Франция чемпионатидан олиб келишганди, аммо у Кайседо ва Энцо Фернандес билан рақобатда асосий таркибга кира олмади. Манчестерда эса унда етарлича ўйин амалиёти бўлиши аниқ – Андрейни Каземиронинг ўрнига олишди. Бу футболчилар ўз хусусиятлари бўйича бир-биридан бироз фарқланади, аммо ёш футболчининг ишлари «Олд Траффорд»да юришиб кетиши ҳам мумкин. Аммо муваффақиятсизликни ҳам истисно этиб бўлмайди – «МЮ» ва «Челси» ўртасидаги трансферларда бунақаси мунтазам равишда рўй бериб туради.
Марк Кукуреля
Қаердан: «Челси» Қаерга: «Реал» Ёши: 28 Амплуаси: чап қанот ҳимоячиси Фуқаролиги: Испания Нархи: 55 миллион евро
Март ойида Кукуреля «Реал»га ўтгандан кўра (у – «Барселона» тарбияланувчиси) жингалак сочларини олиб ташлашни маъқул кўришини айтганди, аммо бир неча ой ўтиб Мадрид клуби футболчисига айланди. «Челси» ватанига қайтишни истаётган испаниялик футболчисини олиб қолиш учун ортиқча ўжарлик қилмади (қолаверса, унинг ўрнига ёш Ҳато ўйнаши мумкин). Мадриддагилар эса бозор нархидаги яхши футболчи билан анчадан буён муаммоли бўлиб келган нуқтани ёпишга муваффақ бўлди.
«Шпорлар» бу сафарги трансферлар бозорида ақлдан озгандек ҳаракат қилмоқда – жамоа аллақачон янги футболчилар учун 267 миллион евро сарфлаб юборди. Шу жумладан, «Брайтон»дан 60 миллион евро эвазига нидерландиялик Пол ван Ҳекке олинди. Ўз навбатида, шунга яқин сумма эвазига Лука Вушкович қарама-қарши йўналишда ҳаракатланди. 19 ёшли хорват ўтган мавсумни ижара асосида «Ҳамбург»да ўтказганди ва ўзини яхши томонлардан намойиш эта олди ва Хорватия терма жамоасига ҳам жалб этилди. «Брайтон»да у етарлича ўйин амалиётига ва бежиз Европанинг энг истиқболли марказий ҳимоячиларидан бири сифатида қаралмаётганини исботлаш имконига эга бўлади.
25 ёшли марокашлик ҳужумчи анчадан буён гранд клублар назарига тушганди – у Нидерландия чемпионатининг ўтган мавсумида ПСВ сафида гол+пас бўйича 19+9 кўрсаткичини қайд этди. Жаҳон чемпионати эса Сайбари катта клубларда ўйнашга тайёр эканини кўрсатди. Лекин «Бавария» уни асосий таркиб футболчиси сифатида ўйнатиши даргумон – катта эҳтимол билан, Исмоил Кейннинг ўринбосари бўлади. Ундаги универсаллик ҳам ўз сўзини айтиши мумкин – футболчи ҳужумнинг чап қанотида ҳам, ҳужумчи ортида ҳам ҳаракат қила олади. Нима бўлганда ҳам, «Бавария» таркибни сифатли футболчи билан тўлдирди, бу эса узоқ давом этадиган мавсум олдидан жуда муҳимдир.
Натаниэл Браун
Қаердан: «Айнтрахт» Қаерга: «Бавария» Ёши: 23 Амплуаси: чап қанот ҳимоячиси Фуқаролиги: Германия Нархи: 50 миллион евро
Мюнхенликларда яна бир муҳим трансфер. Браун сўнгги икки мавсумда анча ўсди ва Германиянинг энг яхши чап қанот ҳимоячиларидан бири сифатида ном қозонди. Унинг кузирлари – тезлик, тўп билан яхши муомила қилиш ва ҳужумларга яхши қўшилиш. Чап қанотда Натаниэл сўнгги вақтларда жароҳатларга мойил бўлиб қолган Алфонсо Дэвис билан рақобатлашиши керак бўлади. «Айнтрахт» эса яна бир марта Европа учун энг яхши ёш истеъдодлар инкубатори мақомини мустаҳкамлади.
Даниялик ҳужумчи ўтган мавсумни ижара асосида Неаполда ўтказганди, шундай экан, бу трансфер қуруқ расмиятчиликка айланди. «Наполи» «МЮ» билан келишувдаги тегишли бандни ишга туширди ва энди Ҳойлунд ривожланишда давом этишига умид қилади. Расмус А Сериянинг ўтган мавсумида тезкорлиги ва техникаси билан клуб рақиблари учун муаммога айланди. Аммо у ҳозирча сермаҳсуллиги билан мақтана олмайди. Нима бўлганда ҳам, бу Лукакуни ҳамон асосий ҳужумчи сифатида ўйнатиб юрган «Наполи» учун яхши трансфер бўлди.
«Юнайтед» яримҳимоя чизиғини кучайтириш устида ишламоқда ва Тилеманс бу чизиқда муҳим фигурага айланиши мумкин. «Қизил иблислар» белгиялик футболчининг шартномасида кўрсатилган 41 миллион евролик товон пулини тўлади ва уни ўзиники қилди. Буни деярли риски йўқ трансфер дейиш мумкин – Юри 29 ёшда, унда юқори савия ва АПЛдаги муваффақиятли иштирок этиш тажрибаси мавжуд, таянч яримҳимоясида яхши шерик билан у лиганинг ўз позициясидаги энг яхши футболчиларидан бирига айланиши мумкин.
Виктор Муниос
Қаердан: «Осасуна» Қаерга: «Ливерпул» Ёши: 23 Амплуа: вингер Фуқаролиги: Испания Нархи: 40 миллион евро
Викторнинг тақдири ноодатий кечди – у Каталонияда туғилган ва ўз вақтида кўк-анорранглилар академиясида таҳсил олган, аммо 18 ёшида «Реал»га кўчиб ўтган. Миш-мишларга кўра, «Осасуна»да ўтган муваффақиятли мавсумдан кейин (у бу клубда ижара асосида ўйнаган), Испаниянинг ҳар икки гранди ҳам уни ўз сафида кўришни хоҳлаган, аммо якунда мадридликлар «Ливерпул» томонидан таклиф этилган 40 миллион еврони қабул қилган, «Барса» эса шунчаки рақобат қила олмаган. Ҳозирча Муниос янги клубида захира футболчиси бўлиши кутилмоқда, аммо у ҳали 23 ёшда ва келгусида кучли ижрочи бўлиб етишиши мумкин.
Конор Гэллаҳер «Атлетико» сафида ўз ўрнини тополмади ва Англияга қайтди, шундай экан, «матрасчилар» майдон маркази учун янги футболчига эҳтиёж сезди. Пабло Барриос жароҳат олганидан кейин жамоа маркази жуда кучсизлашиб кетди ва энди клуб бу зонани ёпишга ҳаракат қилмоқда. Юлманн сўнгги йилларда Португалияда тўп сурди, аммо энди янги босқичга чиқиш вақти келганди. 27 ёшли футболчи ажойиб зарбага эга, майдонда кўп меҳнат қилувчи ва рақиб ҳужумлари йўналишларини олдиндан ўқий оладиган сифатли таянч яримҳимоячиси ҳисобланади. У мадридликлар клубининг бошланғич таркибини кучайтириши тайин.
Мейсон Гринвуд
Қаердан: «Марсел» Қаерга: «Фенербаҳче» Ёши: 24 Амплуаси: вингер Фуқаролиги: Англия Нархи: 39 миллион евро
Гринвуд фаолиятини «МЮ»да ажойиб бошлаганди, аммо кетма-кет можаролар унинг карьерасига жиддий зарар етказди. Францияда инглиз футболчиси лиганинг энг яхши вингерларидан эди – тўпурарлар пойгасида ғолиблик учун курашди, кўплаб голли узатмалар муаллифига айланди ва қайсидир гранд клуб эътиборига тушиши мумкин эди. Аммо имижи туфайли катта клублар уни чақиришмади ва фаолиятини Туркияда давом эттирадиган бўлди.
Алехандро Грималдо
Қаердан: «Байер» Қаерга: «Атлетико» Ёши: 30 Амплуаси: чап қанот ҳимоячиси Фуқаролиги: Испания Нархи: 22 миллион евро
Европанинг энг сермаҳсул латералларидан бири фаолиятида янги босқичга ўтди. Грималдо 30 ёшгача «Бенфика» ва «Байер» каби клубларда қолиб кетди. Энди эса унда кучлироқ клубда ўзини кўрсатиш имконияти мавжуд. Ўз навбатида, «Атлетико» ҳам юқори савияли чап қанот ҳимоячисига эҳтиёж сезаётганди, шу тариқа, Грималдо ватанига қайтди. Мадридда тажрибали футболчиларни ёқтиришади ва Алехандро 30 ёшда эканига қарамай, яқин йиллар ичида жамоанинг асосий футболчиларидан бири бўлишига шубҳа йўқ.
Думфриснинг «Интер» билан шартномаси муддати тугашига бир йил қолганди, шунинг учун бошқа клубларда юқори савияли футболчини арзон нархга қўлга киритиш имконияти бор эди. Бир йил олдин унинг номини «Барселона» билан боғлашганди, аммо каталонияликлар бошқа трансферлар билан бандлигида «Реал» илдамлик қилди. Мадридликлар Дани Карваҳал кетганидан кейин ўнг қанот ҳимоясида юзага келган бўшлиқни бошқа бир тажрибали футболчи билан тўлдирди. Энди Дюмфрис Трент билан асосий таркиб учун рақобатлашиши керак бўлади, Жозе Моуринио эса қанотда ротация учун ажойиб танловга эга бўлди.
Троссар «Арсенал» билан чемпионликни қўлга киритганидан кейин жаҳон чемпионатини ҳам жуда кучли ўтказди. Аммо унинг Лондондан кетиши аллақачон ҳал бўлган масала эди. У ўтган ёзда «Арсенал»нинг янги шартномасини рад этганди ва клубда шартнома муддати тугаётган футболчисини вақтида сотишдан бошқа чора қолмади. Леандро ҳужум чизиғида бир қанча позицияларни ёпа олади. У 31 ёшда, аммо яна бир неча йил давомида юқори даражада футбол ўйнай олади.
Буёғига – эркин агент мақомида бошқа клубга ўтган футболчилар ҳақида. Хулиан Алварес трансферига ҳаракат қилаётган («Атлетико» эса асосий футболчисини рақобатчисига сотишни истамаяпти) «Барса» Роберт Левандовски билан шартномани узайтирмади. Полшалик ҳужумчи 37 ёшда эканига қарамай, яхши спорт формасида, аммо Флик жамоасининг тезкор темпига доим ҳам улгура олмаяпти. У энди АҚШда бир неча йил хотиржам тўп суриши мумкин.
Антуан Гризманн
Қаердан: «Атлетико» Қаерга: «Орландо» Ёши: 35 Амплуаси: ҳужумкор яримҳимоячи/ҳужумчи Фуқаролиги: Франция Нархи: эркин агент
Гризманн ҳам Испаниядан МЛС чемпионатига йўл олди. Антуан ўтган ёздаёқ даражаси пастроқ чемпионатга кетиши ҳақида хабарлар чиққанди, аммо у «Атлетико»да яна бир кучли мавсум ўтказиб, «гол плюс пас» тизимида 22 очко тўплади. Гризманн мавсум давомида Мадриддан барибир кетиши ҳақида маълум бўлганди, аммо у Европада ҳеч бўлмаганда яна бир мавсум тўп суришига бўлган умидлар ҳам йўқ эмасди. Аммо бу рўй бермади ва Европани яна бир афсона тарк этди.
Силва жаҳон чемпионатини кучсиз ўтказди, аммо у ҳамон юқори савияли футболчи бўлиб қолаётганига шубҳа йўқ. Бернардунинг АПЛдаги карьераси якунига етди, аммо 31 ёшда у фаолиятида янги саҳифани очди. Португалиялик яримҳимоячи учун асосий даъвогар «Барселона» бўлиб турганди, аммо кутилмаганда «Реал» орага қўшилди ва яхшироқ молиявий таклифлар билан рақобатда ютиб чиқди. Натижада футболчи яна бир неча йил ўз ватандоши Жозе Моуринио билан бирга ишлайдиган бўлди. Лекин ҳозирча Жозе Силвадан қандай фойдаланиши тушунарсиз.
Ибраима Конате
Қаердан: «Ливерпул» Қаерга: «Реал» Ёши: 27 Амплуаси: марказий ҳимоячи Фуқаролиги: Франция Нархи: эркин агент
«Реал» сўнгги йилларда эркин агентларни қўлга киритишни одат қилган – Алаба, Рюдигер, Мбаппе, Трент ва энди Бернарду ва Конате. Ибраима Мадридга кўчиб ўтмоқчи экани ҳақидаги гаплар бир йилдан буён айланиб юрганди. Якунда «Ливерпул» билан шартномани узайтиришдан бош тортди ва бу ёзда кутилганидек «Реал» таркибига келиб қўшилди. Конате ўтган мавсумда «Ливерпул»да тез-тез хатоларга йўл қўйганди, энди эса «Реал»нинг асосий таркиби учун курашади.
