28 июл куни Япония жануби-ғарбида 7,1 магнитудали зилзила рўй берди. Япония метеорология агентлигига кўра, зилзила ўчоғи Кумамото префектурасида, 10 километр чуқурликда жойлашган.
Метеорология агентлиги Ариаке ва Яцусиро кўрфазларида цунами рўй бериши хавфи ҳақида эълон қилганди, кўп ўтмай бу огоҳлантириш бекор қилинди.
150 мингдан ортиқ кишига эвакуация пунктларига кўчиб ўтиш бўйича кўрсатма берилди.
Reuters агентлиги Кумамотодаги шифохоналардан бирига таяниб, камида 50 киши жабрлангани ҳақида хабар қилган.
Nikkei нашрига кўра, зилзила вақтида тезюрар поезд ичида бўлган йўловчилардан ҳам бир нечаси жароҳат олган.
Япония бош вазири Санаэ Такаичи Токиодаги матбуот анжуманида жабрланганлар сони ва етказилган зарар миқдори ҳали аниқ эмаслигини айтди. «Айрим ҳудудларда электр таъминотида узилишлар ва ёнғинлар рўй берган, шунингдек, йўллар ва кўприклар шикастланган, бинолар қулаган», – деган бош вазир.
Маҳаллий нашрларга кўра, кўплаб йирик трассаларда улкан ёриқлар юзага келган. Кумамотода темирйўл қатнови тўхтатилган, маҳаллий аэропорт рейсларни қабул қилмаяпти ва янги парвозларни амалга оширмаяпти.
Кумамото префектурасидаги Aeon Mall номли савдо марказида давомли силкинишлардан кейин портлаш рўй бериб, бинонинг бир қисми шикастланган. Компания вакили маълум қилишича, биринчи силкинишдан кейин мижозлар ва ходимлар эвакуация қилинган, лекин бир неча киши ичкарида қамалиб қолган.
ОАВ ушбу савдо марказидаги портлаш оқибатида бир неча киши ҳалок бўлганини ёзган.
Япония – дунёда зилзилалар энг кўп кузатиладиган мамлакатлардан биридир: бу ерда йилига 1 500 марта атрофида ерости силкинишлари рўй беради.
Ўн йил муқаддам Кумамото префектураси давомли зилзилалар маконига айланган, хусусан, 2016 йил апрелида 7 магнитудали зилзила рўй берганди. Ўшанда NHK телекомпанияси табиий офат оқибатида 278 киши ҳалок бўлганини хабар қилган.
