АҚШ Конгресси Сенатининг барча 100 нафар аъзоси Украина президенти Володимир Зеленский билан учрашувга таклиф қилинган. Бу ҳақда Reuters агентлиги 27 июл куни икки нафар сенатор ёрдамчисига таяниб хабар берди.
Маълумотни The Hill ва Punchbowl News нашрлари ҳам тасдиқлаган. The Hill манбаларига кўра, Зеленскийнинг сенаторлар билан учрашуви сешанба, 28 июл куни маҳаллий вақт билан соат 18:00 да АҚШ Капитолийсида ўтказилиши режалаштирилган.
Зеленский Вашингтонга республикачи сенатор Линдси Грэмнинг дафн маросими муносабати билан боради. Грэм Украина масаласида фаол позицияда бўлган ва Россияга қарши санкцияларни кучайтиришга қаратилган қонун лойиҳасини ишлаб чиқишда иштирок этган.
Сенатор 10 июл куни Киевда Зеленский билан учрашган эди. Бу Грэмнинг сўнгги учрашувларидан бири бўлган.
Сенат Россияга қарши янги санкцияларни овозга қўйиши мумкин
Зеленскийнинг ташрифи вақтида АҚШ Сенати Россияга қарши санкцияларни кучайтиришга қаратилган қонун лойиҳаси бўйича овоз бериш жараёнини бошлаши кутилмоқда.
Ушбу ҳужжат Линдси Грэм иштирокида ишлаб чиқилган.
АҚШ президенти Доналд Трамп ҳам қонун лойиҳасини қўллаб-қувватлаётгани айтилмоқда. Шу билан бирга, у ҳужжатга Эрон ва Ливандаги «Ҳизбуллоҳ» ҳаракатига қарши чекловларни кенгайтиришга оид нормаларни ҳам киритишни сўраган.
Трамп Зеленский ва Нетаняҳу билан алоҳида учрашади
CNN телеканали Оқ уй вакилига таяниб хабар беришича, Доналд Трамп 28 июл куни Володимир Зеленский ва Исроил бош вазири Бинямин Нетаняҳуни Оқ уйда қабул қилади.
Улар билан алоҳида учрашувлар ўтказилиши режалаштирилган.
Зеленский билан музокараларда Россия ва Украина ўртасидаги урушни тугатишга қаратилган жорий тинчлик жараёни муҳокама қилиниши кутилмоқда.
Оқ уй вакилининг айтишича, ҳозир «урушни тугатиш вақти келган».
Нетаняҳу билан учрашувда эса Ливан билан олиб борилаётган музокаралар ҳамда Исроил ва мусулмон давлатлари ўртасидаги «Иброҳим келишувлари»ни кенгайтириш бўйича саъй-ҳаракатлар муҳокама қилиниши айтилган.
Ҳавода ўт очишни тўхтатиш масаласи ҳам муҳокама қилинган
24 июл куни Трамп тарафдори бўлган ўнг радикал фаол ва блогер Лора Лумер Зеленский билан интервю ўтказган. Кейинчалик у Украина президенти АҚШга бориш ва Трамп билан учрашиш режаси ҳақида айтганини маълум қилган.
Reuters манбасига кўра, Украина ва АҚШ расмийлари Россияга ҳаводаги ҳужумларни ўзаро тўхтатиш бўйича таклиф бериш имкониятини ҳам муҳокама қилган.
Бу ташаббус Украинадаги урушни тугатишнинг эҳтимолий шартлари бўйича навбатдаги таклифлар пакети таркибига киритилиши мумкин.
